რომელიც დღეს, “დემოკრატიული მოძრაობის” კრწანისის ორგანიზაციის საზოგადოებასთან ურთიერთობის, პიარის, შეხვედრების ჯგუფისა და ახალგაზრდული ჯგუფის ხელმძღვანელია.
გიორგი მიქელაშვილი აცხადებს, რომ კოალიცია “ქართული ოცნების” კრწანისის რაიონის მაჟორიტარი კანდიდატის ყველა შეხვედრა და პიარი მისი გაკეთებულია: _ მაგრამ, მოხდა ისე, რომ ხალხთან ბოდიშის მოხდა გვიწევს. ოქტომბრის არჩევნების შემდეგ, არანაირი ყურადღება არ ექცევა ხალხს და საერთოდ არაფერი შეცვლილა. მე არ დამიტოვებია “ქართული ოცნება” _ “ქართულმა ოცნებამ” დატოვა “ქართული” და მე დავრჩი “ქართულთან”. კრწანისის რაიონს ჰყავდა კოალიცია, რომელსაც ჰქონდა ახალგაზრდების კვოტა, რომელიც ახლა ჩვენთან შეგიძლიათ იხილოთ. ძველი გუნდიდან ერთ ახალგაზრდაც არ დარჩენილა.
_ თქვენ კარგად იცნობთ კოალიცია “ქართული ოცნების” შიდა სამზარეულოს. რა ხდება კოალიციაში?
_ მარტო კრწანისის რაიონის მაგალითზე შემიძლია ვთქვა, რომ ყვარყვარიზმია. რამდენიმე კარიერისტი “ნაციონალური მოძრაობიდან” გადმოვიდა და “ოცნების” შტაბს ხელმძღვანელობს, “ოცნების” ის გუნდი, რომელიც იბრძოდა, გარიყული ჰყავთ.
_ ნინო ბურჯანაძის გუნდში წასვლის შემდეგ, კრწანისის მაჟორიტარი დეპუტატი ხომ არ დაგკავშირებიათ და პრეტენზია ხომ არ გამოუთქვამს?
_ ახალ წლამდე, კრწანისის მაჟორიტარი დეპუტატი ჩემთვის ოჯახის წევრივით იყო. ჩვენ, არჩევნებამდე ექვსი თვის განმავლობაში და მას შემდეგ, ძალიან ბევრი რამე გავაკეთეთ. მაგრამ შემდეგ ისეთი რამ მოხდა, აუცილებლად უნდა ვთქვა _ ოფისში 9 შვილის დედა მოვიდა, რომელიც სახლიდან გამოაგდეს და 1 თვით თავშესაფარს ითხოვდა. ამ ქალს ოფისში დასცინეს, უთხრეს, ამდენ ბავშვს რომ აჩენდი, მაშინ გეფიქრა ამ თემაზეო. ეს მოხდა 19 იანვარს და მე დავტოვე ოფისი თავისი “ოცნებით” და კოალიციით. ამის შემდეგ, ხაბარელი, რა თქმა უნდა, ვერ დამიკავშირდებოდა _ თავისი საქმე აქვს ვაკეში. წარმატებებს ვუსურვებ.
_ როგორ ფიქრობთ, არ გაგიჭირდებათ ნინო ბურჯანაძესთან მუშაობა?
_ პირველ რიგში, ნინო ბურჯანაძე არის პოლიტიკოსი და არა ისეთი _ სპორტულ დარბაზს რომ ჰგავს პარლამენტი. დარწმუნებული ვარ, ბურჯანაძესთან ასეთ რამ არ მოხდება. სხვათაშორის, კოალიციის გამარჯვებამდე, მართალია, არაოფიციალურად მაგრამ მაინც, ბურჯანაძის ხალხი ყველა ჩვენთან იყო. საკუთარი რესურსით გვეხმარებოდნენ, ყველა “ოცნებაზე” მუშაობდა, რაც მათ არ დაუფასდათ.
_ რას ეტყვით იმათ, ვინც რჩება კოალიციაში?
_ თავმოყვარეობის საკითხია _ ამაზე კომენტარს არ გავაკეთებ. ჩემი აზრით, ახლა კოალიციაში ყოფნა ისეთივე სირცხვილია, როგორიც იყო ოქტომბრამდე ნაცმოძრაობაში ყოფნა.
_ იცის თუ არა პრემიერ-მინისტრმა ბიძინა ივანიშვილმა იმის შესახებ, რაც კოალიციაში ხდება?
_ ის, რომ ბიძინამ არ იცის, ესეც პოლიტიკური პიარია. ბიძინა აშკარად არ არის სულელი. რა თქმა უნდა, ყველაფერი იცის. ეს ადამიანი თავიდანვე რომ მოვიდა, განაცხადა, რომ წელიწადნახევარში წავალო. უკვე არის წელიწადნახევარი ახალი წლისთვის წავა პოლიტიკიდან.
_ თქვენ თუ შეგხვდათ ნინო ბურჯანაძე?
_ არა, ქალბატონ ნინოს არ შევხვედრივარ. შეხვედრა მქონდა შტაბის ხელმძღვანელთან. ვემზადებით შტაბის პრეზენტაციისთვის, რომელიც სექტემბრის შუა რიცხვებშია დაგეგმილი. გავაცნობთ კრწანისის რესურსს. რა თქმა უნდა, ბურჯანაძეს ჰყავდა თავისი რესურსი. ისე არ არის, თითქოს “ოცნების” ხარჯზე შეიქმნა ეს რესურსი. უბრალოდ, რაც რესურსი ჰყავდა “ოცნებას”, ისიც ნინო ბურჯანაძის მხარდამჭერი იქნება, რადგან, მის პოლიტიკას იზიარებენ.
რამდენიმე დღის წინ, კოალიცია “ქართული ოცნების” კრწანისი რაიონის ორგანიზაციის ოფიციალური გახსნა იყო, სადაც, კრწანისელებს “ოცნება” წარუდგენდა თავის საპრეზიდენტო კანდიდატს, გიორგი მარგველაშვილს. შეხვედრაზე 8 ადამიანი გამოცხადდა. შემიძლია გითხრათ, რომ ამ 8 ადამიანში შედიოდნენ შტაბის თანამშრომლები ახალგაზრდული ორგანიზაციიდან. როდესაც ეს ნახეს, განაცხადეს, რომ ორი შეხვედრის დამთხვევა მოხდა. ასეთი რამ ბავშვებს არ მოუვათ _ პრეზენტაცია გქონდეს ოფისში და შენ, პრეზიდენტობის კანდიდატი, აღმოჩნდე კახეთში?!
_ გაქვთ თუ არა გამარჯვების იმედი? კრწანისელებმა შარშან “ქართულ ოცნება” აირჩეს.
_ აირჩიეს, არა! მათ ხმა მისცეს “ნაციონალების” წასვლას, რომელიც აშკარად არ მომხდარა.
_ თქვენ ფიქრობთ, რომ ხელისუფლებას ისევ “ნაციონალები” მართავენ?
_ ახლა კოალიციის დაშლის ნიშნებია. ამას ძალიან მალე გავიგებთ. ამ შემთხვევაში, “ნაციონალები” პარლამენტში უმრავლესობით ბრუნდებიან. თუ პარლამენტი არ დაიშალა, არ დაინიშნა ვადამდელი საპარლამენტო არჩევნები, ახალი წლიდან უმრავლესობაში “ნაციონალები” იქნებიან და გვეყოლება ერთ-ერთ ლამაზი ფრაქცია _ “ლამაზი ოცნება”. რასაც ვებრძოდით, ყველაფერი ისევ ისე დარჩა. გვრცხვენია მოსახლეობასთან ურთიერთობის. ამ უბნებში ეს ჩვენი ერთგვარი თვითრეაბილიტაცია იქნება, რათა მოსახლეობას არ დარჩეს შთაბეჭდილება, რომ დაგვავიწყდა მათი პრობლემები. ხალხი ისევ უსამართლობას ებრძვის, რომელიც დღემდე გრძელდება. კრწანისელებმა კარგად იციან, რომ მე მათთვის ბიუროშიც ვიბრძოდი და კოალიციის გარეთაც.
მე ბოდიშის მოხდა შემიძლია. კრწანისელებს ბოდიში მოვუხადე, რადგან მათ სულ სხვა რამეს ვპირდებოდი. სამწუხაროდ, მოვატყუე.
_ მარგველაშვილთან შეხვედრაზე ხომ მოვიდა “ქართული ოცნების” ახალგაზრდული ფრთა?
_ სხვათაშორის, კუს ტბაზე გამართულ შეხვედრაზე მეც შემომეხმიანენ. არანაირი მარგველაშვილის ხსენება არ ყოფილა. ბავშვებსაც უთხრეს, ვინც ვიბრძოდით ახალგაზრდები, იმათი “ივენთი” გვექნებაო. იქ, შემთხვევით, სპორტსმენი მარგველაშვილი ძაღლით მივიდა. მივმართავ რამიშვილს, მის პიარისტს _ ძალიან არ უნდა გადააკეთო ადამიანი. შემდეგ, გააჟღერეს, თითქოს მარგველაშვილის მხარდამჭერ საღამოზე მივიდნენ. ისინი მოატყუეს, მათ იცოდნენ, რომ ეს იყო ბავშვების “ივენთი”.
ამ ტყუილის გამო, იმ დღეს მარგველაშვილს, მინიმუმ, ორს რომ რამდენიმე ნული დაუმატოთ, იმდენი მხარდამჭერი გამოაკლდა! _ ამბობს მიქელაშვილი.
