ორშაბათს, ოზურგეთის მუნიციპალიტეტის გამგეობას მოქალაქეებთან მიღების დღე აქვს. ამ დღეს, აქ ბევრ სოციალურად დაუცველ, პრობლემებით სავსე და შეჭირვებულ ადამიანს ნახავთ. ხშირად დიდი რიგებია. ამ ეტაპზე გამონაკლისი დაუშვეს და უკანავიდან (მთისპირის თემი) ჩამოსული შეზღუდული შესაძლებლობის მქონე თამუნა შავაძე და მის ოჯახის წევრები ურიგოდ გაატარეს.
შავაძეების შესახებ “გურია ნიუსი” ხშირად წერს _ თამუნას საჩქარო ოპერაცია ესაჭიროება. ამ დღეებში ისრაელიდან ექიმების ჯგუფი უნდა ჩამოვიდეს, შემდეგ კი ოპერაციისთვის მზადება დაიწყოს, რომელიც საკმაოდ ძვირადღირებულია _ 50 000 ათასი ევრო ღირს, რისი გადახდის საშუალება შავაძეებს არ აქვთ. ადგილობრივ ხელისუფლებას ისინი ჯანდაცვის სამინისტროსთან ან გადაცემასთან _ “ვის უნდა 20 000” შუამდგომლობას სთხოვს, მაგრამ პასუხი არ ჩანს. თამუნამ ხელისუფლებასთან შეხვედრა ითხოვა.
მიღების დღეს მუნიციპალიტეტის გამგებელი გია ტაკიძე ადგილზე არ იმყოფებოდა, არც მისი მოადგილეები _ მიხეილ გოგოტიშვილი და ვლადიმერ ქვილორია აღმოჩნდნენ სამსახურში. ამიტომ მოსახლეობას გამგებლის მესამე მოადგილე ლაშა ღლონტი, გიორგი შილაკაძე, ნათია ვაშალომიძე და ოთარ გეგიაძე შეხვდნენ.
თამუნა შავაძის და ხელისუფლების შეხვედრა ძალიან ემოციური გამოდგა. გოგონა მხოლოდ იმას ითხოვდა, რომ, იქნებ, დაეხმარონ და გადაცემაში მოხვდეს. შეწუხდნენ ხელისუფლების წარმომადგენლებიც და შავაძე ოჯახთან ერთად გუბერნატორისკენ გაისტუმრეს. თუმცა, როგორც მათ უთხრეს, ახლა შესვენების დრო იყო და სამსახურში მხოლოდ გუბერნატორის მოადგილე თამაზ მახარაძე იმყოფებოდა. მესამე სართულზე ასულებს, მახარაძეც შესვენებაზე დახვდათ წასული. მოკლედ, თამუნა კვლავ იმედგაცრუებული დაუბრუნდა სოფელს, თან ძალიან გულნატკენი:
_ არაფერს ვითხოვ ისეთს, რაც არ მეკუთვნის. არც პოლისი მაქვს და არც სოციალური დახმარება. 2010 წელს, არჩევნებისას, ვთხოვე კანდიდატებს _ ვიცი, 50 000 ევროს გადახდის საშუალება არ აქვს ადგილობრივ ხელისუფლებას, მაგრამ იქნებ, დამეხმაროთ, ან ჯანდაცვის სამინისტროსთან მიშუამდგომლოთ ან გადაცემაში _ “ვის უნდა 20 000 ათასი” მოვხვდე, მაგრამ, არაფერი გამოვიდა. წლები კი გადის და თანდათანობით სხვა პრობლემები იჩენს თავს, არადა, ძალიან მჭირდება ეს ოპერაცია, მომენატრა ფეხზე დადგომა.
დედაჩემსაც იმიტომ ვატარებ ყოველ ორშაბათს გამგეობაში, იქნებ, რამე სიახლე იყოს, მაგრამ, არაფერი იცვლება. გვივრცელებენ ხმას, თითქოს ჩვენ ოპოზიციის მხარდამჭერები ვართ. იქნებ, რამაზ ნიკოლაიშვილის ყურამდე მივიდეს ჩემი ამბავი. ახლა ძალიან მჭირდება ყველას დახმარება, რადგან ისრაელიდან ამ დღეებში ჩამოდიან ექიმები. სად იშოვოს ჩემმა ოჯახმა 50 000 ევრო? სოფელში სამუშაო ადგილები არ არის, ხალხს პენსიიდან პენსიამდე ან სოციალურ დახმარებით გააქვთ თავი. სოციალური მომსახურების სააგენტოს თუ დავუჯერებთ, უმდიდრესი ოჯახი გვაქვს, თურმე, და დახმარებას მაინც ვითხოვ. მოვიდა სოფელში ახალი პოლისები და არ ვარ სიაში. სახლი როცა დამეცემა თავზე, მაშინ დამენიშნება სოციალური დახმარება?! თქვენამდე მინდოდა მომეტანა ჩემი გულისტკივილი, ამისთვის ჩამოვყევი დედაჩემს. იქნებ, გააგებინოთ ხელისუფლებას ჩემი გაჭირვების შესახებ, _ ჩინოვნიკებისთვის სათქმელი ჩვენთან თქვა თამუნა შავაძემ.
გურიის გუბერნატორმა ვალერიან ჩიტაიშვილმა გვითხრა, რომ, შეძლებისდაგვარად, აუცილებლად დაეხმარება შავაძეების ოჯახს:
_ შეგვიძლია, საქართველოში დავუფინანსოთ კურსები, მაგრამ, სამწუხაროდ, 50 000 ევროს გადახდას ვერ დავპირდებით, _ თქვა გუბერნატორმა.
სოციალური მომსახურების სააგენტოს გურიის საკოორდინაციო ცენტრის უფროსის ვასილ ხომერიკის თქმით, როდესაც აგენტი ოჯახს ამოწმებს, ქულები ხან იზრდება, ხან _ იკლებს, სოციალური დახმარების მიღებას კი სარეიტინგო ქულა განსაზღვრავს.
