“გურია ნიუსი” შეეცადა, ადგილობრივი ხელისუფლების წარმომადგენლების მოსაზრებები მოესმინა 26 მაისს, თბილისში, მიტინგის დარბევასთან დაკავშირებით.
სამწუხაროდ, მაღალი რანგის ჩინოვნიკების შეხედულების შესახებ ვერაფერი შევიტყვეთ _ გუბერნატორი ვალერი ჩიტაიშვილი თბილისში იმყოფება, ვიცე-გუბერნატორი ლელა თავართქილაძე _ ამსტერდამში, ოზურგეთის მუნიციპალიტეტის საკრებულოს თავმჯდომარე ალეკო მამეშვილი კი ლიტვაში. მუნიციპალიტეტის გამგებელმა გიორგი ტაკიძემ კი კომენტარი არ გააკეთა.
ოზურგეთის მუნიციპალიტეტის გამგეობის კულტურის სამსახურის უფროსი მარინა ჯაფარიძე ამბობს, რომ პირადად მისთვის, ნებისმიერი მხრიდან, ნებისმიერი სახის ძალადობა მიუღებელია: “ჩვენ დემოკრატიის გზაზე მდგარი ქვეყანა ვართ და სიტყვის თავისუფლება დაცული უნდა იყოს, თუმცა, მომიტინგეებსაც გარკვეული ვალდებულებები გააჩნიათ საზოგადოების წინაშე. დღეს საქართველოს დამოუკიდებლობის დღეა და ვფიქრობ, თითოეული ჩვენგანი ვალდებული ვართ, ღირსეულად შევხვდეთ ამ დღეს. ყველაფერს თავისი დრო და თავისი ადგილი აქვს. კიდევ ერთხელ დავაფიქსირებ ჩემს აზრს _ პირადად არანაირ ძალადობას არ ვამართლებ”, _ გვითხრა ჯაფარიძემ.
როგორც, ოზურგეთის მუნიციპალიტეტის განათლების, კულტურის და სოციალური დაცვის კომისიის თავმჯდომარემ ირინა საჯაიამ გვითხრა, არ უნდა მომხდარიყო ის, რაც მოხდა: “ერთი რამ რაც შემიძლია გითხრათ _ არ უნდა მომხდარიყო ის, რაც მოხდა. მაგრამ, როცა გეუბნება ხელისუფლება, რომ აქ უნდა ჩატარდეს აღლუმი და უნდა აღინიშნოს საქართველოს დამოუკიდებლობის დღე, უნდა გაითვალისწინო. მით უმეტეს, როცა გთავაზობენ ალტერნატივას, თორემ, რაღაც ჯიბრზე კი არ უნდა აკეთო. შემზარავი ფაქტი მოხდა _ ორი ადამიანი დაიღუპა და კადრებს რომ ვუყურე, შოკში ვარ მას შემდეგ. ოპოზიციას უნდა გადაენაცვლა სხვა მხარეს და ეს ტრაგედია არ მოხდებოდა”, _ ამბობს საჯაია.
ოზურგეთის მაჟორიტარი დეპუტატი საქართველოს პარლამენტში გოჩა შანიძე მომხდარს ცუდ ფაქტად აფასებს: “ეს არის ძალიან ცუდი ფაქტი _ ორი ახალგაზრდა კაცი შეეწირა ამ უაზრობას. ძალიან სამწუხაროა. ტრაგედია გამოიწვია პროვოკატორის მიერ წინასწარ მომზადებულმა სცენარმა. ეს იყო კარგად ორგანიზებული რუსული პროვოკაცია, რომელიც მოუწყვეს ჩვენს ქვეყანას და ქართველ ხალხს სპეციალურად”, _ მიიჩნევს პარლამენტარი.
ოზურგეთის მუნიციპალიტეტის გამგეობის ზედამხედველობის სამსახურის უფროსი შუქრი გაბრიჩიძე ამბობს, რომ ძალიან ცუდი რამ მოხდა: “ამ ხალხმა ჭკუა ვერ ისწავლა?! ისეთი შთაბეჭდილება მაქვს, რომ ბევრს არ უყვარს საქართველო და არ იციან, რა უნდა ქნან, ბოღმით მოქმედებენ და არა გონივრულად”.
არასამთავრობო ორგანიზაციის “გურიის ახალგაზრდული რესურსცენტრის” ხელმძღვანელმა თამარ ღლონტმა, ამ დროისთვის, კომენტარის გაკეთებისგან თავი შეიკავა.
