“გურია ნიუსი” დუისის მცხოვრებ მერაბ ქავთარაშვილს ესაუბრა, რომელიც ამბობს, რომ მატანში კვლავ გადაკეტილია გზა და ინციდენტის დროს რამდენიმე ავტომანქანა დაზიანდა.
“ცოტა კი დამშვიდდა ვითარება, მაგრამ ერთი-ორი მანქანა დაამტვრიეს. გზაზე ხვდებიან და თუ ქისტია, შეურაცხყოფას აყენებენ და უმტვრევენ მანქანებს,” _ ამბობს ქავთარაშვილი.
როგორც დუისელები ყვებიან, ინცინდენტი სოფელ დუისში გუშინ მოხდა _ ხადორიდან მომავალმა მატნელებმა, რომლებიც თვითმხილველთა თქმით, ნასვამები იყვნენ, მეჩეთთან ჩაიარეს და დუისელებს გინება დაუწყეს. თვითმხილველები ამბობენ, რომ მძღოლმა საჭე პირდაპირ ქუჩაში მდგომი ახალგაზრდებისკენ მიმართა და კინაღამ გადაუარა. დუისელებმა მატნელებს სოფელ საკობიანომდე სდიეს და ხანმოკლე ჩხუბის შემდეგ, ის იყო, მორიგებას აპირებდნენ, რომ მატნელებს თანასოფლელები მიეშველნენ. პანკისელებმაც დარეკეს სოფელში და მეგობრებს დახმარება სთხოვეს. საბოლოოდ ორივე მხრიდან ასობით ადამიანი შეიკრიბა და ხელჩართული ჩხუბი გაიმართა.
“ყველაფერი დაშოშმინებისკენ მიდიოდა, როდესაც მოჩხუბრებთან ზვიადაურის ძმა მივიდა და ქისტების მისამართით შეიგინა. ამის შემდეგ აირია ყველაფერი,” _ ამბობს ერთ-ერთი თვითმხილველი.
გავრცელებული ინფორმაციით, მაჟორიტარი დეპუტატის ძმა სპარტაკ ზვიადაური მძიმედაა ნაცემი. სამედიცინო დახმარება ახმეტის საავადმყოფოში სხვა დაშავებულებსაც გაეწიათ.
ქისტების ვერსიას უარყოფს “ქართული ოცნება _ დემოკრატიული საქართველოს” ახმეტის რაიონული ორგანიზაციის თავმჯდომარე მამუკა ხოლეგაშვილი. ის “გურია ნიუსთან” ამბობს, რომ ჩხუბი დუისელმა ვაჰაბისტებმა წამოიწყეს: “მატნელი ბიჭები ყოფილან ტბათანაზე დასასვენებლად. როდესაც ქისტების სოფლებში ჩამოიარეს, წამოეწივნენ ვაჰაბისტები, რომლებთანაც მოუვიდათ უკმაყოფილება . ნაცემი ბიჭები ჩამოვიდნენ მატანში, სადაც ამ დროს იმყოფებოდა მაჟორტარი დეპუტატის ერთ-ერთი ძმა. რამდენიმე წუთში მატანში დაახლოებით 500-მდე ქისტი ჩავიდა. მთელი მატანის მოსახლეობა გამოვიდა კურტნაძეულის ხიდთან და ამბობდა, რომ არ დაუშვებენ ქართველების დაჩაგვრას და სცემდნენ ყველა ქისტს, ვინც ამ გზაზე გაივლიდა. კახეთის სამხარეო სამმარველოს უფროს ამირანაშვილისგან დაწყებული, საპატრულო, სპეცრაზმი და დეპუტატი დროულად მივიდნენ მოსახლეობასთან და სწორედ ზვიადაურის უშუალო ჩარევით მოხდა ამ ინცინდეტის მშვიდობიანად დასრულება. დღეს დილიდან ისევ გამოვიდა ხალხი და ითხოვს დამნაშავეების დასჯას. როგორც ინფორმაცია მაქვს, დაკითხვაზე არიან ამ ინციდენტის წამომწყები დუისში მცხოვრები ვაჰაბისტები. ამ წუთებში შინაგან საქმეთა მინისტრი ჩამოსულია და წინანდალში ხვდება მაჟორიტარ დეპუტატს,” _ ამბობს მამუკა ხოლეგაშვილი “გურია ნიუსთან”.
ხოლეგაშვილი უარყობს ზვიადაურის ძმის სპარტაკ ზვიადაურის ცემას: “სრული აბსურდია, რასაც ამბობენ და თან იმ ძმას ასახელებენ დაზარალებულად, ვინც საერთოდ არ ყოფილა ახმეტაში. ნაცემი არც ერთი არ არის.”
შინაგან საქმეთა სამინისტრო ხეობაში სპეცდანიშნულების რაზმის შეყვანას არ ადასტურებს, თუმცა, დუისში ვრცელდება ინფორმაცია რომ პოლიციის ძალები სოფელ ქორეთში შენიშნეს.
“გურია ნიუსს” შინაგან საქმეთა სამინისტროს პრესსამსახური დაუკავშირდა: “ინცინდენტში მონაწილეობდა რამდენიმე მოქალაქე. მათ შორის მოხდა დაპირისპირება და საქმე ხულიგნობის მუხლითაა აღძრული. ამ ეტაპზე არავინ არაა დაკავებული”, _ გვითხრეს პრესსამასახურში.
