“არსებობს საფუძვლიანი ეჭვი, რომ ხელისუფლება და ბიზნესი გაურიგდა ერთმანეთს”

მერიის მიერ გაცემული ნებართვების თანახმად, ინვესტორები ანადგურებენ კუს ტბის, წავკისის, ასათიანის ქუჩის და ახლა უკვე დიღმის 12-ე კილომეტრზე არსებულ ხეებს.

გარემოს დაცვისა და რესურსების სამინისტრო დუმს. ვითარებაში გასარკვევად დაინტერესებული მხარეების, ინვესტორების, გარემოსდამცველების და დაზარალებული მოქალაქეების მონაწილეობით თბილისის საკრებულოში სხდომა ჩატარდა. სხდომაზე გამოითქვა მოსაზრება, რომ პროცესი ისე უნდა წარიმართოს, ბიზნესმა და გარემოს დაცვამ ერთმანეთის ინტერესები უნდა გაითვალისწინონ და არ შეუშალონ ერთმანეთს ხელი.

საკრებულოს ეს ორაზროვანი პასუხი არ აკმაყოფილებს გარემოსდამცველებს და თბილისის მაცხოვრებლებს და ამიტომ განაგრძობენ აქციებს, სამთავრობო უწყებებისგან ქმედითი ნაბიჯების გადადგმის მოთხოვნით.

თუ რა მდგომარეობაა, ამ მხრივ თბილისში და კონკრეტულად, რას აპირებენ ბაღ-პარკების გასხვისების და ჩეხვის წინააღმდეგ, ფონდ “საერთაშორისო გამჭვირვალობა _ საქართველოს” წარმომადგენელი და მოქალაქეების საინიციატივო ჯგუფის ხელმძღვანელი ერეკლე ურუშაძე გვესაუბრება:

_ ბატონო ერეკლე, რა მდგომარეობაა, ამჟამად, კუს ტბის ტერიტორიასთან დაკავშირებით?

_ ამჟამად, სამუშაოები შეჩერებულია, თუმცა, ტერიტორიის ბედი გაურკვეველია.

_ როგორც ცნობილია, კუს ტბის ტერიტორიის გაჩეხვის ნებართვა და სხვა ტერიტორიებისაც, მერიის მიერაა გაცემული. თბილისის საკრებულოს სხდომაზე ინვესტორებმა მშენებლობის პროექტებიც წარმოადგინეს. ტერიტორიები გასხვისებულია და როგორ გესახებათ ამ შემთხვევაში ბრძოლის გზა?

_ დავაზუსტოთ: აქ საუბარია ერთ ნაკვეთზე, რომელიც კუსტ ტბის ფერდობზე მდებარეობს. ჩვენ ვფიქრობთ, რომ ამ ტერიტორიის გასხვისების და იქ მშენებლობის დაშვების გადაწყვეტილება უკიდურესად საზიანოა ქალაქისთვის, რადგანაც კუს ტბის ფერდობი, ფაქტობრივად, უკანასკნელი ხელუხლებელი მწვანე ზონაა ქალაქის ცენტრში. ამ ზონაში მშენებლობის პრეცედენტის დაშვება აუცილებლად გამოიწვევს ტერიტორიის შემდგომ ათვისებას და განაშენიანებას. ვაკის პარკი-კუს ტბის მწვანე ზონის საზღვარმა უკვე არა ერთხელ გადაიწია ბოლო 10-15 წლის მანძილზე მსგავსი გადაწყვეტილებების შედეგად.

_ თქვენ, როგორც მოქალაქეების საინიციატივო ჯგუფის ხელმძღვანელს, რომლებიც კუს ტბაზე ხეების გაჩეხვას აპროტესტებeნ, როგორ მიგაჩნიათ, ვინ უნდა აიღოს პასუხისმგებლობა ამ შემთხვევაში? და საერთოდ თვლით თუ არა, რომ კუს ტბაზე უკანონო ქმედებას ჰქონდა ადგილი?

_ ამ შემთხვევაში, პასუხისმგებლობა ეკისრება ქალაქის ხელისუფლებას – მერიას და საკრებულოს. ქალაქის მერიამ 2011 წელს მიიღო სრულიად დაუსაბუთებელი და ალოგიკური გადაწყვეტილება ხსენებული ნაკვეთისთვის სტატუსის შეცვლის შესახებ, ხოლო საკრებულომ მერიის ეს გადაწყვეტილება დაამტკიცა ისე, რომ მიზეზები არ უკითხავს. გარდა ამისა, ეჭვებს აღძრავს პრივატიზაციის პროცესიც, თუმცა, ჰქონდა თუ არა ადგილი კორუფციულ გარიგებას, ამის დადგენა მხოლოდ გამოძიებას შეუძლია.

ამ ეტაპზე ვითხოვთ, რომ საკრებულომ გააუქმოს თავისივე გადაწყვეტილება ტერიტორიისთვის სტატუსის შეცვლის შესახებ, რომელიც პროცედურული დარღვევევით იქნა მიღებული.

ამ შემთხვევაში, ჩვენ საქმე გვაქვს სიტუაციასთან, როდესაც არსებობს საფუძვლიანი ეჭვი, რომ ხელისუფლება და მასთან დაახლოებული ბიზნესი საზოგადოების ზურგს უკან გაურიგდნენ ერთმანეთს.

_ რას ფიქრობთ გარემოსდამცველ ლაშა ჩხარტიშვილის მიერ გარემოს დაცვის და ბუნებრივი რესურსების სამინისტროს მისამართით გაკეთებულ საკანონმდებლო ინიციატივაზე, რომ შეიქმნას თბილისის გარემოს დაცვის კომიტეტი, რომელიც როგორც სამინისტროს, ასევე მერიის დაქვემდებარებაში იქნება და თბილისის ბაღ-პარკების საკითხს ორივე უწყება დაარეგულირებს? თქვენი აზრით, ეს გადაჭრის პრობლემებს?

_ სასურველია, გარემოს დაცვის სამინისტროს ჰქონდეს რაიმე სამართლებრივი მექანიზმი, რომელიც მას მსგავს სიტუაციებში ჩარევისა და მათ დარეგულირებაში მონაწილეობის საშუალებას მისცემს.

_ რა კონკრეტული მოთხოვნები გაქვთ თბილისის მერიის, საკრებულოს და გარემოს დაცვისა და ბუნებრივი რესურსების სამინისტროს მისამართით?

_ ჩვენი უპირველესი მიზანია, რომ მოხდეს არსებული “ცხელი კერების” ჩაქრობა. ამისთვის საჭიროა, კუს ტბის ფერდობის სადაო ნაწილს აღუდგეს ძველი სტატუსი და გამოცხადდეს მორატორიუმი ქალაქის გამწვანებულ ტერიტორიებზე ნებისმიერ მშენებლობაზე მანამ, სანამ ეს საკითხი სათანადოდ არ მოგვარდება საკანონმდებლო დონეზე. თავად საკრებულოს თავმჯდომარემ ბრძანა, რომ განზრახული აქვს, ქალაქის განვითარების გენერალურ გეგმაზე მუშაობის დაწყება. ამის გათვალისწინებით, მით უფრო ლოგიკური იქნება მწვანე ტერიტორიებზე მშენებლობების დროებით შეჩერება.

უფრო გრძელვადიან მიზნებზე თუ ვისაუბრებთ, აუცილებელია ქალაქის მწვანე ზონების დაცვის უფრო მყარი საკანონმდებლო გარანტიების შექმნა. უნდა დაიხვეწოს როგორც ცალკეული ხეების მოჭრის ნებართვების გაცემის, ისე მწვანე ზონებისთვის სტატუსის შეცვლის პროცედურა და უზრუნველყოფილი უნდა იყოს ამ პროცესში საზოგადოების მონაწილეობა.

გარდა ამისა, აუცილებელია თბილისის ეკოლოგიისა და გამწვანების სამსახურის რეფორმის დაწყება. ბოლო წლების გამოცდილება იმაზე მეტყველებს, რომ სამსახურის ხელმძღვანელობას ამ სფეროში არსებული პრობლემების არათუ გადაჭრის, არამედ მათი გააზრების უნარიც კი არ შესწევს და ის დაუყოვნებლივ უნდა შეიცვალოს.

_ თქვენ არაერთი აქცია გამართეთ გარემოს დასაცავად. გამოიღო თუ არა ამან რაიმე შედეგი და რას აპირებთ მომავალში?

_ მთავარი შედეგი, ამ ეტაპზე, მშენებლობის შეჩერებაა (დროებით მაინც). ვაპირებთ საპროტესტო აქციების გაგრძელებას და გაძლიერებას, ასევე სამართლებრივი მექანიზმების გამოყენებას (სასამართლო, პროკურატურა). გარდა ამისა, თუ ადგილობრივი ხელისუფლება ვერ დაგვანახებს, რომ პრობლემის მოგვარების სურვილი და უნარი აქვს, ვეცდებით, პროცესი ცენტრალურ დონეზე გადავიტანოთ.

_ გარდა ასათიანის ქუჩის, კუს ტბის, წავკისის, დიღმის ტერიტორიებისა, ხეებზე მასობრივი შეტევა თბილისში სხვაგანაც ხომ არ ხდება?

_ მწვანე ტერიტორიების განადგურება მთელი თბილისის მასშტაბით მიმდინარეობს, როგორც სარეკრეაციო ზონებში, ისე იმ ადგილებში, რომლებსაც ეს სტატუსი არ აქვთ. მაგალითად, მხოლოდ ჭავჭავაძის გამზირის ერთ მცირე მონაკვეთზე, ბოლო ერთი წლის მანძილზე ორმოცდაათამდე სრულიად საღი წიწვოვანი ხე მოიჭრა დაგეგმილი მშენებლობების გამო. გარდა ამისა, ბოლო წლებში უამრავი საღი ხე მოიჭრა თბილისის სხვა უბნებშიც _ მაგალითად, მოსკოვის პროსპექტზე, კიკვიძის ბაღში, აღმაშენებლის გამზირზე, პუშკინის ქუჩაზე.

ქალაქის ხელისუფლებას, ფაქტობრივად, დაკარგული აქვს კონტროლი სიტუაციაზე და არაფერს აკეთებს პრობლემის გადასაჭრელად.