რამდენიმე წუთში, ქუთაისში პარლამენტთან პატიმრების მშობლები და უფლებადამცველები აქციას გამართავენ. როგორც “გურია ნიუსს” აქციის ორგანიზატორმა, “პატიმართა და მათი ოჯახების დახმარების ფონდის” თავმჯდომარემ, ადვოკატმა სალომე აბულაძემ განუცხადა, “აქციის მიზანია, შევახსენოთ კანონმდებლებს, რომ როცა ამნისტიის კანონპროექტზე იმუშავეს და შემდეგ კანონის სახე მისცეს, 262-ე მუხლთან დაკავშირებით, სპეციალურად შეიქმნა კანონში მუხლი, რომელიც მთლიანად იქნებოდა ამნისტირებული; ეს ეხება 260-ე და 262 მუხლის ერთობლიობას, თუმცა, სასამართლო პრაქტიკა აბსოლუტურად სხვანაირად დაინერგა და 1/4 შეეხო მამაკაცებს, 1/3 _ ქალებს. ეს იყო პირდაპირი და უხეში ტყუილი. ამის გამო კანონმდებლებმა ბოდიშიც კი მოიხადეს _ ჩვენ ისე მივიღეთ, მაგრამ, პრაქტიკაში ასე დაინერგაო. ამ ტყუილმა თუ შეცდომამ, პატიმრებში ძალიან დიდი აგრესია გამოიწვია, რომელიც დღემდე გროვდება და ამჯერად პროტესტის უკიდურეს ფორმას _ შიმშილობას იწყებენ.
გეგუთის ციხის პატიმრებმა განცხადებით მომმართეს, რომელსაც დაახლოებით 300-მდე პატიმარი აწერს ხელს. თუ არ იქნება კონკრეტული რეაგირება უახლოეს პერიოდში, ისინი იწყებენ უვადო შიმშილობას. გუშინ, სად-ის № 5 დაწესებულების მსჯავრდებულ ქალებსაც ვესაუბრე, დაწერილი აქვთ განცხადება, სადაც ანალოგიურ პროტესტს გამოთქვამენ. მე მელოდებიან, როდის გამოვიტან განცხადებას. როდესაც მსჯავრდებული მამაკაცები დაიწყებენ შიმშილს, ამ საპროტესტო აქციას მსჯავრდებული ქალებიც შეუერთდებიან,” _ განაცხადა აბულაძემ.
“გურია ნიუსი” სასჯელაღსრულების, პრობაციისა და იურიდიული დახმარების საკითხთა სამინისტროს საზოგადოებასთან ურთიერთობის სამმართველოს უფროსს ირაკლი კორძაიას დაუკავშირდა. “ამ თემასთანა ჩვენი სამინისტრო არაფერ შუაშია. მესმის, პატიმრები უჩიოდნენ ცუდ პირობებს. ჩვენ არ მიგვიღია ეს კანონი, პარლამენტმა მიიღო. უწყების კომპეტენციაში ამ საკითხის გადაჭრა არ შედის და იგი მთლიანად პარლამენტის შესაბამისი კომიტეტის პრეროგატივაა. დაურეკეთ ეკა ბესელიას. სამინისტრო ამასთან დაკავშირებით, არანაირ კომენტარს არ გააკეთებს,” _ ამბობს კორძაია.
ჩვენ ვეცდებით პარლამენტარ ეკა ბესელიას დავუკავშირდეთ და მისი კომენტარი შემოგთავაზოთ.
