ნორვეგიისა და საქართველოს კულტურული მემკვიდრეობის დაცვის ეროვნულ სააგენტოებს შორის თანამშრომლობა ჯერ კიდევ 2011 წელს დაიწყო, რის საფუძველზეც ერთობლივი სამუშაოების ჩატარების ობიექტად არჩეული იქნა სენაკის მუნიციპალიტეტის სოფელი ნოქალაქევი.
როგორც სპეციალისტებმა აღნიშნეს, ნოქალაქევის ცალკეულ სეგმენტში საბჭოთა პერიოდში ცემენტისა და კირის ნაზავით აღდგენილმა ნაგებობებმა თანდათანობით დაშლა დაიწყეს, სწორედ ამიტომ ნორვეგიის მხარემ გამოაგზავნა სპეციალისტები, რომლებიც ქართველ არქიტექტორ–რესტავრატორებთან ერთად იმუშავებენ აღდგენა-რეკონსტრუქციაზე იმ კლიმატური პირობების გათვალისწინებით, რაც საქართველოშია.
ნოქალაქევის მუზეუმის დირექტორის, არქეოლოგის დავით ლომიტაშვილის თქმით, მიმდინარე სამუშაოების საპილოტე პროექტი 2011 წელს გახორციელდა. სწორედ ამიტომ დღეს უკვე სამუშაოები ზუსტდება და მომუშავე ჯგუფი სწორი გზით მიდის. მისივე თქმით, წინ ძალიან დიდი და სერიოზული სამუშაოებია, მთავარია, დასაბუთებული მეცნიერული მიდგომა.
ძეგლზე სამუშაოები ძველი ქართული ტრადიციული და ჩრდილო ნორვეგიული მეთოდებით მიმდინარეობს. უკვე ცნობილია, რომ სარესტარვაციო სამუშაოების დასრულების შემდეგ მუზეუმი სრულად განახლდება, აღდგენილი ძეგლები კი 100 წელი შეინარჩუნებს პირვანდელ სახეს.
