შპს “ქართული კვების კომპანიის” დირექტორის მოადგილე ირაკლი ფირცხალაიშვილი კატეგორიულად უარყოფს ინტოქსიკაციის ფაქტს.
“გამომდინარე იქიდან, რომ ბატალიონში რამდენიმე ასეული ჯარისკაცი იკვებება და ეს საჭმლით მოწამვლის ფაქტი რომ ყოფილიყო, შესაბამისად ინტოქსიკაციას ბევრად მასიური ხასიათი ექნებოდა და არა რამდენიმე ერთეულის,” _ განაცხადა ირაკლი ფირცხალაიშვილმა.
მისივე თქმით, დღეს დილით რამდენიმე ჯარისკაცს მხოლოდ მსუბუქი ფორმის დიარეა დაუდგინდა, რომელიც შეიძლება ცალკეული ჰიგიენური ნორმების დარღვევით ან ენტეროვირუსით იყოს გამოწვეული.
საკითხის შესწავლაში თავდაცვის სამინისტროს მხრიდან ჩართულია გენერალური ინსპექცია, სამხედრო პოლიცია, ჯარების ლოგისტიკური უზრუნველყოფის სარდლობა და სამედიცინო დეპარტამენტი, რომლებიც აუხლოეს მომავალში თავის დასკვნებს დადებენ.
როგორც ირაკლი ფირცხალაიშვილმა აღნიშნა, ზოგადად ნიმუშები გამოკვლევაზეა წაღებული. შპს “ქართული კვების კომპანია” აუახლოეს მომავალში ლაბორატორიიდან მიიღებს პასუხებს. საკვების ყოველი გაცემის წინ თავდაცვის სამინისტროს სამედიცინო სამსახური იღებს ნიმუშებს ყველა მომზადებულ საკვებზე, რომელიც შემდგომი ლაბორატორიული სამუშაოებისთვის ინახება.
სამხედრო მოსამსახურეების ინტოქსიკაციის ფაქტთან დაკავშირებით კომენტარი თავდაცვის მინისტრმაც გააკეთა.
“7 სამხედრო მოსამსახურე შეუძლოდ გახდა, მათ მსუბუქი ინტოქსიკაციის ნიშნები აღენიშნათ. შესაბამისად, სამხედრო პოლიციისა და შპს “ქართული კვების კომპანიის” წარმომადგენლები ადგილზე მივიდნენ, დაწყებულია მოკვლევა. ამაში საგანგაშოს ვერაფერს ვხედავ, ყველაფერი დაზუსტდება და საზოგადოებისთვის ძალიან მალე გახდება ცნობილი, თუ რამ გამოიწვია ეს მსუბუქი ინტოქსიკაცია,” _ განაცხადა ირაკლი ალასანიამ.
მინისტრმა ასევე აღნიშნა, რომ სამხედრო მოსამსახურეების კვებასთან დაკავშირებით თავდაცვის სამინისტროში მიდგომა ფუნდამენტურად შეიცვალა.
“მთლიანად გამოიცვალა მენეჯმენტი. რაც მთავარია, უახლოეს პერიოდში დასრულდება 10 სასადილოს მშენებლობა. შეძენილი იქნება ახალი სამზარეულოები. მომსახურე პერსონალს ახალ ვითარებაში მოუწევს სამუშაოს გაგრძელება. რაც შეეხება ველზე საკვების გატანას, აქაც იყო დიდი პრობლემები – არ იყო გადასატანი ჭურჭელი, შესაბამისი აღჭურვილობის არქონის გამო ვერ იცავდნენ ტემპერატურას და არა მარტო ჰიგიენას. შესაბამისი აღჭურვილობა ახლა ყველგან შემოტანილია,” _ აღნიშნა ალასანიამ და იმედი გამოთქვა, რომ მომავალში მსგავსი სახის მცირე ინციდენტებიც კი აღარ მოხდება.
მინისტრმა სამხედროების ინტოქსიკაციის ძველი ფაქტებიც გაიხსენა. მისი თქმით, მას შემდეგ, რაც ივნისში 11 სამხედრო მოსამსახურეს მსუბუქი ინტოქსიკაცია ჰქონდა, სამხედრო პოლიციამ აღნიშნულ შემთხვევაზე მოკვლევა დაასრულა. ირაკლი ალასანიას განმარტებით, ამ საკითხს საიდუმლო გრიფი ადევს. მოხდა შესაბამისი ცვლილებები, როგორც გაერთიანებულ შტაბში, ასევე სამინისტროში, შეიცვალა შპს “ქართული კვების კომპანიის” მენეჯმენტიც.
