“ნაციონალური” საჩუქრები საპარლამენტო არჩევნების წინ

2000. კვ. მიწის ნაკვეთით და მიმდებარე ტერიტორიით, წინასაარჩევნოდ ბახვში მცხოვრებს, ოზურგეთის მუნიციპალიტეტის გამგეობის ქონების, მიწის მართვის სამსახურის მთავარ სპეციალისტს დემურ მეგრელიშვილს სიმბოლურ ფასად _ 1 ლარად გადასცა.

ამ ისტორიის შესახებ “გურია ნიუსთან” რამდენიმე წყარო ჰყვება, რომლებიც თავიდან ბოლომდე საქმის კურსში იყვნენ ამ ფაქტთან დაკავშირებით. ჩვენ მათ ვინაობას, მათივე თხოვნით, გასაგები მიზეზების გამო არ ვასახელებთ.

ამ ინფორმაციას თავად დემურ მეგრელიშვილიც ადასტურებს. თუმცა, გვთხოვს და წინასწარ გვაფრთხილებს, რომ თუ ამ მასალას დავწერთ, შეიძლება, ჯანმრთელობის კუთხით მას რაიმე პრობლემა შეექმნას.

ბახვის მკვიდრი: _ რამაზ ნიკოლაიშვილმა მისცა დემურის ეს შენობა.

_ აჩუქა?

_ აჩუქა, მაგრამ დემურის გამოუჩნდა ჭკუის მასწავლებელი გამგეობაში _ ლარი და ჩუქება არ ახსენო, იმიტომ, რომ წინასაარჩევნო პერიოდია, ცუდი სიტუაციაა და მოგდგებიანო. ახლა გააფორმებინეს იჯარით. წინასაარჩევნო პერიოდი იყო და რამაზ ნიკოლაიშვილი ამოსული იყო ბახვში, ცენტრში გზას რომ აგებდნენ, მაშინ. ეს შენობა მიეცით ვინმეს ლარად, გაარემონტოს და მიშა რომ ამოვა აქ, ცენტრი ცენტრს ჰგავდეს. მე ხომ მხედავთ, გზას ვაკეთებო. იქვე იდგა დემური მეგრელიშვილი და უთხრა მას, შენ გქონდეს, გაჩუქე შენობაო. 15 დღე იყო დარჩენილი ბახვში გზის გახსნამდე და საპარლამენტო არჩევნებამდე, მიშას ველოდებოდით, რამაზი უნდა წარედგინა დეპუტატობის კანდიდატად, ამიტომ ცენტრი უნდა მოწესრიგებულიყო. იჯარა არ არსებობდა მაშინ. ახლა, აპრილში, დაურეგისტრირა საკრებულომ 30-წლიანი იჯარით, სასყიდლიანი უზურფრუქტით მთლიანი შენობა, მისი უკანა მიმდებარე ტერიტორიით, რომელიც 2 000 კვადრატული მეტრია. წლის განმავლობაში 800 ლარი აქვს გადასახადი. ეს ინფორმაცია დევს საჯარო რეესტრში.

ეს შენობა არავის საკუთრება არ იყო, ეს იყო მომხმარებელთა საზოგადოების, რომელსაც ჩამოართვა ეკონომიკის სამინისტრომ.

დემურ მეგრელიშვილმა გამოაგზავნა სოფლის რწმუნებულის სახელზე წერილი. განიხილავდნენ სოფლის პროექტებს. წერილში ეწერა, რომ დემურ მეგრელიშვილმა გაარემონტა შენობა, შეაკეთა კაპიტალურად, გაუმაგრა საძირკველი, კარ-ფანჯრები გამოცვალა… ვითომ მან გაარემონტა, მოლაპარაკებისამებრ. ასეთი შინაარსის წერილი უნდა დაეწერა რწმუნებულს და შემდეგ ოზურგეთის მუნიციპალიტეტის გამგებელთან გაეგზავნა.

აღნიშნულ შენობაში პირველ სართულზე სამეწარმეო სამუშაოებს რამდენიმე წლის განმავლობაში ეწევა ბახვის მკვიდრი ნატო ნიკოლაიშვილი, რომელიც “გურია ნიუსთან” ადასტურებს აღნიშნულ ფაქტებს და აღნიშნავს, რომ განცხადებით მიმართა ადგილობრივი ხელისუფლების წარმომადგენლებს და ჯერ წერილობითი პასუხი არ მიუღია: _ ძალიან ბევრჯერ ვცადეთ შენობის აუქციონის წესით შეძენა, მაგრამ იმდენად დიდ ფასად იყო შეფასებული, ვერ შევძელით. გასულ წელს დასრულდა სოფელში ასფალტის საფარის დაგება. გზის გახსნაზე ჩამოსულმა რამაზ ნიკოლაიშვილმა, რომელიც ბახველობას იჩემებდა და აპირებდა პრეზიდენტის ჩამოყვანას ბახვში, ამ დროს განაცხადა, რომ, თურმე, ცენტრს იერსახეს უკარგავდა ეს შენობა. მასში ჩვენი სავაჭრო ფართი იყო განთავსებული და უბრძანებია მისი დანგრევა ან ლარად დემურისთვის ჩუქება, _ აღნიშნულია განცხადებაში, რომლითაც ბახვის მკვიდრმა ნატო ნიკოლაიშვილმა საკრებულოს თავმჯდომარეს მიმართა.

_ 23 აპრილს შევიტანეთ წერილობითი განცხადება გამგებლის, საკრებულოს თავმჯდომარის და ქონების მართვის სამსახურის უფროსის სახელზე, პასუხი კი დღემდე არ არის. ამ ბოლოს როცა მივედით, სიტყვიერად გვითხრეს, დემურის ეს მიწა და შენობა ამა წლის 8 აპრილს უკვე დარეგისტრირებული აქვსო. კიდევ არ გვჯეროდა, თუ დარეგისტრირებული ჰქონდა და მივედით იუსტიციის სახლში, სადაც მოგვცეს ინფორმაცია, ამის შემდეგ მიდის დავა, _ აღნიშნავს ნატო ნიკოლაიშვილი.

“რას მოაწერა გამგებელმა კოტე შარაშენიძემ ხელი, ვერ გეტყვით. მე ის ვიცი, რომ პირიქით, მისი მონდომებაა ამ პროექტის შეჩერება. იგი მოატყუეს, არ ჰყავს სანდო თანამშრომლები, როგორც ჩანს, ეს თქვენ უნდა გამოიძიოთ…” _ გვითხრა ერთ-ერთმა ბახველმა.

დემურ მეგრელიშვილი, ოზურგეთის მუნიციპალიტეტის გამგეობის ქონების, მიწის მართვის სამსახურის მთავარი სპეციალისტი “გურია ნიუსთან” დაწვრილებით ჰყვება ამ ისტორიის შესახებ: _ ეს შენობა ავიღე ოცდაათწლიანი იჯარით 2013 წლის 8 აპრილს. რამაზმა რა მაჩუქა? რამაზი რამდენი წელია, წასულია. 2011 წელს, როცა ბახვის ცენტრის კეთილმოწყობა მიმდინარეობდა, სოფელი იყო შეკრებილი, მოვიდა რამაზ ნიკოლაიშვილი და თქვა, მე ხომ გიკეთებთ გზას, ხომ ხართ ბახველები კმაყოფილებიო. რამაზი ამბობდა, რომ ბახველი ვარო, ბახველობაზე დებდა თავს და მისი წინაპრები ბახვიდან იყვნენ. მე ვუთხარი, ბახველი ხარ, კარგია, გზა რომ გაგვიკეთე, ბარემ გაზიც გამოგვიყვანე და მადლიერები დაგრჩებით მთელი სოფელი,-მეთქი. დაგვპირდა, რომ გაზსაც შემოიყვანდა. ხალხს ვუთხარი, მადლობა ვუთხრათ ბატონ რამაზს, სოფელში გზასთან ერთად გაზსაც გამოგვიყვანს,-მეთქი. იქვე იყვნენ გუბერნატორი, გამგებელი, გუბერნატორის მოადგილეები. რამაზი მოგვიბრუნდა და მე და თემურ ჯახვას გვითხრა, რომ შენობა ცენტრს აუშნოებს და მოდი, ვინც გაარემონტებს, იმას ვაჩუქოთო ან დავანგრიოთო. დანგრევა არ გამოდიოდა, რადგან მერე ცუდი ხედი გამოჩნდებოდა. მომიბრუნდა და მითხრა, შეგასყიდინებ მიზერულ ფასად, ოღონდ მიშა ჩამოდის 15 დღეში და გარემონტებული იყოსო. ჯახვას კი მიმართა, შენ ამ სკოლის შენობის ღობეს გაარემოტებ და შეღებავო. მე ყველაფერი კანონიერად მაქვს გაკეთებული, დარეგისტრირებული, ჩემს განცხადებას ადევს გამგებლის რეზოლუცია, გადაგზავნილია საკრებულოში, საკრებულომ დაამტკიცა, დაარეგისტრირა რეესტრში. ამის შესახებ საქმის კურსში იყო საკრებულოს მაშინდელი თავმჯდომარე ალეკო მამეშვილი. მან იცოდა, რომ შენობას ვარემონტებდი და კონტროლზე ვყავდი აყვანილი, რომ რემონტი დროულად დამთავრებულიყო. გამგეობამ მიწერა ეკონომიკის სამინისტროს, რომ მის ბალანსზე აყვანილი შენობა გამგეობის ბალანსზე გადმოსულიყო და ასეც მოხდა. მერე საკრებულომ გამიფორმა კანონის სრული დაცვით.

_ ბატონო დემურ, თქვენ მუშაობთ მიწისა და ქონების მართვის სამსახურში, ეს ხომ არ გიწყობთ ხელს, რომ მიზერული თანხის საფასურად ჩაიგდეთ ხელში ამხელა შენობა?

_ რა შუაშია ჩემი სამსახური? თუ ვინმეს პრეტენზია აქვს, მიმართოს სასამართლოს. მე თხოვნა მაქვს თქვენთან, არ დაწეროთ ეს წერილი, არ გახადოთ საჯარო, მეგობრულად მოგიყევი. ვინ მოგაწოდა ეს ინფორმაცია? _ გვთხოვდა დემურ მეგრელიშვილი კომენტარის გაკეთების შემდეგ.

ლაშა თავაძე, საკრებულოს იურისტი: _ მთელი ისტორიებია მაგ თემაზე, ოფიციალურად მოგაწოდებთ ინფორმაციას ცოტა მოგვიანებით, ასე გვირჩევნია.

_ ბატონო ლაშა, რამდენად კანონიერად მოხდა ხელშეკრულების გაფორმება?

_ კანონიერად მოხდა, აბა, უკანონოდ როგორ გავაკეთებდი?

_ როგორც ვიცით, ეს ქონება რამაზ ნიკოლაიშვილმა აჩუქა ბატონ დემურ მეგრელიშვილს.

_ამაზე მე ვერ გაგცემთ პასუხს, ეს დემურმა გითხრათ. მე არ ვესწრებოდი მაგ შეხვედრას და ვინ ვის რა დაპირდა, იმან გაგიკეთოთ კომენტარი. მე სამართლებრივად გავაკეთებ ოფიციალურ კომენტარს. გამგეობიდან შემოვიდა მოთხოვნა ჩვენთან, საკრებულოში, რომ საქმე განიხილა გამგეობის შესაბამისმა სამსახურმა, ანუ ქონებისა და მიწის მართვის სამსახურმა და გეგზავნებათ შემდგომი რეაგირებისათვის. ახლდა გამგებლის მიერ ხელმოწერილი დოკუმენტაციაც. საკრებულოს თავმჯდომარემ დააწერა შესაბამის კომისიას, კომისიამ განიხილა და დადო დასკვნა, რომ მიზანშეწოლილად მიაჩნია, სასყიდლიანი უზურფრუქტის სახით აღნიშნული ქონება გადაეცეს დემურ მეგრელიშვილს. მე გავამზადე ხელშეკრულება 2013 წლის 8 აპრილს, რომლის მიხედვითაც ბატონი დემურის მეუღლე არის კანონიერი მოსარგებლე. ასე გადავეცით დემურს ეს შენობა. აქ არიან სხვა დაინტერესებული პირები, რომლებიც იმ შენობაში ვაჭრობას ეწევიან… შეიძლება მოხდეს ახლა ხელშეკრულებაში ცვლილებები ამის გამო.

თეა ლომჯარია, გამგეობის იურისტი: _ 2013 წლის მარტში, მუნიციპალიტეტის გამგეობას განცხადებით მომართა დემურ მეგრელიშვილის მეუღლემ, ქალბატონმა მანანამ და მოითხოვა ბახვის ცენტრში ყოფილი ადმინისტრაციული შენობის სარგებლობის უფლებით გადაცემა, სხვადასხვა სამეწარმეო საქმიანობისთვის. აღნიშნული განცხადება შემდგომი რეაგირებისთვის გადაეგზავნა საკრებულოს. აღნიშნულ განცხადებას განიხილავს საკრებულოს კომისია, რომელსაც უნდა დაეწერა დასკვნა და შემდგომ საკრებულოს თავმჯდომარე გაუფორმებდა ხელშეკრულებას.

რამაზ ნიკოლაიშვილი “გურია ნიუსთან” აღნიშნულ ფაქტს კატეგორიულად უარყოფს და ინფორმაციას აბსურდულს უწოდებს.

_ რა სისულელეა, როგორ შეიძლებოდა მე რაიმე ქონება ვინმესთვის მეჩუქებინა? თქვენ ასე ფიქრობთ?

_ ბატონო რამაზ, ამ ინფორმაციას ადასტურებს რამდენიმე ადამიანი და მათ შორის თავად დემურ მეგრელიშვილიც.

_ მე არ ვიცი, ვინ რას ადასტურებს. მე რომ გითხრათ სიტყვაზე, გჩუქნით სპორტის სასახლეს,-მეთქი, დამიჯერებთ? რა ბერკეტი უნდა მქონოდა მაგისი? გაარკვიეთ იურიდიულად ეგ საკითხები, რა! საიდან უნდა მეჩუქებინა, ეკონომიკის სამინისტრო ვიყავი თუ ჩემი საკუთრება იყო? მაჟორიტარობის კანდიდატს, როგორ შეიძლებოდა ერთ ლარად, სიმბოლურ ფასად მეჩუქებინა ორსართულიანი შენობა ვიღაცისთვის ბახვში?

_ ბატონო რამაზ, თქვენ ძალიან ბევრი ადამიანის თვალწინ დაჰპირდით მეგრელიშვილს, რომ აჩუქებდით აღნიშნულ შენობას…

_ მე მაგ თემაზე საუბარი აღარ მინდა, იმიტომ, რომ ეს არის აბსურდი და აბსურდზე საუბარს და დროის კარგვას აღარ ვაპირებ! _ გვითხრა რამაზ ნიკოლაიშვილმა.

ოზურგეთის მუნიციპალიტეტის საკრებულოს თავმჯდომარე ავთანდილ სურგულაძე “გურია ნიუსთან” აღნიშნავს, რომ აღნიშნულ ფაქტთან დაკავშირებით ყველა პროცედურა კანონის სრული დაცვით წარიმართა.