ალექსანდრე ტუღუში 2011 წლის 8 დეკემბერს, ჰელმანდის პროვინციაში სოფელ დუაბში ქვეითად პატრულირების დროს ნაღმზე აფეთქდა და ორივე ფეხი დაკარგა.
“ალექსანდრე ტუღუშზე ვრცლად მესაუბრა პრეზიდენტი ობამა, რომელმაც ის საავადმყოფოში მოინახულა. მისი გმირობით აღტაცებული იყო ამერიკელი გენერალი პეტრიუსი, მასზე რამდენჯერმე მესაუბრა ადმირალი სტავრიდისი, რომელმაც პირადად მოინახულა მერიკაში. ეს არის ქართველი კაცის წარმოუდგენელი გმირობის, თავდადების და განსაკუთრებულობის ნამდვილი სიმბოლო. საქართველოს საუკუნეების განმავლობაში ესეთი შვილები თითზე დასათვლელად დაბადებია. ახლა ეს კაცი, რომელიც ამდენი წელი, ბოლო ამდენი თვეები ამერიკაში მკურნალობდა, ჩამოვიდა საქართველოში და მინდა გაჩვენოთ სად ცხოვრობს_ მუხათგვერდის სასაფლაოს მიახლოებულ ტერიტორიაზე, ფარეხში.
… აი, ეს ყველაფერი არის ჩვენი ეროვნული სირცხვილი, რომ ვიცე-პოლკოვნიკი ტუღუში, ომების გმირი, საქართველოს სიმბოლო ცხოვრობდეს ავტო ფარეხში, ამის შემდეგ თავმოყვარეობა გვაქვს ჩვენ საერთოდ?! ღირსებაზე შეიძლება ამის შემდეგ საუბარი ხალხნო?” – განაცხადა სააკაშვილმა.
სააკაშვილის თქმით, თავდაცვის სამინისტროს გადაეცემა მთავარსარდლის ბრძანება ვიცე პოლკოვნიკ ალექსანდრე ტუღუშის სამხედრო სამსახურში დასაქმების თაობაზე. ასევე პრეზიდენტი ინიციატივით მიმართავს დედაქალაქის მერს, საქართველო-რუსეთის ომში და ავღანეთის ოპერაციაში მებრძოლი სამხედრო უზრუნველყოს საცხოვრებელ ბინით.
პრეზიდენტის ამ განცხადებას იმ დღესვე გამოეხმაურა თავდაცვის სამინისტრო.
_ საქართველოს პრეზიდენტმა შეცდომაში შეიყვანა ქართული საზოგადოება, როდესაც განაცხადა, რომ ვიცე-პოლკოვნიკი ტუღუში დასაქმებული არ არის. თავდაცვის სამინისტრო ოფიციალურად აცხადებს, რომ ვიცე-პოლკოვნიკ ტუღუშს ამ დროისთვის ამერიკის შეერთებულ შტატებში თავდაცვის ატაშეს თანაშემწის თანამდებობა უკავია და ამ პოსტზე მისი ხელფასი საკმაოდ სოლიდურ თანხას წარმოადგენს. ანაზღაურების ზუსტ ოდენობას, კონფიდენციალობიდან გამომდინარე, თავდაცვის უწყება არ აკონკრეტებს. აქვე გვინდა კატეგორიულად განვაცხადოთ, რომ ვიცე-პოლკოვნიკს დაწერილი აქვს პატაკი ბინით უზრუნველყოფის შესახებ. ალექსანდრე ტუღუშის ბინით დაკმაყოფილების გადაწყვეტილება სამინისტროს შესაბამისმა კომისიამ ერთი კვირის წინ უკვე მიიღო. როგორც ყველა დაჭრილ სამხედროს, ასევე ვიცეპოლკოვნიკ ალექსანდრე ტუღუშს ბინა თბილისში გადაეცემა, _ განმარტეს თავდაცვის უწყებაში.
თავად ალექსანდრე ტუღუშს, რომელიც ოზურგეთში დაიბადა და გაიზარდა, მედიასთან კომენტარი ამ დრომდე არ გაუკეთებია. დედის, იამზე ტუღუშის განცხადებით, ის ძალიან განერვიულებულია ამ ყველაფრის გამო:
_ ალექსანდრე ინტერვიუს არ იძლევა. არავის მისცა.
_ ქალბატონო იამზე, პრეზიდენტის განცხადებაზე რას გვეტყვით… მან თქვა, რომ ალექსანდრეს ბინა არ აქვს, თავდაცვის სამინისტროში კი ამბობენ, რომ თქვენმა შვილმა ბინით უზრუნველყოფის თაობაზე პატაკი დაწერა და ის დააკმაყოფილეს…
_ არანაირი ბინა არ გააჩნია და ძალიან განერვიულებულია თვითონ. საერთოდ ბინა არ მოუთხოვია ამ კაცს. მას რეაბილიტაცია არ აქვს დამთავრებული. იმისთვის ჩამოვიდა, რომ ჯარისკაცები, რომლებსაც სჭირდებათ პროტეზირება და რატომღაც აქ არ დააფინანსეს, ამერიკაში წაიყვანოს. ავტოფარეხში მე თვითონ ვიყავი ჩემს შვილთან რამდენიმე დღე. ნერვიულობისგან ჩემი მეუღლე წაიქცა და შერყევა აქვს. ჩვენც ძალიან განერვიულებულები ვართ. ბინა სულ არ მოუთხოვია და რატომ ააგორეს ასეთი რაღაცა არ ვიცი.
_ პრეზიდენტის განცხადების თანახმად….
_ პრეზიდენტი რა შუაშია?! მას ბინა არ აქვს თბილისში. მე არც პრეზიდენტის განცხადება მაინტერესებს და არც მეორე მხარის, იმიტომ რაც ითქვა, ბინა _ არ აქვს.
_ ოზურგეთის სახლი ალექსანდრესი არ არის?
_ ოზურგეთის სახლი არის ზურაბ ტუღუშის და და აქ არის ალექსანდრეს ძმა.
_ ამჯამად სად მუშაობს ალექსანდრე?
_ ის მუშაობს ამერიკაში და როგორც კი იქ დაბრუნდება, სამსახურში გავა. ძალიან გთხოვთ, რაიმე ისეთი არ დაიწეროს მის გარეშე.
_ არა, მხოლოდ თქვენს სიტყვებს დავწერთ…
_ ისეთი ამბავია, ვინ ტყუილს ამბობს და ვინ მართალს _ ვერ გაიგებ. თვითონ არავის აძლევს ინტერვიუს, რადგან მას ბინა არ მოუთხოვია. მას ბინა მისცეს ადრე, თუმცა მერე აღარ დახვდა და იცოდა, რომ არ ჰქონდა.
_ წინა ხელისუფლებას გულისხმობთ?
_ ადრე მისცეს. ჩაუტანა შაშკინმა და ის ბინა მერე გაქრა.
_ უფრო რომ დავაკონკრეტოთ: მინისტრმა შაშკინმა მას ჩაუტანა დოკუმენტი, რომლითაც თბილისში ბინა ჰქონდა და ჩამოსულს არ დახვდა?
– დიახ. არ დახვდა ბინა. ეს ნამდვილად ასეა. იმის მერე არც მოუთხოვია და რატომ ააგორეს, რაში სჭირდებოდათ, არ ვიცი.
_ ხელისუფლება ყურადღებას გაქცევთ? ძველსაც ვგულისხმობთ და ახალსაც
_ არ ვიცი, მე ვერანაირ ყურადღებას ვერ ვხედავ. ადამიანს, რომელიც არის კოსოვოში ნამყოფი, ორჯერ ერაყში ნამყოფი და წითელი ზონის უფროსად ნამუშევარი, რომელიც არის ცხინვალის ომის მონაწილე და და მარჯვენა ფლანგზე იბრძოდა, რომელიც არის ავღანეთში, ამერიკელებთან ერთად ჩატარებული წარმატებული ოპერაციის მონაწილე, ხოლო მეორე ოპერაციაზე დაჭრილი და არცერთი ფეხი არ აქვს, ამნაირ ადამიანს ვერ ვხდები რა ყურადღება აქვს საერთოდ. ამიტომ ძალიან გაღიზიანებული ვართ და არც არანაირი სურვილი არ მაქვს ვისაც რა უნდა ის წეროს, _ აღნიშნა “გურია ნიუსთან” საუბრისას იამზე ტუღუშმა.
ვიცე პოლკოვნიკი ალექსანდრე ტუღუში 2004 წლიდან 19 ჯილდოს მფლობელია: მედალი “მხედრული მამაცობისთვის” (2004 წელი, კოსოვო); ნატო-ს მედალი კოსოვოს სამშვიდობო მისიაში მონაწილეობისთვის (2004 წელი); ამერიკის არმიის ღირსების მედალი (2006 წელი, ერაყი); ამერიკული მედალი ბრინჯაოს ვარსკვლავი (2008 წელი, ერაყი); ვახტანგ გორგასლის III ხარისხის ორდენი (2008 წელი, რუსეთ-საქართველოს ომი); მედალი 5 წლის უმწიკვლო სამსახურისთვის (2008 წელი); გენერალი კვინიტაძის მედალი (2009 წელი); მედალი “სამშობლოსთვის თავდადებული” (2009 წელი); მედალი 10 წლის უმწიკვლო სამსახურისთვის (2009 წელი); ქაქუცა ჩოლოყაშვილის მედალი (2010 წელი); ნატო-ს მედალი ავღანეთში ჩატარებული ოპერაციებისთვის (2010 წელი); მედალი სამშვიდობო ოპერაციებში მონაწილეობისთვის (2011 წელი); ვახტანგ გორგასლის II ხარისხის ორდენი (2011 წელი); გენერალ მაზნიაშვილის მედალი (2011 წელი);
ვახტანგ გორგასლის I ხარისხის ორდენი (2012 წელი); ამერიკის მედალი ბრინჯაოს ვარსკვლავი საბრძოლო (2012 წელი, ავღანეთის I მისიაში მონაწილეობისთვის); მედალი საბრძოლო იარისთვის (2012 წელი, ავღანეთი); მედალი “საბრძოლო დამსახურებისთვის” (2012 წელი); მედალი 15 წლის უმწიკვლო სამსახურისთვის (2013 წელი).
