კოხნარის, ბუკნარის, ჩაისუბნის, გუთურის, ნაბეღლავის ყოფილი რწმუნებულები და მათი მოადგილეები პრეზიდენტობის კანდიდატის გამოსვლას გულისყურით უსმენდნენ. აქვე იყვნენ ჩოხატაურის მუნიციპალიტეტის საკრებულოს წევრები _ ამირან ბასილია და ლია ჩიგოგიძე. ბურჯანაძის დამხვედრებს შორის “ნაციონალური მოძრაობის” ყოფილი და მოქმედი აქტივისტებიც ბლომად ჩანდნენ _ ის ადამიანები, რომლებიც გასულ წელს, წინასაარჩევნოდ, ნაციონალებს იფიცებდნენ, ჟურნალისტურ საქმიანობაში ხელს გვიშლიდნენ და საჯარო თუ პირად საუბრებში ჩვენი ლანძღვით იყვნენ დაკავებულები.
ამავე შეხვედრაზე იმყოფებოდნენ “რესპუბლიკური პარტიის” ჩოხატაურის ორგანიზაციის თავმჯდომარე, სპორტსკოლის დირექტორი გოჩა ჯიქია და მისი თანამშრომლები.
_ გამისწორდა და მოვედი, _ ასეთი კომენტარით შემოიფარგლა ჯიქია ჩვენთან საუბრისას.
ჩოხატაურელ ამომრჩეველს “დემოკრატიული მოძრაობის” საპრეზიდენტო კანდიდატი გია ბურჯანაძემ წარუდგინა: _ ნინო ბურჯანაძის პრეზიდენტობის პირველივე დღიდანვე დამთავრდება ის მახინჯი კოჰაბიტაცია, დაიწყება სამართლიანობის აღდგენა და იქნება მრავალმხრივი. ამას იგრძნობენ არა მარტო ის ადამიანები, ვინც უკანონოდ მოიხადა სასჯელი, რომლებსაც უკანონოდ შეეხნენ, არამედ ისინი, რომლებმაც უკანონოდ დაკარგეს სამსახური, განიცდიან სოციალურ უსამართლობას. ნინო ბურჯანაძის გაპრეზიდენტების მეორე დღესვე დაიგეგმება ვადამდელი საპარლამენტო არჩევნები. ეს იქნება მხოლოდ იმ შემთხვევაში, თუ დაბალანსდება ხელისუფლება და მხოლოდ ერთი პოლიტიკური ძალა აღარ იქნება ქვეყნის სათავეში, _ აღნიშნა გია ბურჯანაძემ.
ნინო ბურჯანაძის თქმით, მისი და მისი გუნდელების მთავარი ამოცანა ქვეყნის სწორ გზაზე დაყენებაა:
_ სამწუხაროდ, მთელ საქართველოში, სადაც ჩვენ ვიყავით, ვხდებით, რომ ადამიანებს უფრო მეტი სტკივათ, ვიდრე უხარიათ, უფრო მეტი პრობლემები აქვთ, ვიდრე _ სასიხარულო ინფორმაცია. თქვენ ძალიან კარგად გახსოვთ 26 მაისი. გურიიდანაც იყვნენ ჩამოსული ადამიანები, რომლებიც აქტიურად მონაწილეობდნენ აქციებში. იცით, ჩვენ როგორ ვიბრძოდით იმისთვის, რომ ქვეყნისთვის ნორმალური განვითარების შანსი მიგვეცა. ამიტომ, ჩვენ ყველანი დავუდექით “ქართულ ოცნებას”, უფრო სწორად, გვერდში დავუდექით ბიძინა ივანიშვილს. იმიტომ, რომ ამ კაცს მართლაც ბევრი სიკეთე აქვს საქართველოსთვის გაკეთებული. პირველ ოქტომბერსაც მან ნამდვილად გადამწყვეტი როლი შეასრულა იმაში, რომ ჩვენ შევძელით უსისხლოდ მოგვეშორებინა ის რეჟიმი, რომელიც ამდენი ხნის განმავლობაში ძალიან ბევრს გვპირდებოდა, მაგრამ სამწუხაროდ, თავსატეხი და თავის ტკივილი უფრო მეტი გაგვიჩინა. ყველაფერს რომ თავი დავანებოთ, მარტო აგვისტოს ომი კმარა, მარტო დაკარგული ტერიტორიები კმარა იმისთვის, რომ ნებისმიერ ხელისუფლებას ძალიან მწარედ მოსთხოვოს ხალხმა პასუხი, მიუხედავად იმისა, რომ გარეგნულად თითქოსდა ძალიან ბევრი რამე კეთდებოდა, ტელევიზორს რომ ჩართავდი, გეგონებოდა, ყველა სოფელი აყვავდა საქართველოში და ახლა ჩვენი კუთხის დროც მოვაო.
ახლა აღმოჩნდა, რომ ძალიან ბევრი პრობლემა, რომლებიც ადამიანებს აწუხებდათ წლების განმავლობაში, კვლავ მოუგვარებელია. მაგალითად, ელემენტარული პენსია, რომელიც საარსებო მინიმუმს არ შეეფერება; მოუგვარებელია ახალგაზრდების უმუშევრობის პრობლემები, ჯანდაცვის პრობლემები _ ადამიანი მაინც და მაინც უნდა მოკვდეს ქუჩაში, რომ წაიყვანონ და უფასო სამედიცინო დახმარება აღმოუჩინონ. აღარაფერს ვამბობთ სოფლებზე. ყველგან, სადაც მივედით, პრობლემები დაგვხვდა _ უგაზობა, უწყლობა, უგზოობა. არადა, ცოდვა გამხელილი ჯობია, ხანდახან ტელევიზორს რომ ვუყურებდი, ვფიქრობდი ეს გაკეთდა, ის გაკეთდა. თუნდაც ბოლო წლებში, როცა ოპონენტი ვიყავი. მაგრამ ახლა აღმოვაჩინე, რომ არაფერი გაკეთებულა. ტყუილი იქნება, რომ გითხრათ, ჩემი არჩევისთანავე ყველა ეს პრობლემა მოგვარდება,-მეთქი. ყველა ეს პრობლემა არც შედის პირდაპირ პრეზიდენტის ფუნქციებში. ძალიან ბევრი რამე არის მთავრობის გასაკეთებელი, მაგრამ ჩემი და ჩემი თანაგუნდელების ამოცანაა, რომ ჩვენი ქვეყანა სწორ გზაზე და სწორ კალაპოტში ჩავაყენოთ, ისე იმუშაოს მთავრობამ, რომ თქვენი პრობლემების მოგვარება რეალურად დაიწყოს. ძალიან კარგია, რომ ვაუჩერებს არიგებენ; ძალიან კარგია, რომ კომპენსაციებს არიგებენ, მაგრამ ხომ არ შეიძლება თქვენ, მშრომელი ადამიანები მუდმივად ხელისუფლების მოწყალებაზე იყოთ დამოკიდებული? ხომ უნდა შეიქმნას ერთხელ და სამუდამოდ ისეთი ვითარება, როცა ქვეყანაში ეკონომიკა განვითარდება. ეკონომიკური ზრდა მაისში ნული იყო და ივნისში მინუსებში წავიდა. დღესაც ძალიან სერიოზული პრობლემებია შემოსავლებთან დაკავშირებით, იმდენად სერიოზული, რომ თუ ასე გაგრძელდა, წლის ბოლოს, საბიუჯეტო ორგანიზაციებში ხელფასების გაცემაზეც კი პრობლემა შეექმნება მთავრობას. იმისთვის, რომ ეს პრობლემები არ იყოს, საჭიროა ქვეყანაში ეკონომიკური ზრდა წავიდეს. ამისთვის კი საჭიროა ქვეყანას ჰყავდეს ისეთი პრეზიდენტი, რომელიც იქნება ქვეყნის სტაბილურობის გარანტი, ქვეყნის სამართლიანობის გარანტი, რომელიც იქნება იმის გარანტი, რომ ქვეყანა არასოდეს ჩაერთვება წინასწარ წაგებულ და არც მოსაგებ ომში, იმიტომ რომ 21-ე საუკუნეში, არც ერთ ცივილიზებულ სახელმწიფოში ომით არ წყდება პრობლემები; იქნება იმის გარანტი, რომ ჩვენ შევძლებთ მეზობლებთან ნორმალური ურთიერთობების დალაგებას და იმას, რომ ქვეყანაში ინვესტიციები შემოვიდეს, _ განაცხადა ბურჯანაძემ.
ნინო ბურჯანაძემ გიორგი მარგველაშვილზეც ისაუბრა და აღნიშნა, რეგიონებში სტუმრობისას მას “ქართული ოცნების” საპრეზიდენტო კანდიდატზე ხშირად ეკითხებიან:
_ დღესაც მეკითხებიან რეგიონებში _ რა გვარია, ვინ არის, რას წარმოადგენს. მას საზოგადოება არ იცნობს. რამდენი მხარდამჭერი ეყოლებოდა გიორგი მარგველაშვილს, ბიძინა ივანიშვილის კანდიდატურა რომ არ იყოს?! იმიტომ უნდა აირჩიონ მარგველაშვილი, რომ ივანიშვილის კანდიდატურაა? ეს არის ზუსტად ის, რის წინააღმდეგაც თავად ივანიშვილი გამოდის, _ დასძინა ბურჯანაძემ.
“დემოკრატიული მოძრაობის” საპრეზიდენტო კანდიდატს ჩოხატაურში ლექსებიც მიუძღვნეს და საბჭოთა კავშირის აღდგენაც მოსთხოვეს (ვიდეო სიუჟეტი შეგიძლიათ იხილოთ აქ), რაზეც ბურჯანაძემ აღნიშნა, რომ საბჭოთა კავშირის აღდგენის სურვილი დღეს არავის აქვს.
შეხვედრის დასასრულს, ბურჯანაძის საარჩევნო შტაბის ხელმძღვანელმა, ირაკლი ბათიაშვილმა, შეხვედრის ერთ-ერთი მონაწილის მიერ მიწოდებული წერილი წაიკითხა _ წერილში ეწერა, რომ “ქართული ოცნების” საარჩევნო შტაბის ხელმძღვანელის, ირაკლი კუჭავას დავალებით, პარტიის წევრი, ზვიად მამალაძე, შენობიდან იმ ადამიანების ვინაობას აფიქსირებდა და იწერდა, რომლებიც შეხვედრას ესწრებოდნენ. ამ ინფორმაციას მამალაძე დაუყონებლივ გამოეხმაურა და აღნიშნა, რომ ეს ყველაფერი სიმართლეს არ შეესაბამებოდა და “დემოკრატიული მოძრაობის” ლიდერებს ინფორმაციის გადამოწმება მოსთხოვა.
მიუხედავად ამისა, ჩვენ დავაფიქსირეთ, როგორ იღებდა ვიდეოკამერით შეხვედრას “ქართული ოცნების” ოფისიდან გამოსული ერთ-ერთი წევრი, რომლის შესახებაც ირაკლი კუჭავას ინფორმაცია არ აღმოაჩნდა:
_ გადაღებასთან დაკავშირებით, კატეგორიულად უარვყოფ, რომ ეს ჩემი მითითება ან დავალება იყოს. ოფისის გვერდზე ხდებოდა შეხვედრა და მას, ბუნებრივია, ოფისიდან ადამიანები ჩვეულებრივად მიადევნებდნენ თვალს. წელს რომ ოპოზიციას მუშაობის პირობები აქვს, ასეთი პირობები რომ მქონოდა ოპოზიციაში ყოფნის დროს, ალბათ, არც ერთ არჩევნებს არ წავაგებდი ჩოხატაურში. ქალბატონი ნინოს შტაბში არის რამდენიმე ადამიანი, რომლებისთვისაც ცხოვრების ერთ-ერთ მთავარ მიზნად ქცეულა ირაკლი კუჭავასთან ბრძოლა. მე ეს არ მადარდებს, მაგრამ უბრალოდ მინდა, ქალბატონმა ნინომ იცოდეს, რომ ეს ის ადამიანებია, რომლებიც, 2003 წელს, როცა მე, ჩემი ფინანსთა სამინისტროში მუშაობის დროს, მთხოვა ცხონებულმა ზურაბ ჟვანიამ, ჩამოვსულიყავი ჩოხატაურში და ერთი თვე მივეხმარე უსასყიდლოდ, ნინო ბურჯანაძის პლაკატებს ხევდნენ, ზედ ფეხებით გადადიოდნენ; იმ სიტყვებს არ გავიმეორებ, რასაც მისი მისამართით ამბობდნენ. რაც შეეხება ბურჯანაძის განცხადებას, რომ ბიძინა ივანიშვილის სურვილია, არჩევნებში გაიმარჯვოს ქალბატონმა ნინომ, არ ვიცი, რამდენად სწორია, რადგან მე შეხვედრას არ ვესწრებოდი, თუმცა, გუშინდელ ინტერვიუში, ბატონმა ბიძინამ ამას გასცა პასუხი.
_ მსგავსი განცხადება ჩვენ არ მოგვისმენია.
_ მე მითხრეს, რომ იყო. თუ არ ყოფილა, მაშინ ეს სიტყვები უკან მიმაქვს და ქალბატონ ნინოს ვუსურვებ წარმატებას მეორე ადგილისთვის ბრძოლაში
_ რაც შეეხება თქვენი პარტიის წევრის მიერ შეხვედრის ვიდეოკამერით გადაღებას, ამის შესახებ რას იტყვით?
_ ამას დავადგენ. ახლა მოვედი ოფისში. თუ იღებდა, რა მიზნით იღებდა?! ამის მიზანი ინფორმაციის მიღება იქნება, მაგრამ ვინ დაავალა და რატომ, ამას გავარკვევ, _ გვითხრა კუჭავამ.
ამომრჩეველთან შეხვედრის შემდეგ, ბურჯანაძემ ახალ გახსნილი კლინიკა “მამქოლი” მოინახულა და საარჩევნო შტაბი ოფიციალურად გახსნა. შტაბის ხელმძღვანელზე, მამია ბარამიძეზე ჩვენთან საუბარი კი იმ დღეს უკვე აღარ ისურვა. მიუხედავად იმისა, რომ ერთი წლის წინანდელი შეხვედრა და ამ საკითხზე გამართული დისკუსია შევახსენეთ, ბურჯანაძემ კითხვა, ენდობა თუ არა შტაბის უფროსს და დარწმუნებულია თუ არა, რომ მამია ბარამიძე იქნება მისი ერთგული, უპასუხოდ დატოვა: _ მე არ ვიცი, რატომ მისვამთ ამ კითხვას, თუ გაქვთ საფუძველი ამ კითხვის დასმის…
_ ჩვენ ეს შეკითხვა შარშან, რეგიონულ მედიასთან შეხვედრის დროსაც დაგისვით და გვეგონა, რომ გახსოვდათ…
_ ასეთი კითხვები ასე არ ისმევა(?!). თუ თქვენ გაქვთ კონკრეტული მასალა, ინფორმაცია, რატომ სვამთ კითხვას ასე, მე აუცილებლად გავითვალისწინებ. ჩემთვის ძალიან დიდი მნიშვნელობა აქვს იმას, რომ ყველგან, სადაც არიან ჩვენი წარმომადგენლები, მათთან დაკავშირებით პასუხები იყოს გაცემული, მაგრამ ასე ჰაერიდან მოტანილი…
_ “გურია ნიუსს” ჰაერიდან არ მოაქვს კითხვები. მაგალითად,. 26 მაისის აქციის დროს დაკავებული ადამიანების სანახავად პოლიციასთან მოსვლას მამია ბარამიძეს მედია უშედეგოდ სთხოვდა _ ასეთია თქვენი შტაბის ხელმძღვანელი.
_ გავარკვევ, _ ღიმილით გვითხრა ბურჯანაძემ.
ბურჯანაძესთან შეხვედრაზე მრავლად იყვნენ ნაციონალების ძველი მხარდამჭერები
