მსაჯულები სათათბირო ოთახში დღის 4 საათზე გავიდნენ და 13 საათის შემდეგ დაბრუნდნენ. ვერდიქტის გამოტანა მათ ვერ შეძლეს ვერც პირველი სამი საათის და ვერც მომდევნო სამი და ექვსი საათის განმავლობაში. მოსამართლე ეკა არეშიძე ალტერნატივის წინაშე დადგა: მას ან უნდა დაეშალა ნაფიც მსაჯულთა სასამართლო ან დამატებითი დრო მიეცა. საბოლოოდ მოსამართლემ მსაჯულებს ვერდიქტის გამოსატანად გონივრული ვადა _ 1 საათი მისცა.
13 საათის შემდეგ მსაჯულებმა ვერდიქტი გამოაცხადეს და სამივე ბრალდებული: ვახტანგ ჩხაპელია, კობა ყურუა და გელა უბილავა ავთო ადუაშვილის განზრახ მკვლელობაში დამნაშავედ სცნეს. როგორც გაირკვა, აღნიშნული გადაწყვეტილება მათ მე-13 საათზე მიიღეს, რამაც დაცვის მხარის უკმაყოფილება გამოიწვია.
“12 საათის განმავლობაში მსაჯულებმა ვერ მიიღეს გადაწყვეტილება, მათ უნდოდათ გამამართლებელი, მაგრამ იმის შემდეგ, რაც პროცესზე ატყდა უბედურების ამბავი დაზარალებულების მხრიდან და ეს პროვოცირებული იყო პროკურატურის მხრიდან, სწორედ ამის მერე მეცამეტე საათზე მოხდა გამამტყუნებელი ვერდიქტის გამოტანა,” _ განაცხადა გელა უბილავას ადვოკატმა მაია ყანდურაშვილმა, რომელიც ამტკიცებს, რომ პროკურატურას ბრალდებულების წინააღმდეგ არანაირი მტკიცებულება არ ჰქონდა.
ვახტანგ ჩხაპელიას ადვოკატმა ლევან ჯავახაძემ სასამართლოზე დაზარალებულის ან პროკურატურის მხრიდან ზეწოლა გამორიცხა და განაცხადა, რომ მსაჯულებს, უბრალოდ შეეშინდათ: “არ გამოვრიცხავ, რომ დარბაზის მხრიდან ფსიქოლოგიური წნეხი ყოფილიყო. ადამიანები არიან ისინიც და ალბათ, შეეშინდათ.”
მოკლული ბიზნესმენის დედამ ნანა ეფრემიძემ მოსამართლეს და პროკურორებს მადლობა გადაუხადა და დასძინა, რომ მთავარ ბრძოლას სოსო პავლიაშვილის წინააღმდეგ იწყებს, რომელსაც საკუთარი შვილის მკვლელობის დამკვეთად მიიჩნევს.
“განაჩენით კმაყოფილი ვარ. მინდა მადლობა გადავუხადო _ პროკურორებს ნინო აღლემაშვილს დაა ლაშა ცხვიტარიას, ასევე მოსამართლე ეკა არეშიძეს, რომელიც ნამდვილად ობიექტური იყო მთელი პროცესის განმავლობაში. ეს ერთი ბრძოლა დავამთავრე და ახლა იწყება მეორე, იმის წინააღმდეგ, ვინც არის თავი და თავი და ვისი ფულიც დაიხარჯა _ სოსო პავლიაშვილო, მიფრთხილდი, არ დაგინდობ! ფული იშოვე და ჩემი შვილის გვერდზე გაწევა მოინდომე, ავთო მოკალი და ჩხაპელია ციხეში გაუშვი?! დაჯექით ახლა პავლიაშვილებმა და “იგულავეთ!”
ნაფიც მსაჯულთა გამამტყუნებელი ვერდიქტის შემდეგ, მოსამართლემ სასჯელის დანიშვნის სხდომა ჩანიშნა. დღეს 3 საათზე მოსამართლე ეკა არეშიძე ავთო ადუაშვილის მკვლელებს კონკრეტულ სასჯელს შეუფარდებს.
დაზარალებულები ვარაუდობენ, რომ გამამტყუნებელი განაჩენი მსჯავრდებულებს სოსო პავლიაშვილის წინააღმდეგ აალაპარაკებს. მათი თქმით, აქამდე პავლიაშვილის სიძეს ვახტანგ ჩხაპელიას, გელა უბილავას და კობა ყურუას რუსეთში მოღვაწე მომღერლის დახმარების იმედი ჰქონდათ. იმედგაცრუების შემდეგ კი მკვლელობის დამკვეთს ხელს აღარ დააფარებენ.
ავთო ადუაშვილი გასული წლის 23 ნოემბერს ფალიშვილის ქუჩაზე საკუთარ ავტომანქანაში მოკლეს, გვამი კი ზაზიაშვილის ქუჩაზე დატოვეს. მოწმედ დაკითხვისას ვახტანგ ჩხაპელიამ ადუაშვილის მკვლელობის დამკვეთად და დამფინანსებლად საკუთარი ცოლისძმა და გარდაცვლილის ბავშვობის მეგობარი სოსო პავლიაშვილი დაასახელა. გავრცელებული ინფორმაციით, მკვლელობის მიზეზი საერთო ბიზნესია, რომლის წილის ოფიციალურად გადაფორმებასაც ავთო ადუაშვილი 24 ნოემბერს ერევანში სოსო პავლიაშვილთან შეხვედრის დროს გეგმავდა. დაზარალებულების ვარაუდით, სოსო პავლიაშვილს ავთო ადუაშვილის ერევანში ჩასვლა არ სურდა, რადგან ამ უკანასკნელისთვის დაახლოებით ერთი მილიონი დოლარი უნდა მიეცა. მომღერალი მკვლელობასთან კავშირს უარყოფს და აცხადებს, რომ მზად არის თბილისიდან ჩასულ გამომძიებლებს ჩვენება მისცეს. პროკურორ ნინო აღლემაშვილის თქმით, ავთო ადუაშვილის მკვლელობის საქმეზე პავლიაშვილის დაკითხვა იგეგმება.
ტელეკომპანია “იმედის” ფოტო: სასამართლოზე
