სოფლის მეურნეობის სამინისტროს ინფორმაციით, შეხვედრაზე მინისტრებმა რთველის მიმდინარეობის პროცესი შეაჯამეს. ისაუბრეს სოფლის მეურნეობის განვითარების მიმართულებით დაგეგმილ პროექტებზეც. შეხვედრას ღვინის ეროვნული სააგენტოს თავმჯდომარე ლევან დავითაშვილიც ესწრებოდა, რომელმაც რთველის წარმატებულად დასრულების შესახებ ისაუბრა. ადგილობრივმა მოსახლეობამ 2013 წლის რთველი დადებითად შეაფასა და აღნიშნა, რომ ეს იყო ნამდვილი ხელშეწყობა კახელი გლეხისთვის.
მათ თქმით, დარგს გამოცოცხლება დაეტყო და სამომავლოდ ბევრი მათგანი ახალი ვენახის გაშენებასაც გეგმავს. შეხვედრაზე დიდი ინტერესი გამოითქვა სასოფლო-სამეურნეო კოოპერატივების ჩამოყალიბებასთან დაკავშირებით. როგორც მოსახლეობამ აღნიშნა, კოოპერატივების შექმნა ხელს შეუწყობს მოაგვარონ ბევრი პრობლემა.
ადგილობრივ გლეხებთან შეხვედრა კითხვა-პასუხის რეჟიმში მიმდინარეობდა. მინისტრებმა მოსახლეობის მიერ დასმულ ყველა შეკითხვას უპასუხეს და დეტალური ინფორმაცია მიაწოდეს მთავრობის მიერ დაგეგმილ არაერთ მნიშვნელოვან პროექტზე.
დღესვე, სოფელ შილდას მოსახლეობასთან შეხვედრის შემდეგ, შალვა ფიფია, გიორგი კვირიკაშვილი და ლევან დავითაშვილი ღვინის მწარმოებელი კომპანიების წარმომადგენლებსა და დარგის ექსპერტებს შეხვდნენ. “რთველი 2013” მეწარმეებმაც დადებითად შეაფასეს და მთავრობას მადლობა გადაუხადეს მევენახეობა-მეღვინეობის განვითარების მიმართულებით გადადგმული ამ წარმატებული ნაბიჯებისთვის.
როგორც სოფლის მეურნეობის მინისტრმა აღნიშნა, 2012 წლის ნოემბრიდან სოფლის მეურნეობა საქართველოს მთავრობის რეალური პრიორიტეტი გახდა.
“ახალი მთავრობის მხრიდან სოფლის მეურნეობისთვის სახელმწიფოს დახმარება სწორი მექანიზმის შექმნისკენ არის მიმართული და მიზნად ისახავს გლეხი გახდეს კონკურენტუნარიანი, ხოლო წარმოების პროცესი კი, თანამედროვე. ჩვენს მიერ გადაგმული ნაბიჯების შედეგად: თანაბარ პირობებში ჩადგნენ დიდი და მცირე ფერმერები. აღარ მოხდა დიფერენცირება მცირე და დიდი ნაკვეთებიდან მიღებულ ყურძენზე. სახელმწიფომ მეწარმეებს მისცა საშუალება გაეფართოვებინათ საკუთარი წარმოება და, შესაბამისად, მეტი ყურძენი ჩაებარებინათ გლეხებისაგან,” _ განაცხადა ფიფიამ.
