გასული კვირის ხუთშაბათს, ავღანეთში დაღუპული 20 წლის ოზურგეთელი გია გოგუაძე დაკრძალეს. ქართველი ჯარისკაცი ავღანეთში სამშვიდობო მისიით იმყოფებოდა. ის თალიბების თავდასხმის დროს დაიჭრა და ექიმებმა ჭრილობების სიმძიმის გამო, გოგუაძის გადარჩენა ვერ შეძლეს.
ახალგაზრდა ჯარისკაცის დასაფლავებაზე, ოზურგეთში, თავდაცვის მინისტრი ბაჩო ახალია და ამავე სამინისტროს წარმომადგენლები იმყოფებოდნენ. განსვენებულის ოჯახს სამძიმარი საქართველოს პრეზიდენტმა და ელჩებმა გამოუცხადეს, გასვენებაში ადგილობრივი ხელისუფლების წარმომადგენლებიც მივიდნენ.
გია გოგუაძემ, 2009 წელს, ოზურგეთის მუნიციპალიტეტის სოფელ ბოხვაურის საჯარო სკოლა დაამთავრა. როგორც მისმა მეგობრებმა გვითხრეს, მათ გიას სახით, ერთგული და სანდო ადამიანი დაკარგეს:
_ ის იყო მამაცი, მებრძოლი და პატიოსანი ახალგაზრდა. ამ წუთებში, როდესაც გიას დაკრძალვაზე ვართ, ძალიან გვიჭირს მასზე საუბარი.
სამხედრო ექსპერტმა ირაკლი სესიაშვილმა “გურია ნიუსთან” საუბრისას თქვა, რომ ავღანეთში ოთხი ქართველი ჯარისკაცი დაიჭრა:
_ სპეცოპერაციის დროს, სამი ქართველი ჯარისკაცი აფეთქდა ნაღმზე. მათ გაუკეთდათ ოპერაცია. მათ გარდა, ოპერაციის დროს, კიდევ ერთი ქართველი ჯარისკაცი დაშავდა. ორი სამკურნალოდ გერმანიაში გადაიყვანეს, დანარჩენი კი ავღანეთში მკურნალობს. ეს ინფორმაცია მეგობრებმა მომაწოდეს _ კავშირები მაქვს სამხედროებთან, 13 წელია ვიცავ მათ უფლებებს და ვცდილობ მათი ინტერესების ლობირებას.
_ ბატონო ირაკლი, რატომ არ ავრცელებდა ამ ინფორმაციის თავდაცვის სამინისტრო?
_ თავდაცვის სამინისტრომ ეს ინფორმაცია გაავრცელა მას შემდეგ, რაც მე რამდენიმე ჟურნალისტს ვთხოვე, ამ სამინისტროსთვის მიემართათ და მიეღოთ პასუხი. ჩვენი მთავრობისთვის ავღანეთში ეს მისია არის ძალიან მნიშვნელოვანი _ ხელისუფლება ამით დიდ ქულებს იწერს დასავლეთის თვალში, ჩვენთვის კი ნაკლები სარგებელი მოაქვს. ხელისუფლებას პოლიტიკა აქვს ასეთი _ მსგავსი პრობლემები არ გაახმოვანონ და უარყოფითად კონტექსტში არ მოიხსენიონ ავღანეთის მისია, რომ საზოგადოებაში უარყოფითი განცდები არ გაჩნდეს.
_ რამდენად მართებულად მიგაჩნიათ ქართველი ჯარისკაცების ყოფნა ავღანეთში?
_ მე ვფიქრობ, რომ ჩვენ უნდა მივიღოთ მონაწილეობა ავღანეთის მისიაში, ნატოში ინტეგრაციის პროცესისთვის, მაგრამ ეს უნდა იყოს ადეკვატური, შესაბამისი გამოწვევებისა და სიტუაციის მიმართ _ როცა ტერიტორიები ოკუპირებული გვაქვს და ხელისუფლება მუდმივად გველაპარაკება, რომ რუსეთისგან ველოდებით მორიგ აგრესიას, ცხადია, არ არის მართებული, შენი საუკეთესო ქვედანაყოფები გააგზავნო სხვა ქვეყნის პრობლემის მოსაგვარებლად და ამით დაასუსტო შენი თავდაცვის უნარიანობა.
_ ბევრს აინტერესებს, რატომ მიდიან ქართველი ჯარისკაცები ავღანეთში. ამბობენ, რომ ისინი იქ მაღალი ხელფასის გამო მიდიან.
_ ის, რომ ჯარისკაცები იქ მიდიან სამშობლოს დასაცავად და ამას აკეთებენ საკუთარი სურვილით, ზღაპრად მეჩვენება _ ავღანეთში სამშობლოს არ იცავენ. სამშობლოს დაცვა შეიძლება საკუთარ ტერიტორიაზე, მაგრამ ჯარში ის უნდა გააკეთო, რასაც პოლიტიკური ხელმძღვანელობა გიბრძანებს. მეორე მიზეზი ისაა, რომ ეს მათი პროფესიაა. რასაკვირველია, არის ფინანსური დაინტერესებაც და კიდევ ის, რომ საქართველოში სხვა სამსახურის შოვნა ძნელია.
_ და ბოლოს, საინტერესოა, თქვენი მოსაზრება ამერიკის შეერთებული შტატების ახალ გადაწყვეტილებაზე, ავღანეთიდან ჯარის გამოყვანასთან დაკავშირებით.
_ ავღანეთი ნატოს ქვეყნებისთვის, და მათ შორის ამერიკის შეერთებული შტატებისთვის, აქილევსის ქუსლად არის ქცეული _ დასავლეთი ძალიან ბევრ ფულს ხარჯავს ავღანეთის მისიაში და უნდათ, რომ ადგილობრივ ხელისუფლებას გადააბარონ მართვის სადავეები. შეერთებულმა შტატებმა უკვე დაიწყო მოლაპარაკება თალიბებთან. ალბათ, გარკვეულ შეთანხმებას მიაღწევენ თუ ნატოს ჯარები გავა და შემცირდება თალიბების მხრიდან ადგილობრივ ხელისუფლებაზე თავდასხმა. ამ პირობებში ამერიკის შეერთებული შტატები და სხვა ქვეყნები ნელ-ნელა დაიწყებენ ჯარის გაყვანას ავღანეთიდან. რაც შეეხება საქართველოს პოზიციას, ჩემი აზრით, ხელისუფლება ფიქრობს, რომ ავღანეთში ჯარის შეყვანით მსოფლიო პოლიტიკურ ფონს თავის სასარგებლოდ შეცვლის. შეიძლება ვცდებოდე, მაგრამ მე ასე ვფიქრობ _ დასავლეთი ორმაგად გაიხარებს მაშინ, როდესაც მას გამოჰყავს ჯარი და ჩვენ შეგვყავს. ამით ხომ მათ საქმეს ჩვენ ვაკეთებთ?!
სტატიის მომზადების დროს, ჩვენ რამდენჯერმე ვცადეთ, თავდაცვის სამინისტროდან მოგვეპოვებინა კომენტარი, თუმცა, ამაოდ. ოთხი დაჭრილი ჯარისკაცის შესახებ ინფორმაცია არც ამ სამინისტროს ვებგვერდზეა გამოქვეყნებული.
