თუმცა, სულ ცოტა ხნის წინ სააკაშვილმა ბათუმში გერმანელ და ქართველ ინვესტორებთან შეხვედრის შემდეგ განაცხადა, რომ ისინი მზად არიან მხარი დაუჭირონ ამ პროექტს. მეტიც, პრეზიდენტის განცხადებით შეიქმნება სააქციო საზოგადოება, რომელიც დაგეგმავს და განახორციელებს ლაზიკას მშენებლობას. თუმცა ექსპერტები ამას გამორიცხავენ და ამბობენ, რომ ინვესტორი ფულს საქმეში ისე არ ჩადებს, სანამ ის ეკოლოგების, ეკონომისტებისა და დემოგრაფების საბოლოო შეფასებას არ ნახავს. ეს შეფასება კი დადებითი ნამდვილად არ იქნება, რადგან იქ ისეთი ნიადაგია, ქალაქის მშენებლობა გამორიცხულია.
ცნობისთვის, ლაზიკას მშენებლობის შესახებ ინიციატივა პრეზიდენტმა მიხეილ სააკაშვილმა პირველად 2011 წლის 5 დეკემბერს ზუგდიდში გააჟღერა. ლაზიკას მშენებლობა 2012 წლის მაისიდან უნდა დაიწყებულიყო. მანამ კი, გეგმის თანახმად, ტენდერი გამოცხადდებოდა და პირველ ეტაპზე ქალაქის მშენებლობაში კერძო ინვესტიციები ჩაიდებოდა.
2012 წლის საპარლამენტო არჩევნების შემდგომ ახალმა ხელისუფლებამ პროექტის გახორციელებაზე უარი თქვა, მაგრამ დასაწყისში თვითონ კოალიციურ მმართველობაშიც აზრთა სხვადასხვაობა იყო.
ეკონომიკის მინისტრი გიორგი კვირიკაშვილი აღნიშნავდა, რომ ეს იყო სერიოზული ეკონომიკური პროექტი: “ეს არის სერიოზული ეკონომიკური პროექტი, რომელიც კარგად უნდა იქნას შესწავლილი. ვფიქრობ, რომ ნებისმიერ შემთხვევაში ინფრასტრუქტურისა და კომუნიკაციის განვითარება ქვეყნისთვის ძალიან სასარგებლოა. დავუშვათ, გაკეთდება პორტი, სარკინიგზო ხაზი, კომუნიკაციები, საბითუმო სატვირთო გადაზიდვის ცენტრი და ა.შ. ჩვენი ქვეყნის ადგილმდებარეობიდან გამომდინარე, ძალიან სასარგებლო იქნება ამ ტიპის ინფრასტრუქტურული პროექტების განხორცილება,” – აცხადებდა კვირიკაშვილი.
განსხვავებული დამოკიდებულება ჰქონდათ ენერგეტიკის მინისტრ კახი კალაძესა და პრემიერ ბიძინა ივანიშვილის: “ეს არის სააკაშვილის მორიგი ტრიუკი. ვის სჭირდება ქალაქი ჭაობზე, როდესაც ნახევარი საქართველო დაცლილია? ამისი არანაირი სახსრები არ არსებობს”, _ განაცხადა ივანიშვილმა 2 ოქტომბერს.
ახლა კი, ლაზიკას პროექტის გახორიციელება კვლავ გაააქტიურა პრეზიდენტმა და სულ ცოტა ხნის წინ ბათუმში, გერმანელი და ქართველი ინვესტორებით დაკომპლექტებულ საინიციატივო ჯგუფთან შეხვედრის შემდეგ განაცხადა, რომ ისინი სერიოზულად არიან დაინტერესებული ლაზიკის პროექტის გაცოცხლებით.
“ჩვენ შევქმნით სააქციო საზოგადოებას, მოვიწვევთ ძალიან ბევრ ინვესტორს, რამდენიმე უკვე გამოჩნდა, დავგეგმავთ ლაზიკას პორტს და ქალაქს მის გარშემო; ხალხი თვითონ აამუშავებს ამ პროექტს, მიუხედავად იმისა, ვინ იქნება საქართველოს მთავრობაში. იმიტომ, რომ ეს არის სწორი და ამ მიმართულებით მე ვიწყებ კონკრეტული ნაბიჯის გადადგმას პრეზიდენტობის დროს და ვაპირებ გავაგრძელო პრეზიდენტობის შემდეგ”, _ განაცხადა მიხეილ სააკაშვილმა.
თუმცა, ექსპერტთა უმრავლესობა ლაზიკას პროექტის გახორციელებას აბსურდულს უწოდებს. დემოგრაფი, სოციოლოგიურ მეცნიერებათა დოქტორი, პროფესორი ანზორ თოთაძე “გურია ნიუსთან” ლაზიკას პროექტის გახორციელებასთან დაკავშირებულ საფრთხეებზე საუბრობს: “ამ ტერიტორიაზე არ შეიძლება ქალაქის გაშენება. ტექნიკა ძალიან დაიხვეწა, მაგრამ იგი ბუნების წინააღმდეგ ვერ წავა. ერთ მაგალითს მოგიყვანთ _ ფოთში, 40-იან წლებში, ზღვიდან 1 კილომეტრის დაშორებით, აშენდა იპოდრომი, რომელიც 70-იან წლებში წყალქვეშ აღმოჩნდა. ლაზიკას შემთხვევაშიც ჭაობების დაშრობა გამოიწვევს ზღვის მხრიდან მიწების მიტაცებას. ამ ქალაქში, თუ, რა თქმა უნდა, აშენდა, ცხოვრება მოსახლეობისთვის საშიში გხდება.
ვთქვათ, ინვესტორებისა და ბიუჯეტში გამოყოფილი თანხებით მართლაც გაკეთდა რაიმე. ამ ქვეყანაში ყველაფერი იყიდება და, გგონიათ, ლაზიკში თუ რამე ღირსეული შეიქმნება, ის ჩვენს კუთვნილებში დარჩება?! რა თქმა უნდა არა. გაყიდიან ინვესტორებზე და ამით შეეცდებიან ვითომ ბიუჯეტის შევსებას,” _ უთხრა “გურია ნიუსს” თოთაძემ.
მისივე თქმით, ინვესტორი საქმეში ფულს ისე არ ჩადებს, რომ მოტყუვდეს. ის იმოქმედებს მხოლოდ მას შემდეგ, რაც ნახავს ეკოლოგების, ეკონომისტებისა და დემოგრაფების საბოლოო შეფასებას: “ამ საქმის ექსპერტები დადებით დასკვნას არ დადებენ, რადგან იქ ისეთი ნიადაგია, ქალაქის მშენებლობა გამორიცხულია. ანუ ლაზიკაში ინვესტორების შემოსვლა გამორიცხულია,” _ განმარტავს თოთაძე.
