_ ეს შეხვედრა თურქეთის საელჩოს თხოვნით შედგა. მე არ ვაპირებდი შეხვედრას, ყველაფერი ნათელია. _ უთხრა მინისტრმა, თურქ მეპატრონეს შეხვედრაზე.
დავით სერგეენკო: “თქვენ თვითონ თქვენი საქციელით საფრთხის ქვეშ დააყენეთ ამ უმნიშვნელოვანესი ინფრასტრუქტურის მუშაობა. ჩვენ არ დავუშვებთ ამას და პასუხისმგებლობას ვიღებთ აღნიშნულ სამედიცინო დაწესებულებაში სერვისები განხორციელდეს უწყვეტად. სამუშაო და სამკურნალო პროცესი იყოს დალაგებული და არა ისეთი კრაზანების ბუდე, რომლითაც თქვენ გადააქციეთ ეს საავადმყოფო ამ ერთი კვირის განმავლობაში.”
მინისტრმა ასევე უსაყვედურა იაშვილის კლინიკის თურქული კომპანიის “უნივერსალ ჰოსპიტალ გრუპის” წარმომადგენელს და განუცხადა: “პირველ რიგში, არსებული სიტუაცია არავითარ შემთხვევაში არ უნდა იყოს განხილული საქართველოსა და თურქეთის ურთიერთობების ჭრილში ისევე, როგორც ეს ურთიერთობა არ უნდა იყოს განხილული იმ კომპანიის ურთიერთობაში, რომელსაც ეს ბატონი წარმოადგენს. ჩვენ საქმე გვაქვს ამ კონკრეტულ ადამიანთან, რომელმაც მოახერხა და რამდენიმე დღის განმავლობაში დაიმსახურა მედპერსონალის ასი პროცენტის იმდენად მაღალი პროტესტი, რომ საფრთხე შეუქმნა არსებულ დაწესებულებაში სამედიცინო სერვისების მიწოდებას. ჩვენთვის ნაკლებად მნიშვნელოვანია, თქვენ რას ეთანხმებით და რას არ ეთანხმებით, ჩვენ დავინახეთ ის, რაც დავინახეთ. მთელი საავადმყოფო ეზოში იყო გამოსული და სამედიცინო პროცესი იყო პარალიზებული. თქვენ რა ჩაიდინეთ და რა არ ჩაიდინეთ, ამას მონიტორინგის ჯგუფი მოიკვლევს დეტალებში. თუმცა, რა შედეგიც მივიღეთ, ჩვენთვის ეს ცალსახად მიუღებელია. ჩვენ ვერანაირ შორეულ თანამშრომლობაზე ვერ ვისაუბრებთ, რადგან კიდევ ერთხელ ვიმეორებ არ ვიცი როგორ, მაგრამ თქვენ რამდენიმე დღეში მოახერხეთ გადაიმტერეთ და პარალიზება მოახერხეთ მთელი სამედიცინო დაწესებულების.” – განაცხადა სერგეენკომ.
მინისტრმა შეხვედრაზე იაშვილის კლინიკის ამჟამინდელ მფლობელს მოsთხოვა ოფიაციალური დოკუმენტაცია, რომ იგი ნამდვილად წარმოადგენდა თურქულ კომპანიას, თუმცა თექინ ატეკმა მინისტრს გამოუცხადა, რომ ასეთი წარმომადგენლობის დოკუმენტაცია ჯერჯერობით მას არ გააჩნია, მინდობილობა გზაშია და შეიძლება უკვე სასტუმროშიც კი იყოს მოტანილიც.
