(გურია ნიუსი, ჩოხატაური) _ ჩოხატაურის სამუზეუმო გართიანებამ, მუზეუმების საერთაშორისო დღესთან დაკავშირებით, მოაწყო კვირეული. კვირეულის პირველ დღეს ჩოხატაურის მუზეუმმა ღვთისმშობლის სახელობის სამრევლო სკოლის მოსწავლეებს უმასპინძლა. დირექტორმა ნათია კალანდაძემ ისაუბრა მუზეუმების დაარსების შესახებ, მიმოიხილა მუზეუმის მიერ ჩატარებული ექსპედიციები. ისაუბრა იმ მეცნიერების ღვაწლზე, რომლებმაც მნიშვნელოვანი წვლილი შეიტანეს ჩოხატაურის მუზეუმის ექსპოზიციებით გამდიდრებაში.
შემდეგ ნაჩვენები იქნა ნოდარ დუმბაძის ამავე სახელწოდების მოთხრობის მიხედვით გადაღებული მოკლემეტრაჟიანი ფილმი “სისხლი” (რეჟისორი ირინა პროვილო), რომელშიც ნოდარის როლს სამრევლო სკოლის მე-8 კლასის მოსწავლე გეგე ჩიგოგიძე ასრულებს. ფილმის ჩვენების შემდეგ, გეგემ მოსწავლეების კითხვებს უპასუხა.
შემდეგ დღეებში ნაჩვენები იქნა ფილმი “სამი საქართველო”, რომლებიც ტაო-კლარჯეთში, ფერეიდანში და საინგილოში მცხოვრები ქართველების ყოფა-ცხოვრებას ასახავს; მუზეუმმა ანა კალანდაძის პოეზიის საღამოზე მოიწვია დაბლაციხის საჯარო სკოლა; შუა ფარცხმის სკოლის მოსწავლეებმა კი ნიკო მარის სახლ-მუზეუმში ნახეს დოკუმენტური ფილმი, რომელიც დიდი მეცნიერის ნიკო მარის მოღვაწეობას ასახავს. მის მეცნიერულ მიღწევებზე მოსწავლეებს ესაუბრა ნიკო მარის მუზეუმის დირექტორი ალექსანდრა მარი.
კვირეული დაიხურა ნ. დუმბაძის სახლ-მუზეუმის თანამშრომლის, ვაჟა დუმბაძის ნამუშევრების გამოფენით (ხეზე კვეთა), რომელიც ჩოხატაურის მუზეუმში მოეწყო და მნახველთა დიდი მოწონება დაიმსახურა.
