2013 წლის 18 სექტემბერს ცეზარ ჩოჩელი ბრალდებულად იქნა ცნობილი საქართველოს ფინანსთა სამინისტროს წარმოებაში არსებულ სისხლის სამართლის საქმეზე. მას ბრალად წარედგინა ორგანიზებული ჯგუფის მიერ მართლსაწინააღმდეგო მისაკუთრების მიზნით დიდი ოდენობით სხვისი ნივთის მოტყუებით დაუფლება და განსაკუთრებით დიდი ოდენობით უკანონო შემოსავლების ლეგალიზაცია.
ბრალდების მიხედვით, 2010 წლის აგვისტოში სახელმწიფოს ასპროცენტიანი წილობრივი მონაწილეობით დაფუძნებული საწარმოს შპს “რკინაბეტონის შპალის ქარხნის 100%-იანი წილი საპრივატიზაციოდ გავიდა ღია აუქციონზე, სადაც ნებისმიერ მსურველს შეეძლო მონაწილეობის მიღება, თუმცა მსურველი იყო მხოლოდ ერთი კომპანია _ შპს “მიქსორი”, რომლის დამფუძნებელიც არის ცეზარ ჩოჩელის ძმა, იაგო ჩოჩელი.
6 850 000 აშშ დოლარის გადახდის შემდეგ, სწორედ აღნიშნული კომპანია გახდა შპალის ქარხნის 100%-იანი წილის მფლობელი.
“თუ რაღაც ფარულ გარიგებებს ჰქონდა ადგილი? რატომ არ გამოეხმაურა გია ხუხაშვილი ვერა ქობალიას მაშინ, როდესაც ეს ტენდერი ტარდებოდა? აუქციონის შესახებ ყველა ტელევიზიაში კეთდებოდა რეკლამა და დღეში ათჯერ ტრიალებდა, თუ რამე ისე ვერ ხდებოდა, მანამდე ვერ თქვა? ვერ აიტანა ხუხაშვილმა ის, რომ არ მივიდა მასთან ჩვენი ჯგუფი, არ აღვმართეთ ხელები და არ ვთხოვეთ შენდობა ყოვლისშემძლე ხუხაშვილს.
_ ასე ხელებაღმართული დადიან ხუხაშვილთან ჯგუფები, დარწმუნებული ხართ?
_ ხუხაშვილი თვითონ ამბობდა, მე არ ვიცი, ვინ დადიან. ხუხაშვილი ამბობდა, რომ მას აქვს “ვიკილიქსი”, რომელსაც დღეს იქნება თუ ხვალ, გამოაქვეყნებს და ვინც აღიარებს და “ცოდვებს მოინანიებს”, იმას შეუნდობს. მე თქვენ გეკითხებით, ვინ არის ხუხაშვილი, ქართველი ბიზნესმენები მასთან რომ მივიდნენ? რა გაუკეთებია ქართული ბიზნესისთვის ან სახელმწიფოსთვის? რა მანდატით სარგებლობდა, ვინ იყო?
მე 1991 წლიდან მოყოლებული არავისთან შევსულვარ არანაირ გარიგებაში. 1993 წელსაც მქონდა პრობლემები, 97-შიც, 2002-შიც, 2004-2005 წლებში, 2007 წლის ბოლოსაც, მაგრამ რაც დღეს ხდება, ზღვარგადასული საქციელია დღევანდელი საგამოძიებო ორგანოებისგან.
თორემ, მე მსგავსი პრობლემები სულ მქონდა. რაც თქვა ხუხაშვილმა ნოემბერში, ის ხდება დღეს. თქვა, რომ ჩვენს წინააღმდეგ ჩართულია სახელმწიფო მანქანა და ვნახოთ, რაც დაგემართებათო.
_ პირადად გითხრათ ეგ?
_ არა, მეგობრის პირით შემომითვალა.
_ ის მეგობარიც ბიზნესმენია?
_ დიახ…
_ ნაციონალური მოძრაობის პერიოდშიც უხვად გქონიათ პრობლემები, 2004, 2005, 2007 წლები. რა პრობლემები გქონდათ და როგორ მოაგვარეთ?
_ პრობლემები ყველა ხელისუფლების პერიოდშია, მთავარია, როგორ წამოგიყენებენ საკითხს. ჩვენ კომპანიებში იმ პერიოდშიც იყო შესული აუდიტორული კომპანია, რომელიც მსოფლიოს ოთხეულში შედის. როცა ასეთი კომპანია გემსახურება, ძალიან ძნელია ბრალი წაგიყენონ. ანუ რა გამოდის? ისინი არა მარტო მე, ამ აუდიტორულ კომპანიასაც აყენებენ შეურაცხყოფას.
_ “ნაციონალური მოძრაობის” დროს იყო თუ არა ზეწოლა თქვენზე?
_ იყო, განა არ იყო, მაგრამ ყველაფერს აქვს თავისი წესი. როგორ ფიქრობთ, ვისაც დღეს პრობლემები არ აქვს, რატომ არ აქვს? აღიარეს ხუხაშვილთან და იმანაც შეუნდო? ბიზნესმამაომ შეუნდო და ეპატიათ ყველაფერი? მეც მასთან უნდა მივსულიყავი ხელაპყრობილი?
ნოემბრის თვეში წამოვიდა ის თემა, რომ შპალების ქარხანა დაგვითმეო, რაზეც ჩვენ უარი ვთქვით და არც ხუხაშვილს ვეახლეთ.
_ თქვენ ხშირად ახსენებთ პრემიერ-მინისტრს და ამბობთ რომ მასთან ვერ მიაღწიეთ. როგორ ფიქრობთ, ის ინფორმაციებს ვერ ფლობს?
_ ფლობს, მაგრამ მას არასწორი ინფორმაცია აქვს საგამოძიებო სამსახურიდან, რომლებიც თავიანთი უგუნურობით თხზავენ ზღაპრებს, რომ 70-80 მილიონი მითვისებულია. ისიც არ იციან, რა არის ფულის გათეთრება. ახლა გეკითხებით, შპალის ქარხანამ აიღო კრედიტი ბანკში, 20 მილიონი და წაიღო ჩადო ზედაზენში, ეს ჩაითვალა ფულის გათეთრებდა. აიღო წინასწარ თანხა რომელიღაც კომპანიებიდან, წაიღო და ჩადო ზედაზენში, ესეც ჩაითვალა ფულის გათეთრებად.
_ბატონო ცეზარ, არსებობს ასეთი თეორია და პრაქტიკაც, რომ წინა ხელისუფლების დროს თუ მთავრობასთან დაახლოებული პირი არ იყავი, ისე ვერც ბიზნესს გააკეთებდი და ვერც ფულს იშოვნიდი. ამას დღეს ის ბიზნესმენები ლაპარაკობენ, რომლებიც ერთ დროს “ნაცმოძრობის” შემომწირველები იყვნენ… თქვენს შემთხვევაში რამე სხვანაირად ხდებოდა?
_ ადამიანს ნებისმიერ მთავრობასთან, მითუმეტეს პოსტსაბჭოთა სივრცეში, ყველგან აქვს პრობლემა. გააჩნია, როგორ მუშაობ. შენ თუ სუფთად მუშაობ, ნაკლები პრობლემა გაქვს, მაგრამ თუ რამეზე გამოგიჭირეს, შეიძლება გადაგაყოლონ კიდეც. არ ვამბობ იმას, რომ ყველაფერი იდეალურად იყო და არავინ არ იჩაგრებოდა. რა თქმა უნდა, იჩაგრებოდა. მე თვითონაც ვარ იმის მოწმე, რომ ჩემი მეგობრები დაიჩაგრნენ და საპროცესოები მე თვითონ მაქვს გადახდილი. ერთ-ერთი გურულია სხვათა შორის. ჩემი მამიდაშვილიც იყო მაგ სიტუაციაში მოხვედრილი.
თუ წინა ხელისუფლებაში ვაშავებდით ჩემი ჩათვლით, თქვენ მაინც ნუ დააშავებთ, სამართლიანობის ლოზუნგით რომ ხარ მოსულები. ეს ხალხი, ვინც ჩვენს წინააღმდეგ კერავს საქმეებს, მუშაობენ ქართული სახელმწიფოს წინააღმდეგ, რადგან ამათი ქმედებით მარტო “ბერტაში” უმუშევარი დარჩა 600 კაცამდე, 200-ზე მეტი შპალის ქარხანაში და ბიუჯეტი კარგავს გადასახადებს. დღეს, ჩვენს ქარხნებში დარჩენილია დაახლოებით 4000 კაცი და ახლა ამათაც უმუშევრობა ემუქრებათ. ჩემს ძმას, თავის საკუთარ ქარხანაში ხელფასი აქვს 10 000 ლარი და დაქირავებულ დირექტორს -18 000. თავისი ხელით ააშენა ყველაფერი და ვისაც ამის უნარი აქვს და ჩვენ ნამდვილად გვაქვს, კიდევ ააშენებს…
პ. ს “გურია ნიუსი” რამდენიმე დღის განმავლობაში ცდილობდა გია ხუხაშვილთან დაკავშირებას, თუმცა უშედეგოდ, მან არც ჩვენს ტექსტურ შეტყობინებას უპასუხა. იმ შემთხვევაში, თუ მას სურვილი ექნება, ჩვენ მზად ვართ, მისი პოზიციაც გამოვაქვეყნოთ იმ განცხადებებთან დაკავშირებით, რაც აღნიშნულ ინტერვიუშია მოყვანილი.
