პირველი საკითხის ირგვლივ: “ოზურგეთის მუნიციპალიტეტის გამგეობის სახანძრო-სამაშველო სამსახურში პირადი შემადგენლობის სამსახურის გავლის წესის შესახებ“ _ ოზურგეთის მუნიციპალიტეტის საკრებულოს დადგენილების დამტკიცების თაობაზე, დეპუტატმა მერაბ მჟავიამ ისაუბრა. მან აღნიშნა, რომ ეს საკითხი განიხილეს როგორც ბიუროს, ასევე საზოგადოებრივი დარბაზის სხდომაზე. ძირითადად ეს შეეხო ოზურგეთის მუნიციპალიტეტის გამგეობის სახანძრო-სამაშველო სამსახურში პირადი შემადგენლობის სამსახურის გავლის წესსა და იგივე სამსახურის საშტატო რიცხოვნობის რაოდენობას, სულ – 27 ერთეული. დადგენილების დამტკიცებას 21-მა დეპუტატმა ერთხმად უყარა კენჭი.
“სახელმწიფო შესყიდვების 2013 წლის გეგმაში ცვლილებებისა და დამატებების შესახებ,“სამსახურის უფროსმა ამირან გირკელიძემ ისაუბრა. მან ცალ-ცალკე გამოყო ცვლილებები ადგილობრივ და ცენტრალურ ბიუჯეტთან მიმართებაში. ადგილობრივ ბიუჯეტში ქაღალდის და მუყაოს შესყიდვისას წარმოშობილი ეკონომია, 2292 ლარი გადატანილი იქნება წვევამდელთა სატრანსპორტო მომსახურების ხარჯებში, საკანცელარიო საქონლის ხარჯიდან 1600 ლარი უნდა გამოიყენონ რვა ცალი ფოტოაპარატის შესაძენად, რომლის აუცილებელი საჭიროებაც არსებობს. სახელმწიფო ბიუჯეტიდან კი, 2012 წლის „სოფლის პროექტების“ გახორციელების ხარჯზე მიღებული ეკონომიიდან, 1400 ლარით დაეხმარებიან მაკვანეთის საბავშვო ბაღს, მეტალოპლასტმასის ფანჯრების შესაძენად. საპროექტო-საექსპერტო მომსახურების ხარჯებიდან 5000 ლარი გადაიტანება ქონების აუდიტორული შეფასების ხარჯში. სამოქალაქო სამუშაოების ხარჯი 50 ათასი ლარით შემცირდება და და აღნიშნული თანხა გამოყენებული იქნება შენობის დასრულების სამუშაოების შესასყიდად. (დაფინანსების წყარო საქ. მთავრობის 2013 წლის 6 სექტემბრის განკარგულება). აღნიშნულ საკითხსაც არ ჰყოლია მოწინააღმდეგე და ხანგრძლივი განხილვის გარეშე დაამტკიცეს.
სერიოზული დისკუსია გამოიწვია საკითხმა: “არასამეწარმეო იურიდიული პირის ოზურგეთის მუნიციპალიტეტის სკოლლამდელი სააღმზრდელო-საგანმანათლებლო ცენტრის დაფუძნების თაობაზე,“ ოზურგეთის საკრებულოს 2010 წლის 4 აგვისტოს განკარგულებაში ცვლილებების შეტანის შესახებ. მომხსენებელმა, ირინა საჯაიამ მოიშველია საქართველოს ორგანული კანონი „ადგილობრივი თვითმმართველობის შესახებ“, რომლის თანახმად ცვლილებები გახორციელდა სკოლამდელი სააღმზრდელო-
საგანმანათლებლო ცენტრის წესდებაში. კერძოდ, ცენტრის ფილიალები უზრუნველყოფილი უნდა იყოს ხარისხიანი სასმელი წყლით, აგრეთვე ცხელი წყლით, გათბობის და ვენტილაციის სისტემით, ბავშვთა სრულფასოვანი და მრავალფეროვანი კვებით. საჯაიას განცხადებაზე, რომ წელს საბავშვო ბაღებში გადასახადისგან გათავისუფლდნენ მშობლები, შეიქმნა ახალი ჯგუფები, თუმცა დაწესებულების მიღმა მაინც არაერთი ბავშვი დარჩა, დეპუტატმა ლევან ნინიძემ სრული სიის დასახელება მოითხოვა, რაც დაზუსტებული არ აღმოჩნდა. დეპუტატმა შალვა თავდიშვილმა განაცხადა, რომ სოფელ ძიმითში 16 ბავშვი ბაღის გარეთ დარჩა, მიუხედავად მშობლების სურვილისა. საკრებულოს თავმჯდომარის მოადგილემ ავთანდილ მექვაბიშვილმა აღნიშნულ პრობლემაზე ვრცლად ისაუბრა:
“რა თქმა უნდა, საბავშვო ბაღს მიღმა დარჩა ბავშვები, თუმცა ამ ვითარების ზუსტი ანალიზი უნდა გვქონდეს, რატომ დარჩა, არის თუ არა საერთოდ საბავშვო ბაღები ყველა სოფელში. მაგალითად, ჯუმათში და ვაკიჯვარში და კიდევ არაერთგან საერთოდ არაა. ბუნებრივია, იქ ბავშვებიც ვერსად წავლენ. გარდა ამისა, სტანდარტზე უნდა ვიზრუნოთ. 37 სკოლამდელი დაწესებულებაა მუნიციპალიტეტში და ზუსტად ორი თუ პასუხობს სტანდარტებს. ქობულეთში 10 საბავშვო ბაღია და ყველა იდეალურია. რომელი სჯობს?” – აღნიშნა მექვაბრიშვილმა.
ირინა საჯაიამ განმარტა, რომ ახლა რეალობის წინაშე დგანან. გასაუმჯობესებელია სტანდარტი და დასამატებელია ჯგუფები, რაც მომავალი სასწავლო წლიდან გახორციელდება. დეპუტატებმა დასვეს აგრეთვე საკითხი ბაღებში მომუშავე არაპროფესიონალების შესახებ, რომელთა უმრავლესობას არ გააჩნია ცენზი.
საკრებულოს სხდომაზე მოისმინეს ასევე ა(ა)იპ “ოზურგეთის სპორტის განვითარების ცენტრის დირექტორის ანგარიში გაწეული მუშაობის შესახებ, რაზეც ცენტრის დირექტორის მოადგილემ გოჩა კვანტალიანმა ისაუბრა. იკამათეს ოლიმპიური კომიტეტის გადაწყვეტილებაზე, ოზურგეთის სპორტის განვითარების ცენტრის დარბაზისთვის ვახტანგ ბლაგიძის სახელის მინიჭების თაობაზე. რატომ ბლაგიძე და არა კვირკველია? ასე დასმული საკითხი პასუხგაუცემელი დარჩა.
დღის წესრიგის ბოლო საკითხის: “ოზურგეთის მუნიციპალიტეტში სოფლის მეურნეობის განვითარების სტრატეგიის შემუსავების მიზნით, სამეცნიერო კონფერენციის მოწვევის შესახებ“ – საკრებულოს თავმჯდომარემ ავთანდილ სურგულაძემ ისაუბრა. ეს კონფერენცია 25 ოქტომბრისთვის უნდა გაიმართოს, სადაც განხილული იქნება ახალი, პროგრესული მეთოდებისა და სისტემის დანერგვის შესახებ სტრატეგიის დანერგვა. სამეცნიერო კონფერენციის მოწვევის და გამართვის ვადების დადგენა ავთანდილ სურგულაძეს დაევალა, კონფერენციის წარმართვისთვის საჭირო წარმომადგენლობითი ხარჯების გამოყოფა კი, ოზურგეთის გამგებელს _ კოტე შარაშენიძეს. აღნიშნულ განკარგულებას დეპუტატებმა დიდი მოწონებით უყარეს კენჭი, თუმცა არაერთმა მათგანმა აღნიშნა, რომ 27 ოქტომბერს საქართველოში საპრეზიდენტო არჩევნები უნდა გაიმართოს და ადვილი შესაძლებელია, კონფერენციის ჩატარება ნოემბრის თვეში გადაიდოს.
