“როგორც საზოგადოებისთვის ცნობილია, საქართველოს მთავარი პროკურატურა აწარმოებს გამოძიებას სასჯელაღსრულების დაწესებულებების ირგვლივ შექმნილი სიტუაციის თაობაზე და მათ გამოთქვეს ჩემი მოწმის სტატუსით დაკითხვის სურვილი. ბუნებრივია, საქართველოს ყველა მოქალაქის კონსტიტუციური მოვალეობაა, პასუხი გასცეს შეკითხვებზე, რომლებიც სამართალდამცავებს აქვთ და მე ამ მოვალეობას შევასრულებ. მე ვფიქრობ, რომ გამჭვირვალე და მიუკერძოებელმა გამოძიებამ ერთხელ და სამუდამ უნდა გააქარწყლოს ის ჭორები და ფსევდო სტერეოტიპები, რომლებიც წლების განმავლობაში იქმნებოდა სასჯელაღსრულების სისტემის მიმართ. ჩვენი ქვეყნის მომავლისთვის მნიშვნელოვანია, რომ გამოძიება იყოს მიუკერძოებელი და არა პოლიტიკურად ანგაჟირებული. ამიტომ, ჩემი აზრით, მნიშვნელოვანია, საზოგადოება იყოს ინფორმირებული, რაც გამოძიების მიუკერძოებლობის ერთ-ერთი გარანტი იქნება. არის რამდენიმე ნიუანსი, რომელზედაც მე მსურს ახლავე შევაჩერო საზოგადოების ყურადღება, როგორც ყოფილმა მინისტრმა და იურისტმა.
პირველი, გაუგებარია, რატომ არაფერს ამბობს პროკურატურა ყოფილი იუსტიციის მინისტრის ბატონი ქავთარაძის დაკითხვის შესახებ. მოგეხსენებათ, თუ შეკითხვები არსებობს სასჯელაღსრულების დეპარტამენტის ყოფილ უფროსთან ბაჩო ახალაიასთან, ბუნებრივია, ეს შეკითხვები უნდა დაისვას მისი უფროსის, ყოფილი იუსტიციის მინისტრ ქავთარაძის, მიმართაც (სასჯელაღსრულების დეპარტამენტი, სასჯელაღსრულების, პრობაციისა და იურიდიული დახმარების საკითხთა სამინისტროს შექმნამდე, შედიოდა იუსტიციის სამინისტროს შემადგენლობაში). ბატონი ქავთარაძის მეგობრობა ენერგეტიკის მინისტრ კალაძესთან არ უნდა იყოს ინდულგენციის ნიშანი, რადგან ეს გამოძიებას უკვე დასაწყისშივე აძლევს პოლიტიკურ ელფერს.
მეორე, ნებისმიერი დანაშაულის უმნიშვნელოვანესი ნიშანი არის მოტივი. პროკურატურის ჰიპოთეზა ის არის, რომ მინისტრს უნდა სცოდნოდა მომხდარი დანაშაულის შესახებ და თუ არ იცოდა, მან გამოიჩინა გულგრილობა. ეს ძალიან სახიფათო მიდგომაა, რადგან თუ შეიქმნა ასეთი პრეცედენტი, მომავალში შესაძლებელი იქნება ნებისმიერი მინისტრის, მოადგილის ან დეპარტამენტის უფროსის ციხეში გაშვება, მაგალითად, ამჟამინდელი სასჯელაღსრულების მინისტრის, იმ მკვლელობისათვის, რაც ბოლო თვეებში მოხდა ციხეებში. ამჟამინდელი თავდაცვის მინისტრის ჯარისკაცების თვითმკვლელობებისთვის და მოწამვლის ფაქტების გამო. ამ ლოგიკით, ეკონომიკის პრობლემებია პირდაპირი გზა ციხეში ეკონომიკის და ფინანსთა მინისტრებისთვის და მათი მოადგილეებისთვის. ეს ხომ აბსურდია. მაგრამ ასეთი აბსურდული პრეცედენტის შექმნა საბოლოოდ დაანგრევს ჩვენს ქვეყანას, რადგან ყველა ჩინოვნიკს ეცოდინება, რომ ასეთი შურისძიების დაწყების პრეცედენტი ნებისმიერ ახალ ხელისუფლებას თვალწინ ექნება.
მესამე, ყველა ადეკვატურ ადამიანს ესმის, რომ მინისტრებს ან მათ, ვინც იღებდა პოლიტიკურ გადაწყვეტილებებს, რომ სცოდნოდათ წამების ფატების შესახებ, რეაგირება იქნებოდა მომენტალური და ძალიან მკაცრი. არსებობს წითელი ხაზები, რომელსაც პოლიტიკოსი არ გადალახავს, არსებობს მორალი და ფასეულობები, არსებობს პოლიტიკური გათვლა ბოლოს და ბოლოს და არავინ დაუშვებდა ამას. ჩემი სასჯელაღსრულების მინისტრობის დროს, 10 თვის განმავლობაში, უამრავი შემოწმება ჩატარდა სახალხო დამცველის მიერ. მის დასკვნაში საუბარია გადატვირთულობაზე, პრობლემებზე ჯანდაცვასთან დაკავშირებით, მაგრამ არსად არის ნახსენები სისტემური დანაშაული. ამას გარდა, გაეროს წამების საწინააღმდეგო კომიტეტის მიერ ჩატარდა მონიტორინგი, რომელმაც არ დააფიქსირა სისტემური პრობლემები. წამების ფაქტები ჩადენილი იყო პატარა ჯგუფის მიერ, რომელიც, სამწუხაროდ, იყო სისტემაში და, რაც ბევრს რატომღაც ავიწყდება ახლა, აღმოჩენილი იყო ჩვენი ხელისუფლების მიერ სექტემბერში. ამ ხალხის ნაწილი, სამწუხაროდ, უკვე თავისუფალია.” _ წერს შაშკინი.
