ქუთაისში, ჭავჭავაძის ქ. #58-ში მდებარე ყოფილი სკოლა-ინტერნატის შენობის რეაბილიტაციის პროცესი ოკუპირებული ტერიტორიებიდან იძულებით გადაადგილებულ პირთა, ლტლვილთა და განსახლებისა მინისტრის მოადგილე მამუკა ცოტნიაშვილმა ტერიტორიული ორგანოს თანამშრომლებთან ერთად დაათვალიერა და შენობის მეორე ნაწილში უკანონოდ, თვითნებურად შესახლებულ დევნილებსაც შეხვდა.
სამინისტროს წარმომადგენლები დევნილთა ძირითადი საჭიროებები მოისმინეს და ასევე დეტალურად მიაწოდეს ინფორმაცია იმ კრიტერიუმებისა და პროცედურების შესახებ, რის მიხედვითაც ხდება საცხოვრებელი ბინების განაწილება.
ჭავჭავაძის ქ. #58-ში სარემონტო სამუშაოები დაწყებულია, თუმცა, რადგან შენობის მეორე ნაწილში დევნილები თვითნებურად შესახლდნენ, სამშენებლო სამუშაოები ვერ გრძელდება. შესაბამისად, თავად დევნილები ზარალდებიან. აღნიშნულ შენობაში დაგეგმილია 68 საცხოვრებელი ბინის მოწყობა. ყოფილი სკოლა-ინტერნატის შენობა დევნილთა სამინისტროს სარეაბილიტაციოდ 2013 წლის აგვისტოს თვეში გადმოეცა.
შენობის ერთი ნაწილის თვითნებურად დაკავება მას შემდეგ მოხდა, რაც შენობის რეაბილიტაციის შესახებ გახდა ცნობილი. ამ ეტაპისთვის, აღნიშნულ სარეაბილიტაციო ობიექტში 35-მდე დევნილი ოჯახი ცხოვრობს. მათი ნაწილი სახელმწიფოს მიერ საცხოვრებელი ფართით უკვე დაკმაყოფილებულია, ხოლო ნაწილი საქართველოს სხვადასხვა რეგიონებში (ქვემო სვანეთში, რაჭაში-ლეჩხუმში, სამეგრელოსა და სხვა.) ცხოვრობდა. 7 ოჯახს კი ალტერნატიული საცხოვრებელი არ გააჩნია და სამინისტროს დახმარება სჭირდება.
შენობის თვითნებურად დაკავების გამო სარეაბილიტაციო სამუშაოები ფერხდება. რეაბილიტაცია დადგენილ ვადაში რომ დასრულდეს და კრიტერიუმებით გათვალისწინებული ბინის განაწილების პროცედურა დაიწყოს, სამინისტროს წარმომადგენლებმა დევნილებს სთხოვეს, რომ დატოვონ თვითნებურად დაკავებული ფართი, დაუბრუნდნენ თავიანთ პირვანდელ საცხოვრებელს. შენობის რეაბილიტაციის დასრულების შემდეგ კი ყველას შეეძლება, ბინის განაწილების პროცედურაში ჩაერთოს.
