Kurier-ის ჟურნალისტი შტეფან შოხერი, სტატიაში “რუსეთი საქართველოს შიგნით ღობეს ავლებს”, აღნიშნავს, რომ ნატო-ს გენერალური მდივანი მოუწოდებს რუსეთს, შეწყვიტოს საქართველოს ტერიტორიაზე ხელოვნური ბარიერების აგება. სტატიაში ასევე მიმოხილულია საგარეო საქმეთა მინისტრის მაია ფანჯიკიძის გამოსვლა ეუთო-ს მუდმივი საბჭოს სხდომაზე, სადაც მან ისაუბრა საქართველოს ოკუპირებული აფხაზეთისა და ცხინვალის რეგიონების საოკუპაციო ხაზის გასწვრივ რუსეთის საოკუპაციო ძალების მიერ მავთულხლართების გავლებისა და მიწათხრილების მოწყობის პროცესზე, რუსეთის მიერ ოკუპირებულ ტერიტორიებზე უსაფრთხოებისა და ადამიანის უფლებების კუთხით არსებულ მძიმე ვითარებაზე.
Die Presse-ს ჟურნალისტი იუტა ზომერბაუერი ქართულ სოფლებში ხურვალეთსა და დიცში იმყოფებოდა. ვრცელ რეპორტაჟში, რომლის სათაურია “მოსკოვის მავთულხლართებით მოლაპარაკების ძალაუფლება”, საუბარია რუსი ჯარისკაცების უკანონო ქმედებებზე, თუ როგორ ახდენს რუსეთი თავისი ძალების დემონსტრირებას საქართველოში დაგეგმილი საპრეზიდენტო არჩევნების წინ.
“აქ საზღვარია” – ასეთ მითითებას აძლევს რუსი ჯარისკაცი 79 წლის მოხუცს, რომლის სახლს და ეზოს მავთულხლართები ჰყოფს. სოფელი დიცი კი, გორიდან 17 კილომეტრითაა დაშორებული.
