ექიმ-ნარკოლოგმა ნუკრი ნადარაიამ განაცხადა, რომ მკვლელობაში ბრალდებული კობა ყურუას შარდში მეთადონის, მარიხუანას და ოპიუმის კვალი აღმოჩნდა. აღსანიშნავია, რომ ყურუას განზრახ მკვლელობის გარდა, ბრალი ნარკოტიკის უკანონო შეძენა-შენახვაშიც ედება. გამოძიების მასალებით, ავთო ადუაშვილის მკვლელობის შემდეგ ყურუა თურქეთში გაემგზავრა, სადაც ჰეროინი შეიძინა.
ბრალდებული ირწმუნება, რომ ნარკოტიკი გამომძიებელმა დავით გაბუნიამ ჩაუდო: “მე მეთადონის პროგრამაში ვარ. 120 გრამს ვსვამ და ჰეროინი რაღად მინდოდა? ჰეროინის დამატება ეფექტს ამცირებს. ნარკოტიკი მხოლოდ საბაბი იყო. როგორც კი დამაკავეს მაშინვე ავთო ადუაშვილის მკვლელობასთან დაკავშირებით დამიწყეს გამოკითხვა,” _ განაცხადა ყურუამ პროცესზე.
კობა ყურუა, რომელიც გელა უბილავასთან ერთად გამოძიების მიერ მკვლელობის უშუალო შემსრულებლდ სახელდება, ირწმუნება, რომ უდანაშაულოა: “მოსკოვში სახლი მაქვს, მანქანა მყავს, ყვავილების საბითუმო მაღაზია აქვს ჩემს ცოლს, ფოთში სახლი მაქვს და მანქანა. 16 ათასს, რაც თითქოს ადუაშვილის მკვლელობაში ავიღე, სამ დღეში ვშოულობდი ყვავილებით. გარდა ამისა, თუ კაცი მყავდა მოკლული დ თურქეთში გავიქეცი, უკან რატომ დავბრუნდი? შვილი მე არ მყავდა აქ, რომ მომნატრებოდა”.
მკვლელობასთან კავშირს დანარჩენი ორი ბრალდებულიც უარყოფს, მათ შორის მომღერალ სოსო პავლიაშვილის დის ქმარიც ვახტანგ ჩხაპელიაც, რომელსაც პროკურატურა მკვლელობის დამკვეთად მიიჩნევს
გუშინდელ სასამართლო პროცესზე სასამართლო-სამედიცინო ექსპერტი დაიკითხა, რომელმაც მოკლული ბიზნესმენის გვამი გამოიკვლია. გვამს 9 ჭრილობა აღენიშნებოდა, 7 ცეცხლსასროლი იარაღით მიყენებული, ორი კი ნაკვეთ-ნაჩხვლეტი, რაც მსხვერპლს, სავარაუდოდ, დანით მიაყენეს. მიღებული დაზიანებების შედეგად ადუაშვილს მწვავე სისხლნაკლებობა განუვითარდა, რაც მისი სისკვდილის მიზეზად არის მიჩნეული.
პროკურორი ნინო აღლემაშვილის თქმით, ექსპერტთა დაკითხვით უტყუარად დადგინდა, რომ კობა ყურუას დაკავების დროს მოხმარებული ჰქონდა ჰეროინი, ასევე უტყუარად არის დადგენილი, რომ ყურუა და ვლადიმერ ქარჩავა მკვლელობის მეორე დღეს გადავიდნენ თურქეთში, სადაც რამდენიმე დღეში მათ მურთაზ გერგაია შეუერთდათ.
“რაც შეეხება სოსო პავლიაშვილს, ამ კონკრეტული საქმიდან ცალკე წარმოებადაა გამოყოფილი სისხლის სამართლის საქმე. თუკი იმ სისხლის სამართლის საქმის პროკურორი მიიჩნევს აუცილებად, რომ დაიკითხოს სოსო პავლიაშვილი, ამის შესახებ ოფიციალურ განცხადებას გააკეთებს პროკურატურა,” _ ამბობს პროკურორი “გურია ნიუსთან.”
ნინო აღლემაშვილი, ასევე, არ გამორიცხავს, რომ ამ სასამართლო პროცესზე გავრცელებული ინფორმაცია სოსო პავლიაშვილის დაკითხვის საბაბად იქცეს: “რა თქმა უნდა, შესაძლებელია აღნიშნულ სასამართლო პროცესზე გავრცელებული ინფორმაციით საჭირო და აუცილებელი გახდეს სოსო პავლიაშვილის დაკითხვა”.
გუშინდელ სასამართლო სხდომაზე მოსამართლემ პროცესის ვიდეოგადაღება აკრძალა. ეკა არეშიძის თქმით გუშინ “რუსთავი 2”-ის საინფორმაციო გამოშვება “კურიერში” ნაფიცი მსაჯულების სახეები გამოჩნდა, რაც მათ უსაფრთხოებას კითხვის ნიშნის ქვეშ აყენებს. მომხდარის გამო გადაღება აეკრძალა არა მხოლოდ საზოგადოებრივ მაუწყებელს, რომელიც პასუხისმგებელი იყო სხვა ტელეკომპანიებისთვის ჩანაწერის გადაცემაზე, არამედ ყველა ტელევიზიას.
ბრალდებულთა ადვოკატები მიიჩნევენ რომ “რუსთავი 2”-მა განზრახ დაუშვა შეცდომა, რადგან პროკურატურას არ სურს, საზოგადოებამ დაცვის მხარის პოზიცია გაიგოს და მოუსმინოს ბრალდებულებს, რომელბიც, მათი თქმით, უდანაშაულოები არიან.
“რუსთავი 2”-ს აქვს პროცესების გაშუქების გამოცდილება. გუშინდლამდე რამდენიმე სიუჟეტი გაკეთდა, მაგრამ არც ერთ პროცესზე არ გამოჩენილა არც ერთი ნაფიცი მსაჯულის სახე. თუკი იყო საფუძველი “პირველი არხის” და “რუსთავი 2”-ის გამოძევების, რა დააშავა “მაესტრომ” და “იმედმა”, რომ მათაც აეკრძალათ გადაღება? ეს ემსახურება ერთადერთ მიზანს, რომ არ გაშუქდეს დაცვის მხარის პოზიცია, საზოგადოებამ არ მოუსმინოს ბრალდებულებს, რომლებიც თავს უდანაშაულოდ მიიჩნევენ. ჩვენ გვაქვს სურვილი, რომ პროცესზე დაუშვან კამერა,” _ ამბობს გელა უბილავას ადვოკატი დათუნა მოდებაძე.
