საჯარო რეესტრის მონაცემების მიხედვით, 12 აგვისტოს შპს AVANTE HOSPITAL MANAGMENT GROUP-ის 50-50%-ანი წილები იყიდეს თურქეთის მოქალაქეებმა – აბდულა კურსად დარჩინიმ და აზმი ოფლუღლუმ, რომელთა წარმომადგენელია, ასევე, თურქეთის მოქალაქე თეკინ ათიკი.
ხელშეკრულების მიხედვით, შპს AVANTE HOSPITAL MANAGMENT GROUP-ის 100% წილის ნასყიდობის ფასი შეადგენს 16 700 000 აშშ დოლარს.
აზმი ოფლუოღლუ, იმავდროულად, “უნივერსალ ჰოსპიტალ გრუპის” დამფუძნებელია. თავად მფლობელები აცხადებენ, რომ აღნიშნული კომპანია თურქეთში ერთ-ერთი უმსხვილესი სამედიცინო კომპანიაა და თურქეთის 7 სხვადასხვა ქალაქში 11 ჰოსპიტალს ფლობს.
თუმცა, “გურია ნიუსმა” ერთ-ერთ უცხოურ საიტზე (http://www.doktoraktuel.com/ana-sayfa/universal-grup-maas-sorunu-7598.html) მოიპოვა ინფორმაცია, სადაც უნევერსალ ჯგუფის დოქტორი აქთუელი სტატიაში, რომელიც 2013 წლის 12 ივლისსაა გამოქვეყნებული სახელწოდებით, “აქთუელი: აგვისტოს შუა რიცხვებში ხელფასის საკითხი მოგვარდება,” აცხადებს, რომ ბოლო დროს უნივერსალ ჯგუფში ხელფასთან დაკავშირებით განვითარებული მოვლენების გასარკვევად პირდაპირ ჯგუფის დირექტორს ბატონ მურათ აქანს ესაუბრნენ, რომელმაც “უნივერსალ ჯგუფის” სახელით ახსნა-განმარტება გააკეთა.
აღნიშნული ხსნა-განმარტების შინაარსი კი დაახლოებით ასეთია: როგორც მოგეხსენებათ აზმი ოფლუოღლუმ საავადმყოფოების ჯგუფის თავისი წილის 26 %, 2011 წელს, დაახლოებით 2 წლის წინ ჰოლანდიის საპენსიო ფონდისა PGGM, IFC და კერძო ფონდის ადმინისტრაციის ADM კაპიტალისგან შექმნილ კონსორციუმს მიყიდა, რის შედეგადაც სამეთვალყურეო საბჭოს გამოეყო და ადმინისტრაცია მთლიანად პროფესიონალებს ჩააბარა. აღნიშნული თანამშრომლობის ფარგლებში 2016 წლისთვის ფონდები მთლიანად გამოეყოფოდა საერთო კომპანიას და წილების გაყიდვის საკითხზეც შეთანხმებას მიაღწიეს. მარტში ჩატარებული გენერალური საბჭოს შემდგომ კონსორციუმმა ისე რომ არ დაელოდნენ 2016 წელს, მიმდინარე წელს ანუ დაგეგმილზე სამი წლით ადრე გამოეყო პარტნიორობას და თავიანთი წილის გაყიდვის გადაწყვეტილება მიიღეს. პარტნიორების მხრიდან მიღებული უნებლიე ნაჩქარევი გადაწყვეტილების შედეგად 2011 წელს შესრულებული 5 წლიანი გეგმა და ბიუჯეტის ერთს მხრივ გადამოწმებას საჭიროებდა, მეორეს მხრივ უნივერსალ ჯგუფის ხელახალი შეფასების საჭიროება დადგა დღის წესრიგში. ამ პერიოდში კაპიტალის ზრდა იყო დაგეგმილი, თუმცა უშედეგოდ. აღნიშნული გარემოებები, განსაკუთრებით ბოლო 3-4 თვის მანძილზე 2011 წელთან ერთად დაგეგმილმა ბიუჯეტმა უარყოფითი გავლენა მოახდინა ჩვენს კომპანიაზე და ამის გამო შეიქმნა პრობლემები ხელფასების დარიგების კუთხით. ჩვენი პარტნიორების მხრიდან დაიწყო ფულადი დახმარება, რის საშუალებითაც დაიწყო პრობლემების მოგვარება.
ის, რომ კომპანის სახელფასო კრიზისი აქვს და კაპიტალის ზრდის მოლოდინიც ფუჭი აღმოჩნდა, ამას მოწმობს აღნიშნული განცხადება.
“გურია ნიუსმა ამ საკითხზე კომენტარი ჯანდაცვის მინისტრთან დავით სერგეენკოსთან ჩაწერა.
_ ბატონო დავით, დღეს თბილისში “უნივერსალ ჰოსპიტალ გროუპის” დამფუძნებლები ჩამოდიან და სამ საათზე ჯანდაცვის სამინისტროში შეხვედრაა დანიშნული. თქვენ თუ აპირებთ ამ შეხვედრაზე დასწრებას და რა პირობებს წაუყენებთ თურქ ინვესტორს?
_ ჩვენ საავადმყოფოების მმართველებთან და საავადმყოფოების გაერთიანების ხელმძღვანელებთან ყოველკვირეული შეხვედრა გვაქვს სამინისტროში პრიორიტეტების მიხედვით. დღევანდელ შეხვედრაზე მე არ ვაპირებ დასწრებას და არ ვიცი, ამ ადამიანს რა უნდა. მას შეხვდება სამინისტროს ის წარმომადგენელი, რომელზედაც დელეგირებულია ეს საკითხები. მე არ მიმაჩნია, რომ ისეთი მნიშვნელოვანი რაღაც ხდება, რაც აუცილებლად მოითხოვს ჩემს დასწრებას.
_ როგორია სამინისტროს პოზიცია და თქვენი მოთხოვნები რა იქნება?
_ ჩვენი მოთხოვნები იქნება ის, რაც პრინციპში უკვე შესრულებულია, რომ უწყვეტად მიმდინარეობდეს სამკურნალო პროცესი და საფრთხე არ ემუქრებოდეს პაციენტების ჯანმრთელობას.
_ ჩვენ მოვიპოვეთ ინფორმაცია იმის შესახებ, რომ აღნიშნულ კომპანიას საკმაოდ სერიოზული ფინანსური პრობლემები აქვს, თქვენ ხომ არ მოგიკვლევიათ ამის შესახებ რაიმე სახის მასალები?
_ სამინისტროს კომპეტენციაში არ შედის მსგავსი ინფორმაციების მოპოვება, თუმცა გეტყვით რომ თუკი ჩვენ დავიწყებთ მათთან რაიმე სახის მოლაპარაკებებს, ყველა დეტალს და ინფორმაციას დავაზუსტებთ აღნიშნული კომპანიის საქმიანობის შესახებ.
_ სოციალურ ქსელებში საკმაოდ სკანდალური ინფორმაცია გავრცელდა თეკინ ათიკზეც, ამბობენ, რომ ის ნასამართლევია და საკმაოდ დიდხანს იჯდა ციხეში, ხომ არაფერი გსმენიათ ამის შესახებ?
_ ეს ადამიანი არ არის იმ კალიბრის, რომ საქართველოს მთავრობა დაჯდეს და მასზე თავი იმტვრიოს. მოიქცეს წესიერად და არავინ შეეხება. ჩვენ ნამდვილად ვერ დავხარჯავთ დროს მისი წარსულის გამოსაკვლევად.
