ორგანიზაციამ, 31 ივლისსა და 28 ოქტომბერს, საზოგადოებას მიაწოდა ინფორმაცია 1) სენაკის სამხედრო ბაზაზე, ივლისის თვეში 52 ჯარისკაცის მოწავლისა და 2) 16-22 სექტემბრის შუალედში, 31-ე ქარხნის ტერიტორიაზე არსებულ ბრიგადაში, მე-11 ბრიგადასა და საინჟინრო ბრიგადაში 330 ჯარისკაცის მოწამვლის ფაქტები. პირველი შემთხვევა სამინისტრომ დაადასტურა, მეორე ფაქტთან დაკავშირებით კი, სამინისტრომ საჯარო განცხადებაში, კომენტარი არ გააკეთა. ორგანიზაცია კვლავ ფლობს ინფორმაციას ჯარისკაცების საკვები პროდუქტებით მოწამვლასთან დაკავშირებით. მიღებული ინფორმაციის საფუძველზე, შემთხვევა ვაზიანის სამხედრო ბაზაზე, I ქვეით ბრიგადაში მოხდა. მიღებული ინფორმაციით, კვებითი ინტოქსიკაციით მოიწამლა 20 სამხედრო მოსამსახურე.
“მოვითხოვთ, დაუყოვნებლივ დაიწყოს სამხედრო ნაწილებში არსებული სასადილოების შემოწმება, მათ შორის ჰიგიენური ნორმების დადგენის მიზნით და უმკაცრესად დაისაჯონ პირები, რომლებიც ვერ უზრუნველყოფენ სფეროს გამართულ მენეჯმენტს და უმოქმედობით ზიანს აყენებენ როგორც სამინისტროს, ასევე საჯარისო ნაწილებს. ორგანიზაციას გააჩნია ინფორმაცია, რომლის თანახმადაც, გაუმართავია ინფრასტრუქტურა რამდენიმე სამხედრო ნაწილში. მაგალითად, მარნეულსა და ვაზიანის შენაერთებში არსებობს სასადილოებისა და საშხაპეების ნორმალური ფუნქციონირების პრობლემები. მართალია, ვაზიანის სამხედრო ბაზა გარემონტდა, თუმცა არსებული მდგომარეობით, გაუმართავია საკანალიზაციო სისტემა. ყოველივე ეს, სერიოზულ დისკომფორტს ქმნის ჯარისკაცებისათვის და მომსახურე პერსონალთათვის.” _ აცხადებენ “ახალგაზრდა ადვოკატები”.
ორგანიზაციაში აცხადებენ, რომ მომავალშიც გამოავლენენ მსგავს შემთხვევებს და მიუთითებენ საჯარო უწყებას, მიიღოს შესაბამისი ზომები პრობლემების აღმოსაფხვრელად. მათი განცხადებით, ჯარისკაცების მოწამვლის ფაქტები, მიუთითებს საქართველოს შეიარაღებული ძალების კვების უსაფრთხოებაში არსებულ პრობლემების გამოუსწორებლობაზე.
“მართალია, კომპანია “ქართული კვების” მენეჯმენტი შეიცვალა, რომელიც თავდაცვის სფეროში კვებითი უზრუნველყოფის მიმართულებით, ერთ-ერთი მთავარი კონტრაქტორია, თუმცა სამხედრო მოსამსახურეების საკვები პროდუქტებით მოწამვლის ფაქტი კვლავ რეალობაა. ორგანიზაცია სამინისტროს მიმართავს, დააყენოს კვებით უზრუნველყოფაზე კონტრაქტორი კომპანიების პასუხისმგებლობა და თითოეული გამოვლენილი შემთხვევის მიმართ, ჰქონდეს მკაცრი რეაგირება. ორგანიზაციას კომპანიის მიმართ უკვე გააჩნია შესაბამისი შეკითხვებიც:
- რა პრობლემები მოაგვარა ან ვერ მოაგვარა კომპანია “ქართული კვების“”ახალმა მენეჯმენტმა?
- რამდენად შეძლო კომპანიამ პრიორიტეტად გამოცხადებული კვების ხარისხის ზრდა და მუშა პროცესების შეპირებული მართვა?
- რამდენად სრულყოფილად მოხდა დაპირებული სასადილოების პერსონალის ინდივიდუალური საქმეების შესწავლა და რა საკადრო ცვლილებები განხორციელდა ამ მიმართულებით?
- რომელ საჯარისო ნაწილებში დასრულდა სასადილოების რემონტი, რა პერიოდი დასჭირდა თითოეული სასადილოს მოწესრიგებას?
- ვის მიერ და რა პერიოდულობით მოწმდება შინაგანაწესი, რომელიც პერსონალს მაღალ ჰიგიენურ სტანდარტს ავალდებულებს, გამოვლინდა თუ არა გადაცდომები ასეთი შესაძლო კონტროლის პროცესში?
- რა კონტროლის მექანიზმია ჩართული საკვები პროდუქტების ვარგისიანობის შესამოწმებლად? მონაწილეობს თუ არა კონტროლის მექანიზმში საქართველოს სოფლის მეურნეობის სამინისტროს სურსათის ეროვნული სააგენტო?
- რამდენად მაღალი ჰიგიენური სტანდარტებით გამოირჩევა ადგილები, სადაც დასაწყობებული საკვები პროდუქტები ინახება?
- რა ღირებულების შესყიდვებს ახორციელებს “ქართული კვების კომპანია?”
“თუკი სამინისტროს შესაბამის რეაგირება “ქართული კვების“ კომპანიის მენეჯმენტის საქმიანობაზე მხოლოდ იმ მიზეზით არ ხდება, რომ კომპანიის დირექტორის მოადგილე, ეკა ხურციძე მინისტრის ოჯახის ახლობელია, ასეთი მიდგომები კიდევ უფრო მეტად დააზიანებს საერო საქმეს. ამიტომაც, მივმართავთ სამინისტროს გენერალური ინსპექციას, სამხედრო პოლიციას, ჯარების ლოჯისტიკური უზრუნველყოფის სარდლობის ხარისხის კონტროლის განყოფილების შესაბამისს წარმომადგენლებს, რომ უპასუხოდ არ დატოვოს ლოჯისტიკის გამართულობასთან დაკავშირებული არც ერთი კითხვა.” _ განუცხადეს “გურია ნიუსს” ახალგაზრდა ადვოკატებმა.
შპს “ქართული კვების კომპანია” კატეგორიულად უარყოფს საქართველოს შეიარაღებული ძალების სხვადასხვა სამხედრო ნაწილში სამხედრო მოსამსახურეთა მოწამვლის ფაქტს.
აღნიშნულთან დაკავშირებით კომპანია განცხადებას ავრცელებს, რომელსაც “გურია ნიუსი” უცვლელად გთავაზობთ:
“გავრცელებული ინფორმაცია, რამდენიმე ასეული სამხედრო მოსამსახურის მოწამვლასთან დაკავშირებით, სინამდვილეს არ შეესაბამება. რამდენიმე ჯარისკაცს, და არა ათეულობით ან ასეულობით მათგანს, მხოლოდ ერთხელ დაუდგინდა დიარეა საველე ბაზაზე. სამხედროები დაუყონებლივ გადაიყვანეს გორის სამხედრო ჰოსპიტალში, სადაც მათ შესაბამისი მკურნალობა ჩაუტარდათ. შპს “ქართული კვების კომპანიის” მიერ სამხედრო მოსამსახურეთა მოწამვლის ფაქტი ოფიციალურად არ დადასტურდა,” _ ნათქვამია განცხადებაში.
დღეს, ამ საკითხთან დაკავშირებით კომენტარი კომპანიის დირექტორის მოადგილე ირაკლი ფირცხალაიშვილმაც გააკეთა:
“არ ვეთანხმებით იმ ციფრებს, რაც სტატიებში ბოლო დროს გამოქვეყნდა. რამდენიმე ხნის წინ დაფიქსირებული მოწამვლის შემდეგ, ჯარისკაცები გადაყვანილი იყვნენ გორის სამხედრო ჰოსპიტალში, სადაც სამი დღის მანძილზე ჩაუტარდათ გამოკვლევები. ლაბორატორიულმა კვლევებმა არ დაადასტურეს საჭმლით მოწამვლა. ზოგადად დადგინდა, რომ ეს იყო დიარეა. დიარეა ეს არის მოწამვლის ყველაზე მსუბუქი ფორმა, რომელიც შეიძლება იყოს გამოწვეული, როგორც სანიტარულ–ჰიგიენური ნორმების დარღვევით, ასევე რაიმე ენტეროვირუსით ან სხვა მიზეზის გამო. ჩვენ არ ვადასტურებთ ამ ფაქტს და იმ რაოდენობებს, რომელიც იქნა გამოქვეყნებული. საკვების ყოველი გაცემის წინ თავდაცვის სამინისტროს სამედიცინო სამსახური იღებს ნიმუშებს ყველა მომზადებულ საკვებზე და ეს ინახება შემდგომი ლაბორატორიული სამუშაოებისთვის. მოხდა ასევე ამ ნიმუშების შესწავლა, რის შედეგადაც საჭმლით მოწამვლა არ დადასტურდა,” _ განაცხადა ფირცხალაიშვილმა.
