“ახალგაზრდა ადვოკატების” აზრით, კომპანიები, რომელთა ვალდებულებაცაა მაღალსართულიან ბინებში ლიფტების გამართული მუშაობა უზრუნველყოს, ფაქტობრივად, უმოქმედონი არიან. შესწავლილი საკითხების ჩამონათვალი კი ასეთია:
- აღნიშნული კომპანიები, პრაქტიკულად უმოქმედო ლიფტებით ხალხს ძარცვავენ, რადგან მოსახლეობა პროტესტს გამოთქვამს ე.წ. “ჩაყლაპულ” 5 და 10 თეთრებზე;
- ლიფტით სარგებლობა, ხშირ შემთხვევაში, ერთ მოქალაქეს, 20-30 თეთრი უჯდება, რაც 2-3 სულიანი ოჯახისათვის, თვეში 25-30 ლარს შეადგენს;
- ხშირია მგზავრობის დროს ლიფტების ავარიული გაჩერება, სამაშველო სამსახურის გამოძახება. ავარიულ მდგომარეობაში არსებული ლიფტები საფრთხეს უქმნის ადამიანების სიცოცხლესა და ჯანმრთელობას, ხოლო უბედური შემთხვევის დადგომის შემთხვევაში, ლიფტების მუშაობაზე პასუხისმგებელ კომპანიას სანქცია არ ეკისრება;
- არ ხდება ლიფტების გამართულ მუშაობაზე პასუხისმგებელ კომპანიებზე ნებართვების ან ლიცენზიების გაცემა, რითაც თბილისის მერია სრულ ლოიალობას გამოხატავს პრობლემის მიმართ.
“ახალგაზრდა ადვოკატები” მიიჩნევს, რომ მაღალსართულიან ბინებში ლიფტების გამართულობაზე პასუხისმგებელი კომპანიები თბილისის მერიასთან დაახლოებული ჯგუფების ხელშია და “ლიფტების საქმიდან” შემოსული ფინანსების გამჭვირვალობა და ხარჯვითი ნაწილი, კორუფციულ ნიშნებს ატარებს. ორგანიზაცია, მოსახლეობის აზრის გათვალისწინებითაც საფუძვლიანად მიიჩნევს, რომ აღნიშნული კომპანიები დღემდე მოქმედებენ “ერთიანი ნაციონალური მოძრაობის” ყოფილი თუ მოქმედი მაღალი თანამდებობის პირების ინტერესებით და ახალი ხელისუფლების პირობებში მწვავედ დასმული ეს საყოფაცხოვრებო პრობლემა, შესაძლოა, ხელოვნურად და მიზანმიმართულად დაგეგმილი ქმედება იყოს.
“კომპანიები აგრძელებენ ხალხის ძართვას და შესაძლოა, ლიფტებიდან მიღებულ შემოსავალს პოლიტიკურ ინტერესებსაც ახმარდნენ. ამასთან, არ გამოვრიცხავთ ადგილი ჰქონდეს კომპანიების მხრიდან გადასახადებისგან თავის არიდებასაც, რადგან არანაირი კონტროლის მექანიზმი არ არსებობს, თუ რა შემოსავლებს ფლობენ ეს კომპანიები. მოშლილია იმის კონტროლიც, თუ ერთი კვირის განმავლობაში რამდენჯერ ივსება ლიფტის ყულაბები, რამდენია მისი შემოსავალი და ხდება თუ არა ამ შემოსავლების შესაბამისად, კომპანიების მხრიდან ბიუჯეტში გადასახადების გადახდა.” _ აცხადებენ “ახალგაზრდა ადვოკატები”
ორგანიზაცია თბილისის მერიას მიმართავს და მოითხოვს:
- შემოღებულ იქნას ნებართვები ან ლიცენზიები ამ კომპანიებისთვის;
- კომპანიებს მოეთხოვოთ “ჯანმრთელობის და სიცოცხლის დაზღვევა”, რაც შეამცირებს ფატალური შედეგების ალბათობას.
ორგანიზაციაში აცხადებენ, რომ გამოითხოვენ საჯარო ინფორმაციას და დაადგენენ, თუ რა საექსპლუატაციო ხარჯებთან არის დაკავშირებული არსებული მდგომარეობით ლიფტების მუშაობა, რა შემოსავლების მიმღებია მოქმედი კომპანიები ბაზარზე და რა მოგების მარჟაზეა შესაძლებელი იყოს საუბარი.
