კუბლაშვილი რამდენიმე მიმართულებით იბრძვის: მას სურს, მოქმედი მოსამართლეების უვადოდ გადანიშვნა და ახალი მოსამართლეების გამოსაცდელი ვადისგან გათავისუფლება, თუმცა, იუსტიციის სამინისტროს და თავად მინისტრს ამ საკითხზე ურყევი პოზიცია გააჩნიათ: მოქმედი მოსამართლეების უვადოდ გადანიშვნა არ მოხდება და არც ახალი მოსამართლეები დაინიშნებიან გამოსაცდელი ვადის გარეშე. ერთადერთი, რაზეც სავარაუდოდ მიღწეულია კონსენსუსი, მოსამართლეების ხელფასების გაზრდაა.
რამდენიმე დღის წინ სასამართლოსთან თანამშრომლობის ჯგუფთან შეხვედრისას კუბლაშვილმა მთავრობას მოსამართლეებისთვის ხელფასის გაორმაგება მოსთხოვა: რაიონული (საქალაქო) სასამართლოს მოსამართლეს _ 4 000 ლარი, სააპელაციო სასამართლოს მოსამართლეს _ 5 000 ლარი, ხოლო უზენაესი სასამართლოს მოსამართლეს _ 6 ათასი ლარი.
პრემიერ-მინისტრმა ივანიშვილმა იუსტიციის საბჭოს მდივანთან ლევან მურუსიძესთან შეხვედრისას განაცხადა, რომ მოსამართლეებს ხელფასები გაეზრდებათ, თუმცა, კუბლაშვილის მთავარი მიზანი ძველი მოსამართლეების უვადოდ გადანიშვნასთან დაკავშირებით, ჯერაც მიუღწეველია.
მიმდინარე კვირას პარლამენტმა პირველი მოსმენით განიხილა კანონპროექტი, რომელიც საქართველოს ორგანულ კანონში “საერთო სასამართლოების შესახებ” ცვლილებებს უკავშირდება. უზენაესი სასამართლოს თავმჯდომარე პარლამენტს აღნიშნული პროექტის განხილვის 2014 წლის აპრილამდე შეჩერებას სთხოვს.
კუბლაშვილი ამტკიცებს, რომ აღნიშნული კანონპროექტის დაჩქარებული წესით განხილვა ყოველგვარ აზრს კარგავს, რადგან 15 ოქტომბრის შემდეგ ვერც ერთი ახალი მოსამართლე ვერ დაინიშნება.
“ობიექტური ვითარებიდან გამომდინარე, 15 ოქტომბრის შემდეგ საქართველოს სასამართლო სისტემაში ვერც ერთი ახალი მოსამართლე ვეღარ დაინიშნება, რადგან 15 ოქტომბერს საქართველოს იუსტიციის უმაღლესი საბჭო კენჭს უყრის იმ კანდიდატებს, რომლებიც ახლა დაინიშნებიან მოქმედი ძველი წესით, ათი წლის ვადით. ამის შემდეგ უკვე არც ადამიანური რესურსი და არც ობიექტური საჭიროება აღარ იარსებებს, რომ სასამართლო სისტემაში ახალი მოსამართლეები დაინიშნონ.”
კოტე კუბლაშვილმა დღეს ისევ გააკრიტიკა კანონპროექტის ის დებულება, რომელიც ახალი მოსამართლეებს სამწლიან გამოსაცდელ ვადას უწესებს. მისი თქმით, ვენეციის კომისიას და არასამთავრობო სექტორს ამ მუხლთან დაკავშირებით მკვეთრად უარყოფითი პოზიცია აქვთ.
