საპროტესტო აქციას შეუერთდნენ მე-13 პედიატრიული პოლიკლინიკის ექიმებიც.
მეცამეტე პოლიკლინიკის დირექტორი ხათუნა კერესელიძე: “შუა ქალაქის” კოლეგებს სოლიდარობას ვუცხადებთ. კოლექტივმა რამდენიმე დღის წინ არჩევნები ჩაატარა და დირექტორად მანანა ელიზბარაშვილი აირჩია, მაგრამ ამის საპასუხოდ დედაქალაქის ქონების მართვის სააგენტომ სხდომა მოიწვია, სადაც “მედიკომის” კანდიდატი გაიყვანა, ვინმე მიქაუტაძე, რომლის სახელიც კი არ ვიცით. მხოლოდ ისაა ცნობილი, რომ ექიმი არ არის. ყოფილი დირექტორი ვოვა ზარდანიშვილი საქმის კურსში არ ჩაუყენებიათ. ის ბიულეტენზე იყო გასული. კოლექტივი აღშფოთებულია ამით და ახალ დირექტორს აუჭედეს კარები. ჩვენ, მეცამეტე პოლიკლინიკიდან, რომელიც ასევე “მედიკომს” ეკუთვნის, ჩამოვედით კოლეგების მხარდასაჭერად. დამთავრდა ის დრო, როდესაც ადამიანებს პატივს არ ცემდნენ. არ მივცემთ უფლებას, ამ ორი პოლიკლინიკის და იმ 10 ათასი ბენეფიციარის ბედი, რომელსაც, პირადად, ჩვენი პოლკლინიკა ემსახურება, ასე ხელაღებით გადაწყვიტონ”.
როგორც მედიცინის მუშაკთა პროფკავშირების პრეზიდენტი ჯონი ჯანაშია აცხადებს, კომპანია “მედიკომს”, რომელმაც აუქციონის სახით გასული წლის ნოემბერში მერიისგან შეიძინა მეცამეტე პოლიკლინიკა და “შუა ქალაქში”, თანხა ჯერ გადახდილი არ აქვს, ამიტომ მის მიერ დირექტორის დანიშვნა კანონის ფარგლებს სცილდება.
“კომპანია “მედიკომს” მხოლოდ ბიჯი აქვს გადახდილი და ამიტომ არ არიან კანონიერი მფლობელები. ამის მიუხედავად მათ მოხსნეს პოლიკლინიკის დირექტორი, რომელიც ბიულეტენზე იმყოფებოდა და დანიშნეს საკუთარი წარმომადგენელი. არავინ არ იცის, აქ დარჩება თუ არა პირველადი დახმარების ცენტრი, რომელიც ამ უბნის მოსახლეობას ემსახურება. ჩვენი მოთხოვნაა, უკანონო გაყიდვა შეწყდეს და სახელმწიფოს დაუბრუნდეს ეს კონკრეტული პოლიკლინიკა”, _ აცხადებს ჯონი ჯანაშია.
სამკურნალო-პროფილაქტიკური ცენტრ “შუა ქალაქის” ექიმის მანანა ელიზბარაშვილის თქმით, კომპანია “მედიკომს” ფინანსური პრობლემები აქვს და მათი პოლკლინიკის ბანკში ჩადება უნდა. ვინაიდან თანხა ჯერ არ გადაუხდია და “შუა ქალაქის” ფინანსების განკარგვის უფლება კანონით არ აქვს, თავიანთი წარმომადგენელი დანიშნეს. ელიზბარაშვილი ამბობს, რომ ამით “მედიკომს” საშუალება მიეცემა ექიმების სახელფასო ფონდი ბანკში გარანტად ჩადოს და პრივატიზაციის თანხა გადაიხადოს.
“მერიამ გასული წლის 20 ნოემბერს აუქციონზე გამოავლინა გამარჯვებული და ორი შ.პ.ს. გაყიდა. ინვესტორი, რომელსაც მერიამ პოლიკლინიკები მიჰყიდა, არის აბსოლუტურად გაკოტრებული ადამიანი. მისი მფლობელი კახაბერ ლომსაძე თავად აცხადებს, რომ არ აქვს არანაირი ქონება. ახლა კი უნდა, რომ ბანკში ამ პოლიკლინიკის ჩადებით გაისტუმროს დარჩენილი ვალი. ჩვენ არ მივცემთ დირექტორის ცვლილების და ჩვენი ფინანსების განკარგვის უფლებას. სრული უნდობლობა გვაქვს მერიის მიმართ. ეს არის დაწესებულების და ჯანდცვის ობიექტების მიზანმიმართული ნგრევა”, _ აცხადებს ელიზბარაშვილი.
აქციაზე იმოფებოდა ჯანდაცვის სამინისტროს წარმომადგენელი პაატა ჟორჟოლიანი, რომელმაც ოფიციალური კომენტარის გაკეთება არ ისურვა. მან პირად საუბარში აღნიშნა, რომ ასეთ შემთხვევაში სამინისტროს მხრიდან რაიმე ქმედების განხორციელება მერიის საქმიანობაში უხეშ ჩარევად აღიქმება. თუმცა ჟორჟოლიანის განცხადებით, ამაზე სამინიტრო მუშაობს და კანონპროექტსაც წარადგენს პარლამენტში.
მედიცინის მუშაკთა პროფკავშირის საერთაშორისო და საზოგადოებასთან ურთიერთობის უფროსი სპეციალისტი ნატო გოგავა ამბობს, რომ სამწუხაროდ, ჯანდაცვის სამინისტროს ამ ეტაპზე არ გააჩნია არანაირი ბერკეტი ამ პრობლემის მოსაგვარებლად. თუმცა, ის საქმის კურსშია. ძირითადი ბერკეტი კი მერიას უკავია.
მერია კი, როგორც აქციის მონაწილეები აცხადებენ, უკანონო გარიგებაშია ინვესტორთან.
აქციაზე იმოფებოდა პარტია “დემოკრატიული მოძრაობა ერთიანი საქართველოს” წევრი შალვა ოგბაიძე, რომელიც ექიმებს გვერდში დგომას დაჰპირდა.
“ქალაქის მერია, ვისაც ეს თემა ეხება, რა ხანია გასულია მომსახურების ზონიდან. მასთან კოაბიტაცია უნდა დასრულდეს, რადგან ბილწთან ზავის შეკვრა არ შეიძლება. ასეთ უსამართლობაზე ხელები არ უნდა ჩამოვუშვათ. გაძლევთ პირობას, რომ თქვენ გვერდით ვიქნებით”, _ აღნიშნა ოგბაიძემ.
ექიმები აქციების გაგრძელებას აპირებენ. მედიცინის მუშაკთა პროფკავშირების პრეზიდენტის თქმით, პოლკლინიკების გასხვისების თემაზე ხვალ 12 საათზე საკრებულოს გაფართოებულ სხდომაზეც იმსჯელებენ.
