ცნობისთვის, გასული წლის 24 სექტემბერს, საპარლამენტო არჩევნებამდე რამდენიმე დღით ადრე, ცენტრალურმა საარჩევნო კომისიამ მიიღო დადგენილება #42/2012, რომელიც კენჭისყრის დღეს საარჩევნო უბანზე ფოტო-ვიდეო გადაღებას არეგულირებს.
მიღებული დადგენილების თანახმად, ოპერატორებს და ფოტოგრაფებს, ასევე დამკვირვებლებსა და პარტიების წარმომადგენლებს არაუმეტეს 10 წუთი შეეძლებათ ერთ საარჩევნო უბანზე აწარმოონ თავისუფალი გადაღება, ხოლო 10 წუთის გასვლის შემდეგ კი, თუ სურვილი ექნებათ, მთელი დღის განმავლობაში სტაციონალური ვიდეოგადამღები აპარატიდან აწარმოონ გადაღება, დაიკავონ კომისიის თავმჯდომარის მიერ განსაზღვრული ადგილი, საიდანაც უნდა ჩანდეს საარჩევნო ყუთი. თუ ამ რეჟიმში მყოფი “პირი კამერით გადაადგილდება ან ტოვებს კენჭისყრის შენობას, კარგავს ფოტო-ვიდეოგადაღების წარმოების უფლებას”, _ ნათქვამია დადგენილებაში.
ამ გადაწყვეტილების წინააღმდეგ ხმა, მაშინ, ცესკოს 13 წევრიდან ორმა მისცა – კონსერვატიული პარტიიდან და მრეწველების მიერ დანიშნულმა წევრებმა. დადგენილების მიღებას მხარი 10–მა წევრმა დაუჭირა, მათ შორის ცესკოს მაშინდელმა თავმჯდომარემ და ახლა უკვე საპრეზიდენტო კანდიდატმა ზურაბ ხარატიშვილმა, “ნაციონალურმა მოძრაობამ”, ასევე ოპოზიციურმა “ქრისტიან–დემოკრატიულმა მოძრაობამ”, “ევროპელმა დემოკრატებმა” და “ქრისტიან–დემოკრატიულმა სახალხო პარტიამ”. “ლეიბორისტული პარტიის” წევრი ცესკოში სხდომას საერთოდ არ ესწრებოდა.
თავის დროზე ცესკოს ეს დადგენილება ჟურნლისტემაც არაერთი აქციით გააპროტესტეს.
2013 წლის საპრეზიდენტო არჩევნებამდე ცოტა ხნით ადრე, ცესკოს თავმჯდომარე შეიცვალა და აღნიშნულ პოსტზე არასამთავრობო ორგანიზაციების მიერ წარდგენილი კანდიდატი თამარ ჟვანია დაინიშნა, რომელიც თანამდებობაზე დანიშვნის შემდეგ “გურია ნიუსისთვის” მიცემულ ინტერვიუში ამბობდა, რომ შეეცდებოდა მედიისთვის დაწესებული შეზღუდვების საკითხი კომისიის წევრებთან ერთად განეხილა და მედიას მაქსიმალურად კარგი სამუშაო გარემო შექმნოდა.
“ამ საკითხთან დაკავშირებით არსებობს დიდი უკმაყოფილება მედიის მხრიდან. ჩემთვის ეს საკითხი ცნობილია და სხვადასხვა შეხვედრებზე ძალიან მკაცრად აყენებდნენ ამ საკითხს. მე როგორც თავმჯდომარე, აუცილებლად დავაყენებ დღის წესრიგში; ჩემი პირველი ნაბიჯი იქნება კომისიის წევრებთან განვიხილო ამ საკითხის მოგვარება ზუსტად იმ ნაწილში, რომელსაც თქვენ გულისხმობთ _ უბანზე შესვლა-გამოსვლის ნაწილში. გადავხედავთ ამ დადგენილებას, მე შევეცდები ეს საკითხი მოვაგვარო და მედიას მაქსიმალურად კარგი სამუშაო გარემო შევუქმნათ”, _ აცხადებდა ჟვანია.
თუმცა, მიუხედავად ცესკოს თავმჯდომარის პირობისა, რომ მედიისთვის დაწესებული შეზღუდვების შესახებ დადგენილება გადაიხედებოდა, ამ დრომდე რაიმე რეალური ცვლილებები არ არსებობს. საპრეზიდენტო არჩევნებამდე 12 დღით ადრე, ცესკოს 13 წევრიდან 12 უარს ამბობს აღნიშნულ თემაზე საკუთარი პოზიცია საჯაროდ დააფიქსიროს.
“გურია ნიუსი” შეეცადა თითოეულ წევრს დაკავშირებოდა, თუმცა, კომისიის წარმომადგენლების თქმით, მათ ჯერ-ჯერობით ამაზე საუბარი არ სურთ.
ჩვენთან საუბარს მხოლოდ ცენტრალურ საარჩევნო კომისიაში “რესპუბლიკური პარტიის” წარმომადგენელი ირაკლი ხორბალაძე დასთანხმდა, რომელიც აღნიშნავს, რომ დადგენილებაში არსებული შეზღუდვები კანონს ეწინააღმდეგება.
“ვფიქრობ შეზღუდვები უნდა მოიხსნას და ჟურნალისტებს საარჩევნო უბნებზე თავისუფლად შესვლის და გამოსვლის უფლება მიეცეთ. დადგენილებაში არსებული შეზღუდვები ეწინააღმდეგება კანონს”, _ უთხრა “გურია ნიუსს” ხორბალაძემ და დასძინა, რომ მედიისთვის არსებულ შეზღუდვებზე მსჯელობა უახლოეს პერიოდში გაიმართება, შესაძლოა ხვალაც.
