შეხვედრაზე მხარეებმა განიხილეს ასოცირების შესახებ შეთანხმებასთან დაკავშირებული საკითხები, ღრმა და ყოვლისმომცველი თავისუფალი სავაჭრო სივრცის ჩათვლით. ასევე მართლმსაჯულების, თავისუფლებისა და უსაფრთხოების საკითხები. ყურადღება გამახვილდა ასევე საქართველო-ევროკავშირის სავიზო რეჟიმის ლიბერალიზაციის სამოქმედო გეგმაზე და მუშაობის პროცესზე.
“შეხვედრა დასტურია იმისა, რომ საქართველომ ბოლო წლის განმავლობაში გააკეთა ყველაფერი იმისთვის, რომ ვილნიუსში მოხდეს ამ ხელშეკრულების პარაფირება. სასაუბრო მხოლოდ ტექნიკურ დეტალებზე დარჩა, იმდენად სრულყოფილად შეასრულა ჩვენმა ქვეყანამ სხვა ყველა პირობა,” _ განაცხადა შეხვედრის შემდეგ საგარეო საქმეთა მინისტრმა მაია ფანჯიკიძემ.
“ვილნიუსში დაიწყება ის ისტორიული პროცესი, რასაც ქვია საქართველოს ევროკავშირში გაწევრიანების შეუქცევადობა,” _ აღნიშნა თავის მხრივ სახელმწიფო მინისტრმა ევროპულ და ევროატლანტიკურ სტრუქტურებში ინტეგრაციის საკითხებში ალექსი პეტრიაშვილმა.
აღნიშნული შეხვედრა წინ უსწრებს 24 ოქტომბერს თბილისში დაგეგმილ საქართველო-ევროკავშირის თანამშრომლობის კომიტეტის მე-13 სხდომას, რომელიც საქართველო-ევროკავშირის პოლიტიკური დიალოგის ფარგლებში, მინისტრის მოადგილის დონეზე ყოველწლიურად იმართება.
