“ოზურგეთის მუნიციპალიტეტის 2013 წლის სახელმწიფო შესყიდვების გეგმაში ცვლილებებისა და დამატებების შეტანის შესახებ“ ოზურგეთის მუნიციპალიტეტის საკრებულოს განკარგულების დამტკიცების თაობაზე.
სხდომა საკრებულოს თავმჯდომარემ ავთანდილ სურგულაძემ გახსნა, საკითხის ირგვლივ კი ამირან გირკელიძემ ისაუბრა. მან ცალ-ცალკე მიმოიხილა ადგილობრივი და სახელმწიფო ბიუჯეტში გახორციელებული ცვლილებები, კერძოდ, რომ სტიქიით გამოწვეული ზარალის სალიკვიდაციო სამუშაოების გასახორციელებლად შეტანილი უნდა იქნეს 2 276 000 ლარი, შესასრულებელი სამუშაოების სავარაუდო ღირებულებებით. ეს მოიცავს სახურავების, გზების, ხიდების და მილხიდების შეკეთების და გაბიონების მოწყობის სამუშაოებს, ასევე თანხას სამშენებლო მასალების, საწვავის საჭიროებისთვის და გაბიონების ბადეების შესაძენად.
დეპუტატმა შალვა თავდიშვილმა ეჭვი გამოთქვა სხვადასხვა ხარჯების მიმართ და აღნიშნა, რომ საპროექტო სამსახური კარგად არ მუშაობს, მოითხოვა განმარტება, თუ რატომ ხდება გაბიონების ბადეების ზოგიერთი მოსახლისთვის გადაცემა. კოტე შარაშენიძემ განმარტა, რომ 100 ათასიან საქმეს აკეთებს სპეციალისტი, 500 ლარიანს კი _ გლეხი, რომელსაც ამის გაკეთება შეუძლია: _ ჩვენგან ითხოვს ბადეს, ქვა იქვე ყრია და პასუხისმგებლობის დაკისრებით ვუწევთ კონტროლს. მეტყვით ვინმე, რომ არ უნდა დავეხმაროთ? ყველგან საკუთარი ფეხით მივდივარ, აქ მაქვს ფოტომასალა, დოკუმენტაცია, _ თქვა შარაშენიძემ.
საკრებულოს თავმჯდომარემ ავთანდილ სურგულაძემ განმარტა, რომ სტიქიის შემდეგ ქალაქის და სოფლის რწმუნებულები ახდენენ აღრიცხვას და გადმოსცემენ ინფორმაციას, რა რაოდენობისაა ზარალი: _ შემდეგ ინფორმაციის და საპროექტო სამსახურის მიერ ხდება ადგილზე გასვლა, დასურათება, ყველაფერი გადაეცემა სამხარაულის ექსპერტიზის ბიუროს და ჩამოდის შესაბამისი დასკვნა, თანხის ჩარიცხვის საფუძველზე. ვისაც რაიმეში ეჭვი ეპარება, შეგვიძლია, მოვიწვიოთ საპროექტო სამსახური და ყველაფერზე ღიად და დეტალურად ვისაუბროთ, _ განმარტა სურგულაძემ.
ამის შემდეგ სიტყვა ითხოვა კოალიციის წარმომადგენელმა, საკრებულოს დეპუტატმა დიმიტრი კვერღელიძემ.
მან თქვა, რომ კოტე შარაშენიძე საქმეს აკეთებს, დარბის და შენიშვნას არ იმსახურებს, თუმცა, მასთან არსებობს კითხვები სტიქიით დაზარალებულთათვის დასახმარებელი თანხების ხარჯვასთან დაკავშირებით.
ამ დროს შარაშენიძე კვერღელიძეს შეეპასუხა:
_ რა გინდა შენ, რას იჩხრიკები, საგადასახადოს ყოფილი კორუმპირებული უფროსი და ინსპექტორი ხარ, ინტრიგანი ხარ, ვიღაცა! ვის დაკარგვიხარ, შენ?! მიჩვეული ხარ დარეკვას და დაჭერას, კორუმპირებული ხარ, რა გინდა შენ?! _ აღელდა შარაშენიძე.
გაბრაზებული შარაშენიძის დანახვისას კვერღელიძემ უცებ შეარბილა ტონი და დაწყნარდიო, _ ურჩია გამგებელს.
_ დავწყნარდე კი არა, დაახვიე აქედან! კორუმპირებული ხარ, საგადასახადოს ყოფილი ინსპექტორი, რასაც აკეთებდი, ყველამ იცის! _ არ ცხრებოდა შარაშენიძე.
საკრებულოს წევრები წამოდგნენ და ლელა ნაცვალაძე პირველი გაეშურა მათ შორის “მანდილის“ ჩასაგდებად. ხანმოკლე ჩოჩქოლის შემდეგ საკრებულოს წევრები დაიშალნენ, რადგან ავთანდილ სურგულაძეს უკვე ნათქვამი ჰქონდა, რომ სხდომა დაიხურა.
