მოკლული ბიზნესმენის დედა ლარისა ეფრემიძე აცხადებს, რომ პავლიაშვილის დის ქმარს ვახტანგ ჩხაპელიას მისი შვილის მოკვლის მიზეზი არ გქონდა: “ჩხაპელიაც ჭირისუფლებში ტრიალებდა, თან აქეთ-იქეთ რეკავდა, ისეთი კაცი მოგვიკლეს, საუკეთესო კატაფალკა გამოგვიგზავნეთო. ვახო ჩხაპელიას არ ჰქონდა ჩემი შვილი მკვლელობის მიზეზი, სხვამ გააკეთებინა. წინა ღამით მაკა პავლიაშვილმა ქმარი ციხეში გაუშვა და მეორე დილას მოსკოვში გაფრინდა. სად არის, რატომ დაგტოვა ცოლმა, რატომ არ გიდგას გვერდში? _ მიმართა მან ბრალდებულს, _ მე ვსვამ კითხვას _ ავთოს მკვლელობის შემდეგ რატომ წაიყვანა სოსო პავლიაშვილმა მშობლები და და მოსკოვში? მკვლელობის შემდეგ რატომ არ დამირეკა, არ მომისამძიმრა, თვითონ თუ ვერ ჩამოდიოდა შვილი რატომ არ გამოუშვა ნათლიის დაკრძალვაზე? ამ კითხვებზე გამცეს პასუხი,” _ ამბობს ლარისა ეფრემიძე.
მოკლულის დედა სოსო პავლიაშვილის მიერ მედიით გავრცელებულ განცხადებასაც შეეხო, სადაც ის ამბობს, რომ ავთო ადუაშვილს წლების განმავლობაში ფინანსურად ეხმარებოდა: “თუ მოვალე არ იყო, რატომ ჩუქნიდა ჩემს შვილს ფულს? ამ დროს კი, როგორც გუშინ პროცესზე გაირკვა, პავლიაშვილის დის ოჯახი სოციალურად დაუცველებში იყო და დახმარებას სახელმწიფოსგან იღებდა. სოსო არც ერთ მეგობარს არ დახმარებია, ვინც დასახმარებლად ურეკავდა, ყველას უარს ეუბნებოდა _ ფინანსებზე ნუ დამელაპარაკებითო.”
ლარისა ეფრემიძის თქმით, მისი შვილის მკვლელობა სოსო პავლიაშვილმა დაგეგმა და ამისთვის სიძე გამოიყენა; “სოსო პავლიაშვილმა გააუბედურა ვახო ჩხაპელია. სოსოს ფულებით მოკლეს ჩემი შვილი, იმიტომ, რომ ჩხაპელიას 50 ათასი დოლარი არ ჰქონდა. კიდევ ერთხელ ვამბობ _ სოსო პავლიაშვილს ჩემი შვილის ვალი ჰქონდა და რომ არ დაებრუნებინა, მაგიტომ მომიკლა. სოსომ ორი საქმე გააკეთა _ ვახო ჩხაპელიაც მოიცილა თავიდან და ავთო ადუაშვილიც.”
პროცესზე მოწმედ დაკითხულმა ბიზნესმენის ძმამ მევლუდ ადუაშვილმა განაცხადა, რომ მკვლელობის შესახებ მაკა პავლიაშვილმაც იცოდა: “ვერავინ დამაჯერებს, რომ მაკა პავლიაშვილმა არ იცოდა ავთოს მკვლელობის შესახებ. მაგ ოჯახში კაცი მაკა იყო და არა ვახო. მე მივაღწევ იმას, რომ მაკას თბილისში ჩამოვიყვან. რატომ წაიყვანა სოსომ მაკა რუსეთში? იმიტომ, რომ ეშინია მაკამ პირი არ მოაღოს და სოსოზე ყველაფერი არ თქვას.”
როგორც პროკურორი ნინო აღლემაშვილი ამბობს, მაკა პავლიაშვილი ბრალდების მოწმეთა სიაშია: “დიახ, მაკა პავლიაშვილი დასაკითხ მოწმეთა სიაშია. ის ამ საქმეზე დაკითხულია და, სხვათაშორის, გამოძიებას ძალიან მნიშვნელოვანი ინფორმაცია მისცა. ჩვენ ველით, რომ თუ ეს ადამიანი დაინტერესებულია სიმართლის გამორკვევით, გამოცხადდება სასამართლო პროცესზე და ჩვენებას მისცემს. რაც შეეხება თქვენს შეკითხვას მოწმის იძულებით წარმოდგენის შესახებ, როგორც კი გადავწყვეტთ, რომ მისი მოყვანა აუცილებელია სასამართლო პროცესზე, შემდგომში მოხდება მისი გამოძახება და თუ არ გამოცხადდა, ამის მერე იძულების ღონისძიებებს განვახორიციელებთ”.
ავთო ადუაშვილის მკვლელობის მოტივად პროკურატურა ბიზნესთან დაკავშირებულ დავას მიიჩნევს. მიუხედავად იმისა, რომ სოსო პავლიაშვილის წინააღმდეგ პირდაპირი მტკიცებულებები არ არის, პროკურატურა ამ მიმართულებით აქტიურად მუშაობს. უკვე მეორე დღეა, სასამართლო მოკლული ადუაშვილისა და სოსო პავლიაშვილის ბიზნესურთიერთობებს იკვლევს _ როდის დაიწყო მათი ბიზნესურთიერთობა, ეკუთვნოდა თუ არა მოკლულს ამ ბიზნესიდან წილი და რა თანხას უგზავნიდა პავლიაშვილი ყოველთვიურად.
მკვლელობის მოტივი რომ ფულია, ამას ადუაშვილების ოჯახიც ადასტურებს. მოკლული ბიზნესმენის ძმის მევლუდ ადუაშვილის თქმით, სოსოს და ავთოს მოსკოვში საერთო ბიზნესი ჰქონდათ. 2012 წლის 24 ნოემბერს ისინი ერევანში აპირებდნენ შეხვედრას და ბიზნესის გაყოფაზე საუბარს. მისი თქმით, ადუაშვილს სურდა, რომ ბოლოს და ბოლოს ბიზნესწილი ოფიციალურად გადაეფორმებინა. 23 ნოემბერს ადუაშვილი მოკლეს. მისი ოჯახი ფიქრობს, რომ სოსო პავლიაშვილმა ამით მისი ერევანში ჩასვლა აღკვეთა _ ადუაშვილმა ბიზნესის გადაფორმება ვერ მოასწრო.
დღევანდელ პროცესზე სოსო პავლიაშვილისა და ავთო ადუაშვილის საერთო მეგობარი დავით ნიჟარაძე დაიკითხა. მოწმემ დაადასტურა, რომ მოსკოვში მათ საერთო ბიზნესი ჰქონდათ. ნიჟარაძის თქმით, სოსო პავლიაშვილმა გარდაცვლილის კრედიტის გადახდა მას შემდეგ დაიწყო, რაც მისთვის ცნობილი გახდა რომ მკვლელობის საქმეზე მისი დის ქმარი დააპატიმრეს.
“ავთოს მკვლელობის შემდეგ ერევანში შევხვდი სოსოს. შეხვედრის ინიციატივა მისგან მოდიოდა. სოსოს სურდა ავთოს ოჯახისთვის გადამეცა, რომ ავთოსთვის რაღაც ფული ჰქონდა მიცემული. მე ვუთხარი, ოჯახი უმძიმეს დღეშია, ავთოს 180 ათასი კრედიტი დარჩა გადასახდელი. სოსო დაჯდა და დაიწყო თვლა, რა თანხა შეგროვდებოდა ავთოს მანქანების და სახლების გაყიდვით და დაიფარებოდა თუ არა ამით ვალი. ამ საუბრიდან ერთ კვირაში მისი დის ქმარი ვახტანგ ჩხაპელია დააკავეს. სოსომ მეორე დღესვე დამირეკა და მითხრა, რომ ის გადაიხდიდა ავთოს კრედიტს და მის შვილს _ გიორგისაც ბინას უყიდდა. სოსო მას შემდეგ ყოველთვე აგზავნიდა ფულს, საბანკო გაადმორიცხვაზე უარი თქვა და ხელზე ატანდა ერთ-ერთ პიროვნებას. მაისის თვეში მან ფულის გამოგზავნა შეწყვიტა.”.
მოწმის თქმით, ერთადერთი ადამიანი, ვისთანაც ავთო ადუაშვილს ბიზნესურთიერთობა ჰქონდა, რაც ბოლო დროს საგრძნობლად გაუარესდა , სოსო პავლიაშვილია. გავრცელებული ინფორმაციით, მეგობრებს შორის ურთიერთობის დაძაბვის მიზეზი სოსო პავლიაშვილის სიმამრია, რომელსაც მომღერლის ბიზნესში ასევე აქვს ინტერესი.
პროკურორი ნინო აღლემაშვილი მოწმის სახით სოსო პავლიაშვილის დაკითხვას არ გამორიცხავს: “დღეს მოვისმინეთ ახალი მტკიცებულებები. დღევანდელ დღემდე ეს ინფორმაცია ასე პირდაპირ არ იყო ცნობილი. აქედან გამომდინარე, არ არის გამორიცხული, რომ სხვა ღონისძიებებს მივმართოთ და დაიკითხონ ის ადამიანები, რომლებიც მოწმეების და დაზარალებულების ჩვენებებში გაჟღერდა. მათ შორის, შესაძლოა სოსო პავლიაშვილიც იყოს.”
მომღერალმა სოსო პავლიაშვილმა საქართველოს პროკურატურას მოსკოვში მის დასაკითხად გამომძიებლების გაგზავნა სთხოვა. მისი თქმით, ის მზადაა გამომძიებლების ტრანსპორტირების ხარჯები თავად აანაზღაუროს.
