_ შინაგან საქმეთა სამინისტროს გურიის სამხარეო მთავარი სამმართველოს, ოზურგეთის, ლანჩხუთის და ჩოხატაურის პოლიციის სამმართველოების დროებითი მოთავსების იზოლატორებში, მაისის აქციებში მონაწილე 26 პირი იყო მოთავსებული, _ ამის შესახებ “გურია ნიუსს” ახალგაზრდა იურისტთა ასოციაციის ოზურგეთის ოფისის ადვოკატმა ჯაბა ზერეკიძემ აცნობა. დაკავებულებს ადმინისტრაციული პატიმრობა ჰქონდათ შეფარდებული. ადვოკატის თქმით, 26-ე პირს აღენიშნებოდა სხეულის მძიმე თუ მსუბუქი სახის დაზიანებები, ანუ ყველა მათგანი ნაცემი იყო _ ზოგი თავის, ზოგი წელის, ზოგიც კი ფეხის არეში.
_ ყველა მათგანს სახეზე აღენიშნებოდა დაზიანებები, უმრავლესობას _ თავზე და ხელზე. როგორც ისინი ამბობენ, ხელკეტებით სცემეს. უმეტესმა მათგანმა სპეცრაზმელებს წინააღმდეგობა არ გაუწია _ ეუბნებოდნენ, დაეკავებინათ, მაგრამ მაინც სცემდნენ და ხელკეტებს ურტყამდნენ, ბევრს რეზინის ტყვიებიც ჰქონდათ მოხვედრილი. რამდენიმე მათგანის თქმით, ფარებმა, რომელიც ეკავათ, ტყვია გაატარა, ანუ ახლოდან ესროდნენ და არა შორიდან, როგორც ამას სახელისუფლებო სტრუქტურები ამტკიცებენ. ოზურგეთის პოლიციის დროებითი მოთავსების იზოლატორში მყოფ პირთა ჯანმრთელობის მდგომარეობა მეტ-ნაკლებად სტაბილური გახდა. მათი უმრავლესობა ამბობდა, რომ მოსამართლემ არც კი მოუსმინა მათ. შემდეგ კი ისინი გადმოიყვანეს აღნიშნულ იზოლატორებში, _ აღნიშნავდა “გურია ნიუსთან” საუბარში ზერეკიძე.
25 ივნისს, შუაღამისას, დაკავების ვადა ამოეწურათ და მათ ახლობლები ოზურგეთში გურიის სამხარეო მთავარი სამმართველოს შენობის წინ ელოდებოდნენ. ამავე ღამეს, გავრცელდა არაოფიციალური ინფორმაცია, იმის შესახებ, რომ დროებითი მოთავსების იზოლატორში დაკავებულთა შორის პრემიერ-მინისტრის ნიკა გილაურის დეიდაშვილი გიორგი გუჯიაშვილიც იყო და მას დედა ოზურგეთში ელოდებოდა, თუმცა მან ჩვენთან კომენტარზე უარი განაცხადა.
დაკავებულებს “სახალხო კრების” ოზურგეთის წარმომადგენლები მთელი დღის განმავლობაში ელოდებოდნენ. მათ დაკავებულთა თბილისში ტრანსპორტირებაც უზრუნველყვეს.
ოზურგეთის დროებითი მოთავსების იზოლატორში განთავსებული იყო რვა პირი. 7 მათგანი უკვე გათავისუფლდა, ერთს კი 35-დღიანი პატიმრობა ჰქონდა შეფარდებული და 5 დღის მერე გაუვა პატიმრობის ვადა.
ამ ეტაპზე, იზოლატორიდან შვიდი დაკავებული გაათავისუფლეს: ხვიჩა კვარაცხელია, აიდმირ ლაგვილავა, ზაზა ხაჩიძე, გიორგი ბუჯიაშვილი, ელგუჯა პაპუნაშვილი, ირაკლი წაქაძე და ლადო ბულბულაშვილი.
მათ გათავისუფლებას პარტია “თავისუფალი საქართველოს” თავმჯდომარე კახა კუკავა და მისი პარტიის წარმომადგენლები ელოდნენ:
_ ჩვენ ველოდებით ლადო ბულბულაშვილს, მე და ლადო ერთად ვიყავით კინოს შენობაშიც და რუსთაველზეც. საკმაოდ იყო ნაცემი. ამ წუთისთვის კატასტროფული მდგომარეობა არ აქვს… ფაქტია, რომ უსამართლოდ მოხვდა საპყრობილეში _ მხოლოდ იმის გამო, რომ იყო ჩვენთან ერთად რუსთაველის გამზირზე! სხვა კონკრეტული დარღვევა სამართალდამცავებს არ დაუსახელებიათ; ეს საქმე გაგზავნილია სტრასბურგის სასამართლოში და ასი პროცენტით ვარ დარწმუნებული, რომ საქმეს მოვიგებთ. ჩვენთვის ეს დღე არის ბრძოლის გაგრძელების დღე, მიუხედავად იმისა, რომ არ არის ადვილი ამდენი, ათეულობით ადამიანის დაპატიმრება.
რაც შეეხება დაკავებულების აქ გადმოყვანას; ოზურგეთში იმიტომ მოხვდნენ, რომ იმდენი პატიმარი ჰყავდათ, თბილისში ადგილი აღარ იყო! ამაღამ თავისუფლდება ჩოხატაურში კიდევ ერთი ჩემი ახლობელი გიორგი მათიაშვილი.
ფაქტობრივად, ეს უფრო სამხედრო ტყვეობის რეჟიმია, ვიდრე ადმინისტრაციული პატიმრობა! მაგალითად, ლადო ბულბულაშვილმა რა დაარღვია და დააშავა, სასამართლოზეც კი არ თქმულა! არ არსებობს დედამიწის ზურგზე ისეთი დოკუმენტი, სადაც მითითებულია, თუ რომელი კანონი დაარღვია მან კონკრეტულად.
_ ბატონო კახა, გავრცელდა ინფორმაცია რომ აქ, ოზურგეთში პრემიერ-მინისტრის ნიკა გილაურის დეიდაშვილიც იყო პატიმრობაში… ამის შესახებ თუ იცით?
_არ ვიცი, თუმცა, გილაური რომ არ უშველიდა და ხელს არ გააქანებდა მისთვის, ეს ნამდვილად ვიცი.
00 სთ და 40 წუთზე გათავისუფლებული 24 წლის ლადო ბულბულაშვილმა “გურია ნიუსს” ექსკლუზიური კომენტარი მისცა:
_ აქციაზე ამიყვანეს, როგორც ყველა, ისე მეც _ რა თქმა უნდა ცემით! მე პირადად კინოთეატრ “რუსთაველში” ამიყვანეს და სპეცრაზმელები შენობის შიგნით, ხელკეტებით გამისწორდნენ… მერე უკვე ავტობუსში ჩაგვსვეს, თბილისში “კაპეზეშიც” … მერე ადგილები აღარ ეყოთ. აქ როცა გადმოგვიყვანეს, ცემას ადგილი აღარ ჰქონია. მინდა ვთქვა, რომ ოზურგეთში სიტუაცია ნორმალური იყო, დამოკიდებულებაც იზოლატორის თანამშრომლების მხრიდან ნორმალური იყო, ყოველდღე გვასეირნებდნენ, სიგარეტზე, საკვებზე პრობლემა არ გვქონია. აქ რომ მოგვიყვანეს, პირველად მაშინ ჩაგვიტარეს სამედიცინო დახმარებაც…
