თქვით, ვინ მოგცათ ეს მიმართვა. მე, პირადად, არ მქონდა ამ საბუთის ასლი. იყო მხოლოდ ერთი ორიგინალი, მისი ქსეოასლები არ გაკეთებულა, იმიტომ, რომ არ შეიძლებოდა. არავის არ ჰქონია ამ საბუთის ასლი, არც ადგილობრივ ლიდერს, _ აღნიშნავს ” გურია ნიუსთან” კოალიცია “ქართული ოცნება _ დემოკრატიული საქართველოს” შემავალი სუბიექტის _ “თავისუფალი დემოკრატების” ოზურგეთის რაიონული ორგანიზაციის თავმჯდომარე დიმიტრი კვერღელიძე.
საუბარია იმ მიმართვასთან დაკავშირებით, რომელიც ორი თვის წინ კოალიციაში შემავალი პარტიის ლიდერებმა “ქართული ოცნების” ცენტრალურ საარჩევნო შტაბს და საპრეზიდენტო კანდიდატს გაუგზავნეს და რომელშიც ოზურგეთის გამგებლის მოვალეობის შემსრულებელს კოტე შარაშენიძეს სამართლებრივად და პოლიტიკურად არასწორი ქმედებების გახორციელებაში დებდნენ ბრალს.
წერილი _ “ვინ გატეხა “კაცური სიტყვა” ოზურგეთის საარჩევნო შტაბში” “გურია ნიუსის ” ვებგვერდზე რამდენიმე დღის წინ გამოქვეყნდა. წერილში იმის გარდა, რომ პარტიების ლიდერები მიმართვის გამსაჯაროებელს ეძებენ, კიდევ ერთი საინტერესო დეტალი გაჟღერდა _ “ქართული ოცნების” ოზურგეთის საარჩევნო შტაბის ხელმძღვანელი დავით დარჩია აცხადებს, რომ დოკუმენტზე მისი ხელმოწერა გაყალბებულია.
საზოგადოების მაღალი ინტერესის გამო, ჩვენ აღნიშნულ თემას ისევ დავუბრუნდით და კომენტარი “თავისუფალი დემოკრატების” ოზურგეთელ ლიდერს დიმიტრი კვერღელიძეს ვთხოვთ.
_ ბატონო დიმიტრი, ვის ჩააბარეთ აღნიშნული დოკუმენტი?
_ ვერ დავასახელებ მაგ პიროვნებას, იმიტომ რომ არ შეიძლება. ეს იყო შინაგანაწესის დარღვევა და სიმართლე გითხრათ, მაგ მიმართვასთან დაკავშირებით აჟიოტაჟის ატეხვა ძალიან მიკვირს. ეს იყო შიდა მოხმარების, შიდა პარტიული საკითხი, რომლის გასაჯაროება არ შეიძლებოდა. ჩვენ, შეიძლება, ძალიან ბევრი შიდა პარტიული საქმეები გვქონდეს, მაგრამ ყველას სააშკარაოზე გამოტანა ხომ არ შეიძლება?!
_ თუმცა, ეს მიმართვა საჯარო გახდა…
_ ყველაზე მეტად, იცით, რა მაინტერესებს? ვინ გაასაჯაროვა ეს მიმართვა?
_ ამას მე მეკითხებით?
_ არის რაღაცა თემები, რომელიც არ უნდა გასაჯაროვდეს.
_ თქვენი კითხვის ადრესატი, ალბათ, კოალიციაში უნდა ეძებოთ, ბატონო დიმიტრი… თქვენ ხელი მოაწერეთ დოკუმენტს?
_ ჯერ მაჩვენეთ დოკუმენტი და გეტყვით…
მიმართვის ასლის ჩვენების შემდეგ, დიმიტრი კვერღელიძე ამბობს, რომ საბუთზე ნამდვილად მისი ხელმოწერაა.
_ კი, ეს ხელმოწერა ნამდვილად ჩემია… არ უარვყოფ. თქვენ ეს ვინ მოგცათ?
_ ჩვენ წყაროს ვინაობას ვერ გავამხელთ.
_ არა, იქნებ, მოგვეხმაროთ ამის დადგენაში. მე მაშინ გავაკეთებ განცხადებას, როცა დამიდგენთ, ვინ გაასაჯაროვა დოკუმენტი. კიდევ ერთხელ გავიმეორებ _ ეს არის შიდა მოხმარების დოკუმენტი. იმ ადამიანმა, ვინც ეს გაასაჯაროვა, პოლიტიკურად ძალიან დიდი შეცდომა დაუშვა. პირველ რიგში, ძალიან მაინტერესებს, ვინ დაარღვია პარტიული დისციპლინა, ვინ გაასაჯაროვა შიდა მოხმარების დოკუმენტი? მე შემიძლია ერთი რამე ვთქვა _ დათო დარჩიას მაგივრად მე არ მომიწერია ხელი. მე პასუხს ვაგებ ჩემს ხელმოწერაზე. ისე თქვენ რატომ გაგიჩნდათ ეჭვი, რომ დათომ ხელი არ მოაწერა ამ დოკუმენტს?
_ თავად დავით დარჩიამ განაცხადა, რომ დოკუმენტზე მისი ხელმოწერა არაა. მაშინ ვის შეეძლო ეს გაკეთებინა?
საუბარში დავით დარჩია ჩაერთო, რომელიც დარწმუნებით ამბობდა, რომ ხელი არ მოუწერია, თუმცა, არც აინტერესებს ეს ამბავი:
_ გამოიკვლიეთ კაცო, გამოიკვლიეთ. ჩვენთვის ეს თემა დამთავრებულია, პირადად ჩემთვის, მაინც. სიმართლე გითხრათ, არ მაინტერესებს. კიდევ ახალი რაღაცეების ჩხრეკა რა საჭიროა _ დამთავრდა ამ თემაზე საუბარი.
_ ბატონო დავით, საზოგადოებაში გაჩნდა კითხვა, თ რატომ არ აინტერესებს დავით დარჩიას, ვინ მოაწერა ხელი მის მაგივრად დოკუმენტს? იქნებ, ნამდვილად მოაწერეთ ხელი და ახლა, როცა ეს ფაქტი საჯარო გახდა, თქვენი გადაწყვეტილების გახმაურება აღარ მოგწონთ?
_ რომ მომეწერა, მერე რა? მაგ დოკუმენტს არაფრად არ ვთვლი, ამით არც არავინ მოიხსნება და არც არავინ დაინიშნება. ჩემი ხელმოწერა გაინტერესებთ თუ რასაც დათო დარჩია ამბობს? რომელს აქვს უფრო მეტი ძალა და მეტი მნიშვნელობა? კი, ბატონო ეძებეთ, მე დავამთავრე.
_ ბატონო დავით, მოაწერეთ თუ არა ხელი დოკუმენტს?
_ არაფერზე მე ხელი არ მომიწერია.
_ ვის ჩააბარეთ დოკუმენტი?
_ მამაზეციერს ეპყრა, ვერ ხედავთ? _ გვითხრა დარჩიამ და გვთხოვა, რომ წინასაარჩევნოდ ამ თემაზე ყურადღებას ნუღარ გავამახვილებდით.
აღნიშნულ დოკუმენტზე კიდევ ერთ ხელმომწერი, “ეროვნული ფორუმის” ოზურგეთის ლიდერი შოთა გოგიბერიძე ამ საკითხზე კომენტარს არ აკეთებს:
_ არ ვაკეთებ მაგ თემაზე კომენტარს, ვერ გესაუბრებით მაგასთან დაკავშირებით.
_ რატომ?
_იმიტომ, რომ როდესაც ეს შეხვედრა ჩატარდა. მე დავაფიქსირე ჩემი პრინციპული პოზიცია. მიმართვა შედგა, მაგრამ ამავე დროს დათქმა გვქონდა, რომ ეს თემა არ უნდა გასაჯაროებულიყო. მე ვიცავ წესს და რიგს, და კომენტარს ვერ გავაკეთებ.
_ ბატონო შოთა, ვის შეიძლებოდა მოეწერა ხელი მიმართვაზე დავით დარჩიას მაგივრად?
_ მით უმეტეს მაგაზე ვერ გაგცემთ პასუხს.
