ამის შესახებ საქართველოს საგარეო საქმეთა მინისტრმა მაია ფანჯიკიძემ ჟენევაში, გაერო-ს ადამიანის უფლებათა საბჭოს 24-ე სესიაზე სიტყვით გამოსვლისას განაცხადა.
მაია ფანჯიკიძემ ადამიანის უფლებათა დაცვის მხრივ საქართველოს ხელისუფლების მიერ გატარებულ რეფორმებზე ისაუბრა და აღნიშნა, რომ საქართველოს სურვილი აქვს გახდეს ადამიანის უფლებათა საბჭოს წევრი.
“საქართველოს მთავრობის მიერ გაწეული მნიშვნელოვანი ძალისხმევა, რომელიც დემოკრატიისა და კანონის უზენაესობის განმტკიცებისა და თითოეული ადმიანის პოლიტიკური, ეკონომიკური, სოციალური და კულტურული უფლებების დაცვისა და ხელშეწყობისკენაა მიმართულა, და ასევე, ადამიანის უფლებათა საბჭოს ფარგლებში თანამშრომლობის გზით, სხვა სახელმწიფოებისთვის ჩვენი გამოცდილების გაზიარების მზაობა, მაძლევს მყარ საფუძველს წარვადგინო საქართველოს კანდიდატურა ადამიანის უფლებათა საბჭოს წევრობისთვის 2016-2018 წლებში. დარწმუნებული ვარ, რომ ადამიანის უფლებათა საბჭოს საქმიანობაში ახალი დემოკრატიული სახელმწიფოების მონაწილეობის გაძლიერება დამატებით პოზიტიურ იმპულსს შესძენს საბჭოს მუშაობას” – განაცხადა მინისტრმა სიტყვით გამოსვლისას.
ადამიანის უფლებების საბჭოს სესიის მონაწილეებს საქართველოს საგარეო უწყების ხელმძღვანელმა წელს პირველად მიმართა.
საკუთარ გამოსვლაში მაია ფანჯიკიძემ ოკუპირებულ ტერიტორიებზე ადამიანის უფელბების მხრივ არსებულ მძიმე ვითარებაზეც ისაუბრა. მან სესიის მონაწილეებს ინფრომაცია მიაწოდა საოკუპაციო ხაზის გასწვრივ მავთულხლართების აღმართვის უკანონო ფაქტებზე და საერთაშორისო საზოგადოებას შესაბამისი რეაგირებისკენ მოუწოდა.
“მინდა გამოვთქვა უკიდურესი შეშფოთება რუსეთის მიერ ოკუპირებულ საქართველოს ტერიტორიებზე – აფხაზეთისა და ცხინვალის რეგიონებში შეკმნილი კრიტიკული მდგომარეობის გამო. გაეროს შესაბამისი სააგენტოების მიერ გამოთქმული შეშფოთების მიუხედავად, საქართველოს ოკუპირებულ რეგიონებში მცხოვრები ადგილობრივი მოსახლეობა კვლავ მოკლებულია ძირითადი უფლებებისა და თავისუფლებების დაცვის მინიმალურ საშუალებებს.
მთავრობა სერიოზულად შეშფოთებულია საოკუპაციო ხაზის გადაკვეთისთვის უკანონო დაკავებათა ზრდის ტენდენციით, ადგილობრივი მოსახლეობის იზოლაციისა და იმ კავშირების გაწყვეტის მიზნით, რომლებიც ჯერ კიდევ არსებობს ომის შედეგად გაყოფილ მოსახლეობას შორის, საოკუპაციო ძალებმა დაიწყეს საოკუპაციო ხაზის გასწვრივ მავთულხლართების გაბმისა და მიწაყრილების მოწყობის პროცესი, რაც წარმოადგენს საერთაშორისო სამართლის ფუნდამენტური პრინციპების აშკარა დარღვევას. მიმაჩნია, რომ დარღვევები, რომლებსაც ადგილი აქვს საქართველოს ოკუპირებულ რეგიონებსა და მიმდებარე ტერიტორიებზე, თქვენს უშუალო ყურადღებასა და გადაუდებელი ზომების მიღებას საჭიროებს” – აღნიშნა მაია ფანჯიკიძემ გაეროს ადამიანის უფლებათა საბჭოს სესიაზე.
ჟენევაში ოფიციალური ვიზიტის ფარგლებში საგარეო უწყების ხელმძღვანელი ადამიანის უფლებათა საბჭოს პრეზიდენტს რემინგიუშ ჰენცზელს, გაეროს ჟენევის განყოფილების გენერალურ დირექტორს ჟომარტ ტოკაევს და ადამიანის უფლებათა და ლტოლვილთა საკითხებში გაეროს უმაღლეს კომისრებს შეხვდა.
მაია ფანჯიკიძემ ასევე შეხვედრა გამართა წითელი ჯვრის საერთაშორისო კომიტეტის პრეზიდენტთან პიტერ მაურერთან. მხარეებმა ორგანიზაციასთან საქართველოს თანამშრომლობის საკითხები განიხილეს. მინისტრმა წითელი ჯვრის სათაო ოფისში განთავსებულ სამახსოვრო წიგნში ჩანაწერი დატოვა.
