საქართველოს ენერგეტიკისა და ბუნებრივი რესურსების მინისტრი ალექსანდრე ხეთაგური ოზურგეთს, გასული კვირის ხუთშაბათს სტუმრობდა. ის გურიის მხარის გუბერნატორთან, ვალერი ჩიტაიშვილთან ერთად, სამივე მუნიციპალიტეტის გამგებლებს, საკრებულოს თავმჯდომარეებს და სოფლის რწმუნებულებს შეხვდა, სატყეო სექტორში მიმდინარე რეფორმების გაცნობის მიზნით. მინისტრის თქმით, ეს შეხვედრა ითვალისწინებს საქართველოს ყველა რეგიონში საინფორმაციო ხასიათის შეხვედრების გამართვას და სატყეო სექტორში ტყის მართვის ახალი წესებისა და რეგულირების მეთოდების წინასწარ გაცნობას.
აღნიშნული საკანონმდებლო ინიციატივები ძალაში მიმდინარე წლის 1 ივლისიდან შევა _ სიახლეები ითვალისწინებს ხე-ტყის მოძრაობის გაკონტროლების ახალ მიდგომას სპეციალური ფირნიშების გამოყენებით:
_ დაახლოებით, 10-15 ივლისისთვის, გამოცხადდება ტყის მასივის იჯარით გაცემის ახალი წესები _ ლიცენზია აღარ იქნება საჭირო. სადღაც ოქტომბერში ჩატარდება ნულოვანი აუქციონები _ ვინც მეტს გადაიხდის, ის აიღებს ტერიტორიას. ეს იჯარა იქნება 49-წლიანი, გაფორმდება საიჯარო ხელშეკრულება, სადაც გაიწერება რეინჯერის ანუ ტყის მმართველის ვალდებულებები. მას შეუძლია, გააკეთოს ტყის სარგებლობის გეგმა და წარმოადგინოს სააგენტოში. დამტკიცების შემთხვევაში, შეეძლება ტყის რეწვა _ როგორც მასალის, ასევე შეშის მოჭრა. იგი ვალდებული იქნება, განაახლოს ტყე და სპეციალური ტყეკაფი გამოყოს სოციალური ჭრისთვის, რომ სოფლის მოსახლეს შეეძლოს შეშის გამოტანა და ა.შ. ტყის მმართველი ასევე შეძლებს ტურისტული ინფრასტრუქტურის მოწყობას. მაგალითად, ბახმაროს ტყეები ვინმემ რომ აიღოს იჯარით, იქ შეიძლება პატარა “ბახმარო 2” გააკეთოს, კოტეჯები ჩადგას და გააქირავოს, მოაშენოს თევზი და აწარმოოს სხვადასხვა ბიზნესი, _ თქვა მინისტრმა.
ხეთაგურის გამოსვლის შემდეგ, სიტყვა “ენერგო-პრო ჯორჯიას” წარმომადგენლებს გადაეცათ. მათი თქმით, ძალიან მალე ოზურგეთის შვიდ სოფელში დასრულდება გამრიცხველიანება, 2013 წელს ეს ყველგან მოხდება. “ენერგომამებს” დარბაზში მსხდომმა რწმუნებულებმა რამდენიმე პრობლემის შესახებ შეახსენეს _ მაგალითად, სოფლების უმეტესობა მონტიორის გარეშეა დარჩენილი; სოფელ ცხემლისხიდის ერთ უბანში უკვე ყველაფერი აქვთ იმისთვის, რომ ახალი ბოძები დადგან და სადენები გამოცვალონ, მაგრამ არ აქვთ შესაბამისი ტექნიკა.
შეხვედრის დროს შევიტყვეთ, რომ გამრიცხველიანებაზე დასაქმებულებს თვეების განმავლობაში ჯამაგირი არ მიუღიათ. ამის შესახებ ალექსანდრე ხეთაგურმა “გურია ნიუსთან” ასეთი კომენტარი გააკეთა:
_ მე მსგავსი ინფორმაცია არ მაქვს. ეს არის კერძო კომპანია და ამის შესახებ ვერანაირ კომენტარს ვერ გავაკეთებ.
თავად “ენერგო პრო-ჯორჯიას” აჭარის ფილიალის მენეჯერმა გვითხრა, რომ იყო ხარვეზი _ შესადგენია ფინანსური დოკუმენტაცია, რომელიც იგზავნება რეგიონში, შემდეგ კი თბილისში ფინანსურ განყოფილებაში: _ რამდენიმე ბრიგადის მუშაობის დროს, დოკუმენტაციაში იყო ხარვეზი. ჩემს ხელთ არსებული ინფორმაციით, ძველი დავალიანებები გაასწორეს და მაქსიმუმ, სამშაბათს (საუბარი ჩაწერილია 16 ივნისს) ჩაირიცხება დარჩენილი სახელფასო დავალიანების თანხა, _ თქვა მენეჯერმა.
