როდის მიიღო მთავრობამ ასეთი გადაწყვეტილება, რა კატეგორიას შეეხება ეს ცვლილება და როდის შევა ძალაში, ამასთან დაკავშირებით “გურია ნიუსთან” სოციალური მომსახურების სააგენტოს ხელმძღვანელი ნოე ქინქლაძე დეტალურად საუბრობს.
“პირველ რიგში, ეს ინიციატივა შეეხება პენსიონერებს. გაზრდილი პენსიის გამო, ზოგიერთ პენსიონერს ისეთი პირობები შეექმნა, რომ შეიძლება ვერ მოხვედრილიყვნენ უმწეოთა ბაზაში. ამასთან დაკავშირებით, მინისტრ დავით სერგეენკოს პირადი ინიციატივით, მთავრობამ მიიღო დადგენილება იმის შესახებ, რომ გაზრდილი პენსიის ოდენობა არ აისახოს უმწეოთა ქულების დათვლაზე.
_ დაახლოებით რამდენ პენსიონერზეა საუბარი?
_ საუბარია დაახლოებით 20 000 პენსიონერზე, რომელიც შესაძლოა, ბაზის გარეშე დარჩენილიყვნენ, საუბარია მარტოხელა პენსიონერებზე. ამიტომ, მთავრობამ მიიღო ასეთი გადაწყვეტილება.
_ რამდენადაც ჩემთვისაა ცნობილი, უმწეოთა სიებიდან არც იმ სოციალურად დაუცველებს ამოიღებენ, რომელთაც აქვთ ანტენები და ვაუჩერები მიწის დასამუშავებლად.
_ დიახ, უმწეოთა სიის შედგენის ფორმულაში სხვა ცვლილებებიც განხორციელდა. ამ ფორმულიდან გამოირიცხა სატელიტური ანტენა, რომლის გამოც ადამიანებს ეხსნებოდათ დახმარება. ასევე სიის შედგენისას არ მოხდება იმ მიწების გათვალისწინება, რომელიც სახელმწიფო ვაუჩერით დაიხნა, რადგან გამოვიდოდა ისე, რომ სახელმწიფომ მოგცა ფული, დაგეხმარა და მის სანაცვლოდ გართმევს სხვა ფულს. იმ მიწის ფართობის გათვალისწინება აღარ მოხდება დეკლარაციაში, რომლის დახვნის ვაუჩერი სახელმწიფომ მისცა ამ ხალს.
გარდა ამისა, კიდევ ერთი მნიშვნელოვანი ფაქტორია ის, რომ სიების გადამოწმება მოხდება შემოსავლების სამსახურის მონაცემებიდან, რათა რაც შეიძლება ობიექტური ინფორმაცია გვქონდეს იმის შესახებ, თუ ვინ რა შემოსავალს იღებს. ეს ჩვენ საშუალებას მოგვცემს, ობიექტურად ვაკონტროლოთ შემოსავლები და გადაწყვეტილებაც ობიექტურად მივიღოთ.
