მისი განცხადებით, ხაბურზანია წლებია, რაც შპს “ლაზიკას” გენერალური დირექტორია, თვითმმართველობის შესახებ კანონი კრძალავს მის საჯარო სამსახურში მუშაობას.
ქარდავამ საჯარო რეესტრიდან 29 აგვისტოთი დათარიღებული ამონაწერი წარმოადგინა, სადაც ჩანს, რომ ხაბურზანია ნამდვილად აღნიშნული შპს-ს გენერალური დირექტორია. ინგა ქარდავამ თანამოაზრეებთან ერთად საკრებულოს თავმჯდომარეს თანამდებობის დატოვება მოსთხოვა და პროკურატურაშიც შეიტანა სარჩელი.
ინგა ქარდავამ, როგორც მოძრაობა “საქართველოს არწივის” რეგიონალური ოფისის ხელმძღვანელმა და ფრაქცია “ქართული ოცნება – თავისუფალი დემოკრატების” სენაკის ორგანიზაციამ სენაკის საკრებულოს ხაბურძანიას განთავისუფლების შესახებ განცხადებით მიმართეს. მოთხოვნის საფუძველზე გაიმართა საკრებულოს საგანგებო სხდომა. აღსანიშნავია, რომ სენაკის საკრებულოში “ქართულ ოცნებას” მხოლოდ სამი დეპუტატი ჰყავს. უმრავლესობას “ნაციონალური მოძრაობის” ყოფილი წევრები წარმოადგენენ, რომლებმაც 2012 წლის პარლამენტის არჩევნების შემდეგ ფრაქცია ჩამოაყალიბეს. საკრებულოს უმცირესობის აზრით, სწორედ ეს გახდა მიზეზი იმისა, რომ საკრებულოს სამანდატო-საპროცედურო საკითხთა სხდომა ისე დასრულდა, რომ ხაბურზანია დაკავებული თანამდებობიდან არ გაათავისუფლეს.
ინგა ქარდავა: “სენაკის საკრებულოს თავმჯდომარის მოვალეობის შემსრულებელს არ სურს თანამდებობის დატოვება, თუმცა, ყველა კანონით მიხედვით ის ვალდებულია, დაკავებული თანამდებობა დატოვოს. გვაქვს საჯარო რეესტრის ამონაწერი, სადაც გარკვევით წერია, რომ ხაბურძანია შპს “ლაზიკას“ გენერალური დირექტორია 29 აგვისტოს მონაცემებით. აქციაც გავმართეთ, მაგრამ გამგებელი გაიქცა და არ ისურვა დალაპარაკება. პროკურატურას უკვე მივმართეთ. დაველოდებით რეაგირებას. როდემდე უნდა სუფევდეს ასეთი უკანონობა სენაკში?”
ბრალდებებს უარყოფს როგორც თავად საკრებულოს თავმჯდომარის დროებით მოვალეობის შემსრულებელი, ასევე სამანდატო-საპროცედურო კომისიის თავმჯდომარე თამილა სორდია.
თამილა სორდია: “ზურაბ ხაბურზანიამ წარმოადგინა 2000 წლის 20 ივლისით დათარიღებული ამონაწერი საჯარო რეესტრიდან. ამონაწერი ადასტურებს, რომ სწორედ ამ პერიოდში ბატონი ზურაბი განთავისუფლდა შპს “ლაზიკას” გენერალური დირექტორის თანამდებობიდან. სხდომამ მიიღო გადაწყვეტილება, შეწყდეს ადმინისტრაციული საფუძველი საკრებულოს თავმჯდომარის დროებით მოვალეობის შემსრულებლის თანამდებობრივ შეუთავსებლობასთან დაკავშირებით.”
ზურაბ ხაბურზანია: “არ უავრყოფ, რომ ვიყავი შპს “ლაზიკას” გენერალური დირექტორი, მაგრამ აღნიშნული თანამდებობიდან გავთავისუფლდი 2000 წელს. 14 წელია, არანაირი საქმიანი ურთიერთობა იმ ორგანიზაციასთან არ მქონია. ბრალს მდებენ, რომ 29 აგვისტოს ამონაწერი აქვთ, სადაც ისევ მოვიხსენიები დირექტორად, მაგრამ ეს ჩემი ბრალი ნამდვილად არ არის. კანონით ევალებოდა იმ ორგანიზაციას, რომ დაეფიქსირებინათ ჩემი წამოსვლა. მას მერე, რაც ამ ორგანიზაციიდან წამოვედი, სხვადასხვა თანამდებობებზე ვმუშაობდი. ასე რომ, ნამდვილად არ დამირღვევია კანონი და უკვე 14 წელია აღარ ვარ “ლაზიკას” დირექტორი. კიდევ ერთხელ გეუბნებით, რომ შეცდომა “ლაზიკას” სამეთვალყურეო საბჭოს მიერ არის დაშვებული.”
ჩვენ გადავამოწმეთ საჯარო რეესტრში შპს “ლაზიკას” დოკუმენტაცია და ვნახეთ, რომ სწორედ 29 აგვისტოს მდგომარეობით ამონაწერში გენერალურ დირექტორად ზურაბ ხაბურზანიაა დაფიქსირებული, გარდა ამისა, ვნახეთ, რომ “ლაზიკამ” მიმართა რეესტრს ხაბურზანიას განთავისუფლების მოთხოვნით, მაგრამ, დადგინდა ხარვეზი, რომლის გამოც არ მოხდა განცხადების დაკმაყოფილება, თუმცა 2013 წლის 30 აგვისტოს ხაბურზანია გათავისუფლდა დაკავებული თანამდებობიდან.
