და სოფლიდან წაიღეს.
ადგილზე მისულებს, სოფლის რამდენიმე მცხოვრებმა გვითხრა, რომ მილების ამოღება ფარულად არ მომხდარა _ სამუშაოებს ოზურგეთის მუნიციპალიტეტის გამგებლის მოვალეობის შემსრულებელი კონსტანტინე შარაშენიძე და გურიანთის მაჟორიტარი დეპუტატი მერაბ მჟავია ხელმძღვანელობდნენ. მოსახლეობის თქმით, მათთვის არ განუმარტავთ, რისთვის სჭირდებოდათ ლითონის მილები, სანაცვლოდ გზის მოხრეშვას, გარეგანათების მოწყობას და არხის გაწმენდას შეპირდნენ. მოსახლეობას აწუხებს ისიც, რომ ერთი კილომეტრი გზა, მილების ამოთხრის შედეგად, სულ გადათხრილი და ატალახებულია.
ზაურ მუჯირი: _ გამგებელი იყო თვითონ ამოსული, დაახლოებით ერთი თვის წინ, დაგვპირდა, გზას მოგიხრეშავთო, ნათურებს დაგვპირდნენ , თუმცა ჯერ არ გაუკეთებიათ, კილომეტრი სიგრძის მონაკვეთზე ორი ნათურა დაკიდეს მარტო; არხი უნდა გადაეგდოთ მეორე მხარეს _ ნახეთ რა მდგომარეობაა, კარიერისგან მიწას სულ გამოცლილი აქვს ძირი, გაწვიმდა და საშინელი მდგომარეობა დადგა, სულ გადმოვიდა წყალი.
_ მილების სანაცვლოდ დაგპირდნენ ამ ყველაფრის გაკეთებას?
_ რა ვიცი, ბაბუა, გამგებელი იყო ამოსული… მაგია რაიონის უფროსი და… დაპირება ერთია, შესრულება მეორეა, შესრულებული არაფერი ჩანს.
_ არ გიკითხავთ, რატომ იღებდნენ მილებს?
_ რაიონის გამგებელი იყო და რა უნდა მეკითხა?! დეპუტატი ახლდა მერაბ მჟავია, მან გამაცნო გამგებელიაო.
ჯამლეტ ზურაბიანი: _ იყო თვითონ ქალაქის გამგებელი, ამოთხარა და წაიღო, “ვსიო”… ჩვენ დაგვპირდა არხებს გავჭრითო, წყალი არ დადგებაო, შუქები უნდა გაეკეთებინა, მდინარე უნდა გადაეგდოთ, გზა უნდა მოეხრეშათ და ხედავთ არის გაკეთებული? მილები წაიღეს და წავიდნენ, დამთავრდა, _ კარგად იყავითო, დაგვიქნიეს ხელი! ეს მილები არავის საკუთრება არ იყო _ ეს იყო გარდაცვლილი სულიკო ცქვიტინიძის მიერ შეძენილი მილები, დაახლოებით 20 წელია, გაზი უნდა შემოეყვანა! კილომეტრის სიგრძის მილები ამოიღეს, ხალხს არაფრად გვაგდებენ, ვის აინტერესებს ჩვენი აზრი? ჩვენ დავუსვით კითხვა, რას გვიკეთებდნენ ამის სანაცვლოდ. რამდენი ხელისუფლება გამოიცვლებოდა, იმდენი გვთხოვდა და არ ვატანდით, არ ვანებებდით ამ მილების წაღებას, ახლანდელი გამგებელი ადგა და პირდაპირ მოვიდა და დაიწყო ამოთხრა… უბრალოდ, დაცინვაა ხალხის, მეტი არაფერი. კილომეტრ სიგრძეზე რომ სამ ნათურას ჩამოჰკიდებენ, ხალხის აგდება არაა? ჯერ კარიერი როგორ გვაწუხებს, ნახეთ რომ გაწვიმდება, გადმოდის წყალი, ზღვა გეგონება ისეთი მდგომარეობაა. ვისაც ჰქონდა დავალებული, რომ ეს დაპირებები გაეკეთებინა, ის იძახის, მოგცემთ გამგებლის ტელეფონის ნომერს და მას ჰკითხეთო. ან რა წესია, ერთი სოფლის მოსახლეობას აზარალებენ და სხვას აკეთებენ?!
მერაბ მჟავია, ოზურგეთის მუნიციპალიტეტის საკრებულოს წევრი, გურიანთის მაჟორიტარი დეპუტატი:
_ გავყიდეთ. სად წავიღებდით? დავასაწყობეთ.
_ სად დაასაწყობეთ?
_ მე არ ვიცი, სადაა, მაგი კოტემ იცის, ჰკითხე კოტეს.
_ ბატონო მერაბ, თქვენ, მაჟორიტარმა დეპუტატმა არ იცით, რატომ ამოთხარეთ თქვენს სოფელში მილები?
_ ეს, კაცო, სახელმწიფო ქონება იყო და გამგეობას გადაეცა განკარგვისთვის, წამოიღო კოტემ, დაასაწყობა და სად წაიღო, რა ვიცი ახლა.
_ მოსახლეობა აცხადებს, რომ ამის სანაცვლოდ გზის გაკეთებას, გარე განათებას, არხის გაწმენდას შეპირდით… გზაც სულ გადათხრილია.
_ კი, კი, ვიცი, კაცო, ყველაფერს აკეთებენ და გააკეთებენ, შუქსაც, ხიდის ქვეშ გზასაც და მეტი რა უნდათ, უზარმაზარი საქმე კეთდება, _ გვითხრა მერაბ მჟავიამ.
ოზურგეთის მუნიციპალიტეტის გამგებლის მოვალეობის შემსრულებელი კონსტანტინე შარაშენიძე აღნიშნულ ფაქტთან დაკავშირებით ასეთ კომენტარს აკეთებს: _ ეს მილები რამდენიმე სოფელში არხების მოსაწესრიგებლად არის გატანილი, განაწილებული, ეკონომიკის სამინისტრომ გადმოგვცა გამგეობას და ჩვენც განვკარგავთ საჭიროებისამებრ.
შარაშენიძე მზადყოფნას გამოთქვამს, ამომწურავად გასცეს პასუხი კითხვას, თუ კონკრეტულად რას მოხმარდა გურიანთიდან წაღებული მილები.
