ქუთაისში შემაჯამებელ შეხვედრაზე პრეზიდენტობის კანდიდატი მხარდამჭერებს პრემიერ-მინისტრმა ბიძინა ივანიშვილმა წარუდგინა და 27 ოქტომბერს კოალიციის პრეზიდენტობის კანდიდატის მხარდაჭერისკენ მოუწოდა.
როგორც ბიძინა ივანიშვილმა სიტყვით გამოსვლისას აღნიშნა, გიორგი მარგველაშვილმა მინისტრობის პერიოდში მოახერხა მცირე ბიუჯეტით 800 ზე მეტი სკოლის რემონტის დაწყება, უფასო სახელმძღვანელოების და 17 უფასო ფაკულტეტის უზრუნველყოფა. პრემიერის შეფასებით გიორგი მარგველაშვილის მხარდაჭერით მოსახლეობა ხმას საქართველოს მომავალს მისცემს: “მოდით არჩევნებზე, ხმა მიეცით “ქართული ოცნების” პრეზიდენტობის კანდიდატს, გიორგი მარგველაშვილს, ხმა მიეცით ჩვენი სამშობლოს მომავალს, ჩვენი შვილების მომავალს, შემოხაზეთ 41,” _ განაცხადა ბიძინა ივანიშვილმა.
პრემიერ მინისტრმა ასევე აღნიშნა, რომ კოალიციას შარშან პირველი გასვლა სწორედ ქუთაისში ჰქონდა, ქუთაისმა დიდი მუხტი აჩვენა და შემდეგ მთელი საქართველო ფეხზე დადგა: “შარშან მთელმა საქართველომ არჩევანი თავისუფლებისა და ღირსების სასარგებლოდ გააკეთა _ უარი უთხრა სიცრუეს, ბრძოლა გამოუცხადა ძალადობას. ვიცი, რომ ჩემი ქუთაისი ახლაც ისევ გვერდით დაგვიდგება, როგორც შარშან და ერთად ჩვენ ისევ გავიმარჯვებთ,” _ განაცხადა ბიძინა ივანიშვილმა.
კოალიციის საპრეზიდენტო კანდიდატმა მადლობა გადაუხადა ათასობით მხარდამჭერს საგანგებო და ემოციური დახვედრისთვის. “ეს იყო შეხვედრა, რომელშიც ჩვენ მივიღეთ ენერგია მომავალი გამარჯვებისთვის და მომავალი ორი კვირის წარმატებულად ბოლომდე მიყვანისთვის,” _ აღნიშნა მარგველაშვილმა.
“ქართული ოცნების” პრეზიდენტობის კანდიდატმა სიტყვით გამოსვლისას აღნიშნა, რომ დღეს საჭიროა პოლიტიკური ძალების კონსოლიდაცია. “კონსოლიდაციისათვის ჩვენ გვყავს პარლამენტი, რომელშიც გვაქვს უმრავლესობა, გვყავს მთავრობა, რომელსაც მართავენ ძალიან კარგი მინისტრები და ძალიან კარგი პრემიერ-მინისტრი და თქვენ გეყოლებათ პრეზიდენტი, რომელიც იქნება მთავრობის, პრემიერ-მინისტრის და პარლამენტის პარტნიორი. აი ამისათვის ჩვენ გვჭირდება, რომ გაძლიერდეს და გამთლიანდეს ქართული ხელისუფლება,” _ განაცხადა გიორგი მარგველაშვილმა.
გიორგი მარგველაშვილის განცხადებით ქუთაისს ძირძველ და ყველასთვის საყვარელ ქალაქს განვითარების დიდი პოტენციალი აქვს, როგორც ეკონომიკის, ასევე ხელოვნების, განათლების და სხვა მიმართულებით. რისთვისაც დღეს ხელისუფლებას ერთად დგომა სჭირდებათ.
ზესტაფონში გამართულ შეხვედრაზე შეკრებილ საზოგადოებას რეჟისორმა რეზო ჩხეიძემაც მიმართა და მათ არჩევნებზე მარგველაშვილის მხარდაჭერისკენ მოუწოდა: “მიხარია, რომ ხელისუფლებაში ეროვნული ხელისუფლება მოვიდა. სპორტის სასახლეში როდესაც გიორგი მარგველაშვილის ბიოგრაფია წავიკითხე და მისი გამოსვლა მოვისმინე, გადავწყვიტე რომ თქვენს გვერდით დავდგე, იმიტომ რომ სხვანაირად არ შეიძლება. ვფიქრობ გიორგი მარგველაშვილის დასახელებით, როგორც ფილოსოფოსი ადამიანის ქვეყნის სათავეში მოსვლით, საქართველოს ქართული ცივილიზაცია დაუბრუნდება,” _ განაცხადა რეზო ჩხეიძემ.
კოალიცია “ქართული ოცნების” პრეზიდენტობის კანდიდატმა გიორგი მარგველაშვილმა ზესტაფონში მოსახლეობასთან შეხვედრის შემდეგ, ზვიად ძიძიგურთან და დავით უსუფაშვილთან ერთად, მერაბ კოსტავას ტრაგიკულად დაღუპვის 24 წლისთავთან დაკავშირებით, ხარაგაულის რაიონში სოფელ ბორითში ეროვნული გმირის მემორიალი მოინახულა და მის ხსოვნას პატივი მიაგო.
(R)
