წერილის დაწერის მთავარი მიზეზი კი სადაზღვევო კომპანია “არქიმედე გლობალს ჯორჯიაში” დროებითი, იძულებითი მმართველის დანიშვნა გახდა. ასეთი ღონისძიების გატარებას, საჭიროების შემთხვევაში, საქართველოს კანონმდებლობა ითვალისწინებს. არის თუ არა კანონის აღსრულება ინვესტორების შევიწრობა, როგორც ამას წერილის ავტორები აცხადებენ, ამის დადგენა “გურია ნიუსმა” “არქიმედეს” მოღვაწეობის კვალდაკვალ სცადა.
ჩვენი ინფორმაციით, ამ ეტაპზე, კომპანიის დავალიანება, რომელიც მას სხვადასხვა კლინიკების მიმართ აქვს, რამდენიმე მილიონს აჭარბებს. “არქიმედე” ბოლო სამი თვეა, მინუსებშია გადასული. მედიაციის სამსახურის ინფორმაციით კი, 191 სარჩელიდან 71 მარტო არქიმედეს წინააღმდეგ არის შესული. 71-დან კერძო პირია _ 6, სამედიცინო დაწესებულება კი – 65. საერთო ჯამში, სადავო თანხის ოდენობა 12 876 874 ლარს შეადგენს.
ჯანდაცვის მედიაციის სამსახურის უფროსი, გიული მარღიშვილი “გურია ნიუსთან” საუბრისას აცხადებს, რომ “არქიმედე გლობალს ჯორჯიასთან” დაკავშირებით “მორიგებით დასრულდა 32 საქმე, უარი ეთქვა 2 სუბიექტს და სასარჩელო წარმოება მიმდინარეობს 20 განცხადებაზე. სარჩელი გაიხმო 6-მა, რადგან შესრულდა ვალდებულებები.
იმ რეკომენდაციებზე, რაც მედიაციის სამსახურის მიერ იქნა გაცემული, შეუსრულებლობა არ ფიქსირდება, კომპანიის მხრიდან გონივრული გეგმა-გრაფიკი იქნა წარდგენილი”. _ აცხადებს გიული მარღიშვილი.
მიუხედავად კომპანიის მიერ წარდგენილი გეგმა-გრაფიკებისა, დაზღვევის ზედამხედველობის სამსახურმა “არქიმედეს” შემოწმების შემდეგ დაადგინა, რომ კომპანიის წინაშე არსებული ვალდებულებები კომპანიის რეზერვს აჭარბებდა და დადებითი ბალანსის მიღებამდე კომპანიას დროებითი მმართველი ეყოლება.
მედიაციის სამსახური არ ასახელებს იმ კლინიკებს, რომელთა დავალიანებაც “არქიმედეს” აქვს, თუმცა განმარტავენ, რომ საუბარია თითქმის ყველა კლინიკაზე, რომელიც თბილისშია.
“სადაზღვევო კომპანიებმა ეროვნულ ბანკს, როგორც ზედამხედველს მარტის თვის ფორმა ჩააბარეს და ამის შემდეგ, 6 თვის შედეგები ჩავიბარეთ ჩვენ, როგორც ახალმა, დამოუკიდებელმა სამსახურმა. ეს შედეგები რომ ჩავიბარეთ, აღმოჩნდა რომ “არქიმედეს” ძალიან მნიშვნელოვანი ფინანსური პარამეტრები ჰქონდა დარღვეული.
ვინაიდან არქიმედე მონაწილეობს სახელმწიფო პროექტში, რაც შეადგენს მისი კომპანიის მოცულობის 95%-ს და ძალიან მნიშვნელოვანია ეს სახელმწიფოსთვის, ამის შესახებ ვაცნობეთ მის ფინანსურ მენეჯმენტს და ბატონ სერგეენკოს, როგორც უწყებათაშორისი კომისიის თავმჯდომარეს. განვაცხადეთ, რომ ასეთი საშიშროება არსებობს, რომელიც პირდაპირ ეხება სახელმწიფო პროექტს.” _ აცხადებს “გურია ნიუსთან” საუბრისას დაზღვევის ზედამხედველობის სამსახურის ხელმძღვანელი ლაშა ნიკოლაძე.
მისი თქმით, ზედამხედველობის სამსახურმა კომპანიის ფინანსურ მენეჯმენტს მოსთხოვა, წარედგინათ რეაბილიტაციის გეგმა და მათი ხედვა. აღნიშნული წერილით “არქიმედეს” 2013 წლის 7 აგვისტოს მიმართეს. ახალი საინვესტიციო გეგმის წარდგენის ვადად კომპანიას 5 სამუშაო დღე განესაზღვრა.
ლაშა ნიკოლაძე: ” ამაზე მივიღე მეტად საინტერესო პასუხი: შარშანდელი ჩვენი სტატისტიკა ამ დროისთვის დადებითი იყო და გვადროვეთ, რადგან შარშანდელი სტატისტიკის ვარაუდით, რამდენიმე თვეში დავბალანსდებით და მინუსიდან გადავალთ პლიუსშიო.
უკაცრავად, მაგრამ საინვესტიციო გეგმა, ასეთ მოსაზრებებს, _ “დამაცადე და რამეს ვიზამ”, არ ითვალისწინებს. განსაზღვრული უნდა იყოს ზუსტი ვადა და ზუსტი გეგმა. ჩვენთვის მყარი გარანტია იქნებოდა, თუ მოგვწერდნენ, რომ მათ აცნობეს თავიანთ ინვესტორს და აკეთებდნენ თანხების აკუმულირებას. პირობითად რომ ვთქვათ, უნდა მოეწერათ, რომ დავალიანება 1 სექტემბრისთვის, ან 20 სექტემბრისთვის იქნებოდა აღმოფხვრილი. შარშანდელ სტატისტიკას როგორ უნდა ვენდოთ? ყველაფერს რომ თავისი სახელი დავარქვათ, მათ სახელმწიფოს ეს პროგრამა შარშან არ ჰქონდათ, მოგეხსენებათ, სექტემბრიდან შევიდა ძალაში.”
“არქიმედეს” საპასუხო წერილი, რომლის მიხედვითაც მთავარ გამოსავლად წინა წლის სტატისტიკა მოჰყავდათ, დაზღვევის ზედამხედველობამ დამაჯერებელ არგუმენტად არ მიიჩნია და 19 აგვისტოს კომპანიაში იძულებითი ზედამხედველი შეუშვა.
ლაშა ნიკოლაძე: “რატომ მაინცდამაინც 19 აგვისტოს? მოგეხსენებათ, რომ თანხები სოციალური სააგენტოდან ირიცხება 20 რიცხვში. თანხა რომ წასულიყო და განაწილებულიყო, შემდეგ 20 რიცხვამდე გასაკეთებელი აღარაფერი იქნებოდა და მე ამას არავინ მაპატიებდა. მეტყოდნენ, რას ელოდებოდიო? უკაცრავად, მაგრამ სახელმწიფო არ დაუშვებს იმას, რომ ასეთ კომპანიას კიდევ ფული ურიცხოს. თან მათი შემოსავლის 95%-ს შეადგენს ის, რასაც სახელმწიფო აძლევს.
იძულებითი მმართველი დავნიშნეთ არა იმიტომ, რომ კომპანია გააკოტროს, არამედ გამოასწოროს იქ მდგომარეობა, თუ ეს შესაძლებელია. მისი ფუნქციაა გადახედოს ყველა დანახარჯს, შეამციროს ადმინისტრაციული ხარჯები და მაქსიმალურად შეამციროს კომპანიის დავალიანება. მაგრამ რამდენად საკმარისი იქნება ეს გარე ინვესტიციის გარეშე, ამას უახლოესი ერთი კვირა გვაჩვენებს. დასაბალანსებელია საკმაოდ სერიოზული თანხა. თუ სიტუაცია გამოსწორდება, მეორე დღესვე გამოვა იძულებითი ადმინისტრატორი.
გარდა ამისა, ამავე დროს, 19 აგვისტოსვე შევუშვით ჩვენი ფინანსური შემოწმებაც, რომ რეალური სურათი დაგვედო ამ ყველაფრის შესახებ.
20 აგვისტოს ამის შესახებ ვაცნობე უწყებათაშორისი კომისიის თავმჯდომარეს, ბატონ დავით სერგეენკოს.”
მიუხედავად იმისა, რომ “გურია ნიუსი” არაერთხელ დაუკავშირდა “არქიმედე გლობალს ჯორჯიას” დირექტორის მოადგილეს ნათია კახეთელიძეს, მან კომენტარის გაკეთებისგან თავი შეიკავა. პასუხი ვერ მივიღეთ ვერც იმ კითხვაზე, რომ კლინიკების მხრიდან ათეულობით სარჩელია შესული მედიაციის სამსახურში “არქიმედეს” წინააღმდეგ.
ნათია კახეთელიძე უარყოფითი რეზერვის მაჩვენებელს არ ასახელებს. მისივე განმარტებით, ზედამხედველობის სამსახურს შეეძლო პირველ ეტაპზე გაფრთხილებით შემოფარგლულიყო. თუმცა მარეგულირებელმა უპირატესობა დროებითი მმართველის დანიშვნას მიანიჭა.
ამ საკითხთან დაკავშირებით, რადიკალურად განსხვავებული მოსაზრება აქვს ლაშა ნიკოლაძეს
“მთელი კამპანია დაიწყო იმაზე, რომ საქართველოში ებრაულ ინვესტიციას ებრძვიან. “არქიმედეს” დამფუძნებელი არის არქიმედეს გლობალი, რომელიც რეგისტრირებულია კიპროსზე, ჩვეულებრივი ოფშორული კომპანიაა, მაგრამ როგორც ისინი ამბობენ, ეს არის ებრაული კომპანია და კი ბატონო, იყოს, არავინ უშლის, ვისაც სად უნდა, იქ დრეგისტრირდება.
მათი პრეტენზია გამოიხატა იმაში, ჩემი ინვესტორი რატომ არ გააფრთხილეო. უკაცრავად და, რატომ უნდა გავაფრთხილო მე ინვესტორი? ისინი თვითონ ვერ ხედავდნენ თვეების განმავლობაში რა ხდებოდა მათ კომპანიაში? გავაფრთხილე და რაც მომწერეს, უკვე გითხარით.
ვინც არ უნდა იყოს ამ კომპანიის დამფუძნებელი, ჩემი საკუთარი დედ-მამაც კი, რეგულატორი ხედავს რა პრობლემას ჰორიზონტალურ ჭრილში, უნდა მოახდინოს რეაგირება! ჩემი ქმედება სხვანაირი რომ ყოფილიყო, აი ეს იქნებოდა საეჭვო. ჩემი ვალდებულება არ არის ვეძებო სად და რომელ კუნძულზე ისვენებს ესა თუ ის ინვესტორი. მე უნდა შევასრულო ჩემი ვალდებულება.” _ აცხადებს ლაშა ნიკოლაძე “გურია ნიუსთან”.
ებრაელი ინვესტორების წერილი თუ კანონის აღსრულება? _ საინტერესოა, რა პასუხს გასცემს პრემიერ-მინისტრი წერილის ავტორებს.
“არქიმედეში” აცხადებენ, რომ აქციონერები საქმის კურსში არიან და დეტალურ კომენტარებს ხვალ გააკეთებენ…
