ამ პრობლემასთან დაკავშირებით მათ გარემოსდამცველ ლაშა ჩხარტიშვილთან ერთად არაერთი აქცია გამართეს: “აქ ჩვენ მოწყობილი გვაქვს ბავშვების დასასვენებელი ბაღი და ასევე საკუთარი ხელით გავაშენეთ ხეხილი, თუმცა, “ჯი თი მოტორსის” ხელმძღვანელობას უნდა, ეს ბაღი გაგვიუქმოს, ასევე აპირებენ დარგული ხეხილის გაჩეხვას”, _ აცხადებდნენ აქციის მონაწილეები.
აღმაშენებლის ხეივნის მე-12 კილომეტრზე მცხოვრები ადამიანები იმასაც ამბობენ, რომ თბილისის მერი 2007 წელს მათ დაჰპირდა სკვერისა და სტადიონის აშენებას, ამის დამადასტურებელი დოკუმენტაციაც აქვთ, თუმცა, იმ ადგილას “ჯი თი მოტორსის” ფორდის ცენტრი “წამოიჭიმა”.
“ჩვენ ეს გავაპროტესტეთ, რადგან ნაკვეთებთან და კორპუსებთან ახლოს ასეთი ობიექტი მეტად საშიში იქნებოდა, მაგრამ ვერაფერს გავხდით. თუ “ნაციონალებს” უნდოდათ, ეს მათი დაუწერელი კანონი იყო. აქ რომ უზარმაზარ გენერატორს ჩართავენ, რამდენიმე ტრაქტორის გამონაბოლქვს უდრის. აპირებენ გლობალური ავტოსერვისის, კერძოდ, მეორადი ავტოზეთების გადამამუშავებელი ქარხნის აშენებას, რომელიც თავისი მოცულობით მთლიანად ფარავს ამ ტერიტორიას. დღე და ღამე უნდა იმუშაონ და აქ ცხოვრება შეუძლებელი გახდება, როგორც ხმაურის, ასევე ჰაერის დაბინძურების თვალსაზრისით. ვინ არის პასუხისმგებელი, ერთ მშვენიერ დღეს ეს რომ აფეთქდეს? როგორ შეიძლება მოსახლეობის ახლოს ასეთი მშენებლობა? მთელი ცხოვრება კატორღაში ხომ არ ვიცხოვრებთ? დღე და ღამე ზეთის, ფრეონის, ანტიფრიზის და კიდევ რა ვიცი, რა საშინელებების სუნი უნდა ვისუნთქოთ, რომელიც საფრთხეს უქმნის ჩვენს ჯანმრთელობას”, _ აცხადებენ აღმაშენებლის ხეივნის მე-12 კილომეტრის მაცხოვრებლები.
როგორც კომპანია “ჯი თი მოტორსში” აცხადებენ, ბრალდებები უსაფუძვლოა და გარემოს სერვისცენტრის მშენებლობით პრობლემები არ შეექმნება, თუმცა, მოსახლეობას მათი განცხადების არ სჯერა.
საინტერესოა ისტორია, როგორ აღმოჩნდა დიღმის სარემონტო ქარხნის ტერიტორია კომპანია “ჯი თი მოტორსის” ხელში და როგორ მისცა მერიამ მას აქ მშენებლობის ნებართვა, მაშინ როდესაც იქ მცხოვრები ადამიანები წლების მანძილზე ითხოვდნენ ამ ნაკვეთების დამტკიცებას.
მივყვეთ ამბებს ქრონოლოგიურად: დავით აღმაშენებლის ხეივნის მარჯვენა მხარეს, მე-12 კილომეტრზე არსებული კორპუსების წინ იყო თავისუფალი მიწები, რომლებიც, როგორც ადგილობრივები აცხადებენ, შევარდნაძის ხელისუფლების მითითებით შეეძლოთ სასოფლო-სამეურნეო დანიშნულებით გამოეყენებინათ. ტერიტორია გაინაწილა 24-მა ოჯახმა და იქ მრავალწლიანი ნარგავები გააშენეს. მას შემდეგ, რაც ტელევიზიით შეიტყვეს, რომ ასეთი მიწების დაკანონება ხდებოდა, მიაკითხეს მცხეთის გამგეობას (მაშინ ეს ტერიტორია მცხეთას ეკუთვნოდა). დაკანონების მაგივრად, 2005 წლის აგვისტოში, მცხეთის გამგეობასთან არსებულმა მუდმივმოქმედმა კომისიამ მათ 20-წლიანი იჯარა გაუფორმა. ანუ ის ტერიტორია, რომელიც “ჯი თი მოტორსს” მისცა მერიამ, 2025 წლამდე აღმაშენებლის მე-12 კილომეტრზე მცხოვრებლებს იჯარით აქვთ აღებული.
ამ შემთხვევაში კომპლექსურ პრობლემასთან გვაქვს საქმე _ ხეების ჭრასთან ერთად (“ჯი თი მოტორსის” მიერ წარმოებული მშენებლობა მოსახლეობის მიერ გაშენებულ მრავალწლიან ნარგავებსაც ემუქრება), პატარა დიღმის ტერიტორიაზე ადგილი აქვს საკუთრების უფლების გადაფარვას. ამ პრობლემაზე “გურია ნიუსი” უკვე წერდა. ძალიან ბევრ შემთხვევაში, საკუთრებასთან დაკავშირებით, საჯარო რეესტრის არაეფექტური მუშაობის პრობლემა გამოიკვეთა.
“ჯი თი მოტორსმა” მიერ მოსახლეობის იჯარით აღებული მიწების დაკანონება ადგილობრივებში ეჭვს ბადებს _ ისინი ფიქრობენ, რომ მერიასა და ბიზნესკომპანიას შორის უკანონო გარიგება მოხდა: “იმ დროს, როცა 20 წელი ვერაფერს გავხდით, ჩვენს მფლობელობაში არსებული ნაკვეთები საჯარო რეესტრით დაგვეკანონებინა, ამ დროს ბათუმელი მოქალაქე, ვინმე თემურ უსტიაშვილი (“ჯი თი მოტორსის” დამფუძნებელი) მოდის და ამ ტერიტორიას ისაკუთრებს. როგორც რეესტრის მასალებიდან ირკვევა, დოკუმენტების გამო მას გაფორმებისას პრობლემა შეექმნა, მაგრამ როგორ მოახერხა, ეს უკვე გამოძიების საქმეა. პიროვნება ხედავს, რომ ნაკვეთები შემოღობილია, მოვლილია. ე.ი. პატრონი ჰყავს. არც კითხულობს არაფერს და თაღლითურად, მოტყუებით, ჩუმად ყიდულობს მიწას და იფორმებს იჯარით აღებულ ნაკვეთებს. არ მოვისვენებთ, სანამ არ გავიგებთ, რა გზებით შეიძინა მან ეს ფართობი”, _ აცხადებენ დიღმის სარემონტო ქარხნის დასახლების მაცხოვრებლები მაგული ჯარიაშვილი, მანანა წიქარიშვილი და დავით ასლამაზიშვილი.
“საქართველოს ახალგაზრდა იურისტთა ასოციაციის” იურისტი ლიკა წიკლაური ჩვენთან საუბარში აცხადებდა, რომ თვითმმართველობებმა დაურეგისტრირებელი მიწის ნაკვეთების საკუთარ ბალანსზე დარეგისტრირება და მათი გასხვისება დაიწყეს. ამის გამო ხდებოდა ისე, რომ ნაკვეთს ორი მესაკუთრე უჩნდებოდა _ ერთი, რომელსაც მიწის ნახაზები და მისი ქაღალდის საბუთები ჰქონდა და მეორე, რომელსაც საკუთრება უკვე ელექტრონულად ჰქონდა დარეგისტრირებული (2010 წლის 15 მარტის გადაწყვეტილებით რეესტრმა საკუთრების ელექტრონულად დარეგისტრირება დაიწყო. ადრე გატარებული რეგისტრაცია კი ჩაითვალა დაუზუსტებლად. თუმცა, დაუზუსტებელი რეგისტრაცია ჩვენი კანონმდებლობით არ გამორიცხავს უფლების არ არსებობას. მესაკუთრეს კი ელექტრონული დარეგისტრირების ვალდებულება კანონით არ აქვს”, _ ლიკა წიკლაური).
ამ ისტორიაში საგულისხმოა კიდევ ერთი მნიშვნელოვანი დეტალი _ აღმაშენებლის ხეივნის მე-12 კილომეტრზე მოსახლეობის მიერ იჯარით აღებული ნაკვეთების უკან სს “მონოლითმშენმა” საცხოვრებელი კორპუსი (N2 ექსპკორპ) ააშენა. როგორც მოსახლეობა ამბობს, ამიტომ აქ სხვა კომპანიის განთავსება დიდი შეცდომა იყო, რადგან ტერიტორია უკვე ეკუთვნოდა “ექსპკორპუსს”.
სწორედ სს “მონოლითმშენს” უნდა აეშენებინა სკვერი და სპორტული მოედნები, რასაც როგორც “ექსპკორპუსის”, ასევე, ტერიტორიის იჯარით მოსარგებლე მოსახლეობა მოუთმენლად ელოდებოდა.
თბილისის მერის სიტყვიერ დაპირებასთან ერთად, რომ მოსახლეობას სკვერი და ბავშვებისთვის დასასვენებელ-გასართობი ადგილი ექნებოდა, არსებობს უგულავას 2007 წლის 28 ნოემბრით დათარიღებული დადგენილება #25.14.784, სადაც წერია, რომ უნდა მოეწყოს საბავშვო მოედანი #2 _ 300 კვმ. და სპორტული მოედანი #3 _ 500 კვმ, სამშენებლო ნორმებისა და წესების დაცვით.
თუმცა, არც დაპირება და არც დადგენილება არ შესრულებულა. პირიქით, მოსახლეობის მიერ იჯარით აღებულ ნაკვეთებზე გაშენებული ნარგავების განადგურების საფრთხეც არსებობს.
მოსახლეობა ამ ყველაფერს ძალიან მტკივნეულად აღიქვამს. 7 აგვისტოს კანცელარიასთან გამართულ ბაღ-პარკების ჩეხვის საწინააღმდეგო აქციაზე დიღმის სარემონტო ქარხნის დასახლებაში მცხოვრები 75 წლის თამარ თათანაშვილი თავის დაწვითაც კი დაიმუქრა, თუ მის 25-წლიან ნარგავებს გაჩეხავენ.
მოსახლეობა სამთავრობო უწყებებისგან ითხოვს, რომ მათ საცხოვრებელ ტერიტორიაზე გაუქმდეს “ჯი თი მოტორსის” ფორდის ცენტრი და საერთოდ აეკრძალოს ამ კომპანიას მათ საცხოვრებელ ტერიტორიაზე საქმიანობა. გამოძიებულ იქნას, რა დოკუმენტაციის საფუძველზე შეიძინა თემურ უსტიაშვილმა მიწა. ასევე ითხოვენ, მათი კუთვნილი ნაკვეთების გაფორმებას, რომელსაც ამდენი წელია უვლიან. მერიისგან მოითხოვენ ასევე, დაპირებისამებრ სკვერის და სტადიონის გაკეთებას, წინააღმდეგ შემთხვევაში, ამ საკითხის ცალკე გასაჩივრებით იმუქრებიან.
