ისინი ქუთაისის ე.წ. მწვანე ბაზრის მფლობელ გვიშიანების ოჯახს თაღლითობაში ადანაშაულებენ და აცხადებენ, რომ 18 წლის წინ ბაზარი გარდაცვლილმა ზურაბ გვიშიანმა რამდენიმე აქციონერთან ერთად შეისყიდა.
გვიშიანმა, თავის შვილთან ერთად, 65 ადამიანისგან ობიექტის შესაძენად თანხა აიღო და მათ საკუთარ წილებს დაჰპირდა. თუმცა, აქციონერებს არაფერი მიუღიათ. აღნიშნული საქმით დაზარალებულებმა საჩივარი პროკურატურაში შეიტანეს.
“1995 წელს ბატონი გვიშიანი მოვიდა და მითხრა – ბაზრის პრივატიზაცია ხდება და წილში ხომ არ შემოხვალო. დავთანხმდი და მივუტანე ფული. ერთ პროცენტში ვიყავი ჩასმული. თვეები გავიდა, არც დივინდენდებს გვაძლევდნენ და არც არაფერს. სულ მპირდებოდა, რომ ყველფერს მომცემდა, მაგრამ ასე გავიდა 18 წელი, ერთი კაპიკი არ მიგვიღია და მერე ბანკმა ქვითრები რომ ამოიღო, ჩემს მიერ შეტანილი 2000 დოლარის ნაცვლად, ქვითარზე 1000 იყო დაფიქსირებული. დანარჩენი ალბათ, თვითონ ჩაიდო ჯიბეში. 65 ადამიანია დაზარალებული,” _ განაცხადა აქციის მონაწილე ლალი გოშელაშვილმა.
ქუთაისის რაიონული პროკურორის გიორგი ცხოვრებაძის განმარტებით, აღნიშნულ საქმეზე დაზარალებულებმა პროკურატურაში საჩივარი მიმდინარე წლის იანვარში შეიტანეს. თუმცა, საქმე დანაშაულის ნიშნების არარსებობის გამო მალევე დაიხურა.
აღნიშნულ საკითხზე განსხვავებული პოზიცია აქვს ქუთაისის მწვანე ბაზრის სამეთვალყურეო საბჭოს წარმომადგენელ დავით გვიშიანს, რომელიც ბაზრის გარდაცვლილი მფლობელის -ზურაბ გვიშიანის შვილია.
მისი განცხადებით, ამ ხალხმა საკუთარი წილი იმ წელსვე დათმო და თანხებიც უკან დაუბრუნდათ. გვიშიანი ბრალდებებს შეთითხნილს უწოდებს და აცხადებს, რომ უკვე ყოფილმა აქციონერებმა წილების უკან დაბრუნება გადაწყვიტეს, მაშინ, როცა იგივე პრეტენზიით ზურაბ გვიშიანის სიცოცხლეშივე არავინ შეუწუხებიათ.
“საქმე გამოიძიეს და აჩვენეს, რომ ბრალი არ მიგვიძღვის. ეს ჩვენს წინააღმდეგ შეთითხნილი ბრალდებებია ყოფილი აქციონერების მხირდან, რათა თავინთი წილები უკან დაიბრუნონ. ეს ხალხი ცრუობს. ცრუ ბრალდებებს უყენებს მამაჩემს. მამაჩემის სიცოცხლეში არავითარი პრეტენზია არ გამოუთქვამთ. კაცი გარდაიცვალა და ამის მერე დაიწყეს რაღაცების შეთითხვნა. მათი ბრალდებები რომ მართალი ყოფილიყო ამდენი წლის განმავლობაშიც იტყოდნენ რამეს,” _ უთხრა “გურია ნიუსს” დავით გვიშიანმა.
