შეგახსენებთ, რომ შეხვედრაზე ივანიშვილმა ექსპერტებისგან მათ მიერ გაკეთებულ შეფასებებზე ახსნა-განმარტებები მოითხოვა და არაობიექტურობაში დაადანაშაულა.
საყვარელიძე მიიჩნევს, რომ პრემიერთან შეხვედრისას ყველა ექსპერტმა გაბრაზებული თუ გაღიმებული სახით ამაზე საკუთარი დამოკიდებულება გამოხატა და თავის სიტყვებზე უკან არავის დაუხევია.
კითხვაზე, რამდენად სწორად მიაჩნია პრემიერის მხრიდან ექსპერტების კრიტიკა, პოლიტოლოგი პასუხობს, რომ “ივანიშვილთანაც და სხვებთანაც ეგ აცრა უკვე გაკეთებული აქვს”.
“გახსოვთ, ალბათ, პირველი თუ მეორე წერილი რომ გამოაქვეყნა, იქ პერსონალურად მე მაკრიტიკებდა – შუალედური პოზიცია უკავიაო. მისი შესაფასებელი არაა, როგორ პოზიციას დავიკავებ. ის შეიძლება დაეთანხმოს ან არ დაეთანხმოს, მაგრამ თუ მას, როგორც პოლიტიკოსს რამე არ აწყობს, ეს მხოლოდ იმაზე მიუთითებს, რომ ექსპერტი ობიექტურობასთან ახლოსაა,” _ აცხადებს საყვარელიძე.
პოლიტოლოგი ასევე აღნიშნავს, რომ პრემიერთან გუშინდელ შეხვედრაზე სწორედ ის საექპერტო კორპუსი იმყოფებოდა, რომლის მიმართაც სააკაშვილიც კრიტიკული იყო.
“ფაქტობრივად, რამდენიმე მათგანის გარდა, ყველა აკრძალულები ვიყავით. ახლა თუ აღმოჩნდება, რომ ექსპერტთა ის ნაწილი, რომელიც სააკაშვილისგან შემწყრალები ვიყავით, ივანიშილისგანაც შემწყრალია, ე.ი. ჩვენს საქმეს კარგად ვაკეთებთ, პოზიციას არც ერთ პოლიტიკურ ნიავქარზე არ ვიცვლით და სათქმელს ვამბობთ მაშინ, როდესაც ის მწიფდება.
არ მგონია, რომ ივანიშვილისთვის გუშინდელი დღე მომგებიანი იყოს და ეს თვითონაც შეამჩნია. იმიტომ, რომ ამ ძალიან გრძელი ინტერვიუს მეორე ნაწილი უკვე სხვა ტონში მიმდინარეობდა – თვითონაც რბილი იყო და ექსპერტების მხრიდანაც შემსუბუქდა სიტუაცია. როგორც ხშირად სჩვევია ხოლმე, რომ მოგვიანებით ასწორებს შექმნილ სიტუაციას, ეტყობა, აქაც ანალოგიური მდგომარეობა შეიქმნა,” _ უთხრა საყვარელიძემ “გურია ნიუსს”.
პოლიტოლოგის თქმით, იყო დრო, როცა ექსპერტთა ის ნაწილი, რომელიც გუშინ ივანიშვილთან შეხვედრაზე იყო, საზოგადოებას საერთოდ არ სურდა, რადგან სააკაშვილზე კრიტიკული შენიშვნები ჰქონდა.
“თუმცა, გავიდა დრო და საზოგადოება მიხვდა, რომ არავის მტრები არ ვართ და სიმართლე ჩვენს მხარეზეა.
საზოგადოებრივი ემოცია შეიძლება სწორი ან არასწორი იყოს, მაგრამ ივანიშილის, როგორც პოლიტიკოსის გუშინდელი მოქმედება რამდენად სწორი იყო, სხვა საკითხია. ივანიშილის მიერ ჩვენთვის ე.წ. შენიშნების მოცემა, ისევე, როგორც მედიის წარმომადგენლებისთვის, მისთვის ერთნაირად წამგებიანია. გუშინ ჩვენ იქ ფაქტობრივად, როგორც მედიაფიგურები, ისე ვიყავით,” _ აღნიშნა ექსპერტმა.
