“საქართველოს ბანკი” ნინო ბურჯანაძეს პასუხობს

_ 9 მილიარდია დღეს საქართველოდან გატანილი “ნაციონალური მოძრაობის” მხრიდან. პირდაპირ შემიძლია გითხრათ, რომ ზურაბ ადეიშვილი, რომელიც ზის ბუდაპეშტში, ახორციელებს სერიოზული ფულის მიმოქცევას. ამ ფულის მიმოქცევის გასათეთრებლად “საქართველოს ბანკმა”, რომელსაც არ გაუხსნია ფილიალი ბერლინში, ლონდონში, პარიზში, გახსნა ფილიალი ბუდაპეშტში, სადაც ცხოვრობს ალბათ, სულ 15 ქართველი. მათ შორის ერთი ზურაბ ადეიშვილი და ატრიალებს იმ მილიარდებს ობშორულ ზონებში, რომელიც აქედან არის წაღებული, _ განაცხადა ბურჯანაძემ.

ბურჯანაძის ამ განცხადებას “საქართველოს ბანკი” გამოეხმაურა:

_ უპირველეს ყოვლისა ავღნიშნავთ, რომ საქართველოს ბანკმა, ბუდაპეშტში წარმომადგენლობა გახსნა 2012 წლის საპარლამენტო არჩევნებამდე. ინფორმაციისთვის გეტყვით, რომ საქართველოს ბანკმა საზღვარგარეთ წარმომადგენლობების გახსნა ჯერ კიდევ 2008 წელს დაიწყო და მას მერე რამდენიმე ქვეყანაში გახსნა. არცერთი ასეთი წარმომადგენლობა, მათ შორის არც ბუდაპეშტში არსებული, არ ახორციელებს საბანკო ოპერაციებს. ამ წარმომადგენლობის საქმიანობა შემოიფარგლება მხოლოდ უცხოელ, პოტენციური მომხმარებლებთან გასაუბრებით, რათა შემდგომ მათ შესთავაზონ საქართველოში, საბანკო პროდუქტებით და სერვისებით სარგებლობა, _ აღნიშნავენ “საქართველოს ბანკში”.