აქციის პარალელურად თბილისის საკრებულოში სახალხო დამცველსა და საკრებულოს წევრებს შორის შეხვედრა მიმდინარეობდა. აქციის მონაწილეებმა ტრანსფარანტებით-“შე(მ)იფარე დღეს!”, “რამდენი ადამიანი გაიყინება წელს?”, “დღეს მე, ხვალ ვინ?” მთავრობას და საზოგადოებას გზანილი გაუგზავნეს და უსახლკაროთა პრობლემების მოგვარების სასწრაფო გადაჭრა მოითხოვეს.
აქციის ორგანიზატორების განცხადებით, უსახლკაროთა პრობლემის გადაჭრა სწორედ ქალაქის საკრებულოს შეუძლია, ამიტომაც შეიკრიბნენ აქ და სთხოვეს საკრებულოს მიაქციონ ყურადღება უსახლკაროებს. წინ ზამთარი მოდის და უსახლკარობის გამო ადამიანები არ უნდა გაიყინონ-განაცხადეს აქციის მონაწილეებმა.
“ფემინისტების დამოუკიდებელი ჯგუფის” წევრებმა აქციაზე კონკრეტული საკითხები დასვეს და განაცხადეს, რომ საჭირია პირველ რიგში მთავრობამ განსაზღვროს სტატუსი, თუ ვინ შეიძლება ჩაითვალოს უსახლკაროდ, ასევე უნდა იყოს ზუსტი რიცხვი დადგენილი თუ რამდენი უსახლკარო ადამიანია და დადგინდეს პრობლემის მაშტაბურობა.
აქციის დროს საკრებულოსთან შეკრებილ საზოდაგოებასთან სახალხო დამცველი, უჩა ნანუაშვილი მივიდა. მისი თქმით, საკრებულოს აპარატის წევრები ეცდებიან მოაგვარონ არსებული პრობლემა.
უჩა ნანუაშვილი: დღეს ჩვენ სპეციალურად გამოვყავით ის რეკომენდაციები, რომლებიც ეხებოდა თბილისის მუნიციპალიტეტს, თბილისის მერიას და საკრებულოს და განვიხილეთ ყველა ის რეკომენდაცია, რომელიც სახალხო დამცველის მხრიდან იქნა მომზადებული როგორც გასული წლის, ისე მიმდინარე წლის განმავლობაში. ეს ძირითადად ეხება სოციალურ-ეკონომიკურ საკთხებს, სათანადო საცხოვრისის უფლებას, უსახლკაროთა პრობლემას. გასულ წელს მერიას 7000-ზე მეტმა უსახლკარო ოჯახმა მიმართა განცხადებით და სამწუხაროდ არც ერთი მათგანი არ არის დაკმაყოფილებული. ცუდია, რომ ყველა შემთხვევაში პასუხი არის შაბლონური, რომ არ არსებობს ფართი, რომ არ არის ბიუჯეტში საჭირო თანხები. მე ვფიქრობ ეს უნდა გადაიხედოს, უნდა შემუშავდეს გარკვეული გეგმა, გარკვეული სტრატეგია თბილისის მერიის მხრიდან. მესმის, რომ 7000 ადამიანის დაკმაყოფილება არის ძალიან რთული, მაგრამ შეიძლება ამ პრობლემების მოგვარება, თუ იქნება ყველაფერი გაწერილი და შესაბამისი სტრუქტურების მხრიდანაც იქნება გადადგმული კონკრეტული ნაბიჯები.
_კიდევ რა საკითხებზე იყო დღევანდელ შეხვედრაზე საუბარი?
_საუბარი იყო სხვა არანაკლებ აქტუალურ პრობლემებზეც, ეს არის ხანდაზმულთა უფლებები, შეზღუდულ შესაძლებლობათა პირთა უფლებები, მათთვის ადაპტირებული გარემოს შექმნა, ასევე მოხუცებულთა თავშესაფრების შექმნა და უკვე არსებულების პრობლემების გადაჭრა. საუბარი იყო ბიუჯეტის გაზრდაზე, რადგან ბიუჯეტი უნდა იყოს აუცილებლად სოციალური. საკრებულოს წევრებმა თავის მხრივ ჩვენც გვთხოვეს დახმარება, იმისთვის, რომ მოხდეს ცენტრალური ბიუჯეტიდან უფრო მეტი ყურადღების გამოჩენა და უფრო მეტი ბიუჯეტის გამოყოფა სოციალური საკითხებისთვის.
აქციის ორგანიზატორებმა აღნიშნეს, რომ მომავალშიც გააგრძელებენ ასეთი აქციების ჩატარებას, რადგან იქამდე უნდა გვახსოვდეს ეს პრობლემა, სანამ რომელიმე ადამიანი არ გაიყინება.
