საუბარია პარტია “ქართული ოცნება-დემოკრატიული საქართველოს” ოზურგეთის საარჩევნო შტაბის ხელმძღვანელსა და პრემიერ-მინისტრის მეგობარ დავით დარჩიაზე, აღნიშნული პარტიის გურიის შტაბის ხელმძღვანელ გოჩა მეგრელიშვილზე და ასევე, ენერგეტიკის მინისტრ კახი კალაძის უახლოეს მეგობარზე, წარმატებულ ოზურგეთელ ბიზნესმენ ილა კეჭაყმაძეზე.
საზოგადოება, სწორედ ილა კეჭაყმაძეზე აკეთებს აქცენტს. მას დასახელებული კანდიდატებიდან ყველაზე რეალური შანსი აქვს. სწორედ მის სახელს უკავშირდება ოზურგეთში გიორგი მარგველაშვილის მხარდამჭერთა დარბაზის შექმნა, რომლის წევრების უშუალო ჩარევით გახდა შესაძლებელი რაიონში მარგველაშვილის მაღალი შედეგებით გამარჯვება.
ილა კეჭაყმაძე “გურია ნიუსთან” საუბარში გუბერნატორის პოსტზე მის შესაძლო დანიშვნას კატეგორიულად გამორიცხავს და აცხადებს, რომ მომავალ გუბერნატორს მხარს დაუჭერს.
დავით დარჩია კი აღნიშნავს, რომ ოზურგეთში მარგველაშვილის ასეთი მაღალი მაჩვენებლით გამარჯვება მისი და მისი შტაბის დამსახურებაა. მას სურვილი აქვს გურიის გუბერნატორის პოსტზე საკუთარი თავი იხილოს.
ძალიან მოკლე კომენტარით შემოიფარგლა პარტია” ქართული ოცნება-დემოკრატიული საქართველოს” გურიის შტაბის ხელმძღვანელი გოჩა მეგრელიშვილი.
შეიძლება თუ არა ვიხილოთ გუბერნატორის პოსტზე ზემოთ დასახელებული კანდიდატურები, ამაზე პასუხებს ჩვენი რესპოდენტებიდან გაიგებთ.
დავით დარჩია, პარტია “ქართული ოცნება-დემოკრატიული საქართველოს” ოზურგეთის საარჩევნო შტაბის ხელმძღვანელი და პრემიერ-მინისტრის მეგობარი:
_ რაღაც ისეთ შეკითხვას მისვამთ, მაშინ მე შეგეკითხები, რატომ არ შეიძლება?
_ ბატონო დავით, მე არ გეუბნებით, რომ არ შეიძლება, გვაქვს ინფორმაცია, რომ თქვენ გსურთ გუბერნატორობა და თქვენი კომენტარი გვაინტერესებს ამასთან დაკავშირებით.
_ მეც გპასუხობთ, რომ რატომ არ შეიძლება ვიყო გუბერნატორი? მსურს ერთია და მეორე, ის რომ დათო დარჩიას გადასაწყვეტი არაა ეგ, ყოველშემთხვევისთვის კიდევ ერთხელ გაგცემთ კითხვაზე პასუხს, რომ რატომ არ შეიძლება ვიყო მე გუბერნატორი? იმასაც დაგიკონკრეტებთ, რომ ჩემი სურვილია ნამდვილად გავხდე გუბერნატორი. ჩვენ არჩევნები მოვიგეთ ოზურგეთში და ეს კოალიციური რეჟიმისა და შტაბის დამსახურებაა, რომლის ხელმძღვანელიც ვიყავი მე, ჩვენ მაქსიმუმი გავაკეთეთ ამასთვის. მე არავისზე ნაკლები საქმეები არ მიკეთებია ჩემი რაიონისთვის.
_თქვენ ამბობთ, რომ არჩევნების მოგება ოზურგეთში თქვენი და შტაბის დამსახურებაა, ამიტომ გაგიჩნდათ ამბიცია გახდეთ გუბერნატორი?
_ მე ვცხოვრობ ოზურგეთში, ვარ გურული და მსურს მაქსიმუმი გავაკეთო გურიისთვის.
გოჩა მეგრელიშვილი, პარტია “ქართული ოცნება-დემოკრატიული საქართველოს” გურიის საარჩევნო შტაბის ხელმძღვანელი:
_ არ ვიცი. ვერ გეტყვი ვერაფერს, სურვილი ძალიან ბევრს აქვს და მათ შორის მეც, მაგრამ ასე, რომ ღიად და ხმამაღლა ვლაპარაკობდე, ამის სურვილი ნამდვილად არ მაქვს. თუ ვინმე რამეს ლაპარაკობს, იმაზეც კომენტარი როგორ გავაკეთო? არჩევნების შემდეგ ამ თემაზე ჯერ საუბარი ოფიციალურად არ ყოფილა. რაღაც საუბარი რომ არ ყოფილიყო, ისე არ იტყოდით არა? აწი თუ იქნება მაგის საქმის კურსშიც ჩაგაყენებთ, მე ჩემი მოვალეობა არჩევნებზე შევასრულე და ახლა თბილისში ვარ.
ილა კეჭაყმაძე, ბიზნესმენი:
_ არა. ეს გამორიცხულია. ვინც იქნება გურიის გუბერნატორი, მე, პირადად გვერდზე დავუდგები, რომ გურიაში ყველაფერი იყოს კარგად, დიდი სურვილი მაქვს, გურია იყოს ისეთი, როგორიც ჩვენი წინაპრების დროს ყვაოდა, მე ამისთვის ყველაფერს გავაკეთებ.
_ანუ ბატონ დავით დარჩიას კანდიდატურას დაუჭერთ მხარს?
_მივესალმები ბატონ დავით დარჩიას კანდიდატურას, რა თქმა უნდა, ასევე სხვას ნებისმიერს.
_ შეიძლება თუ არა ამ პოსტზე, თქვენი სამეგობრო წრიდან გახდეს ვინმე?
_ ეს ჩემი გადასაწყვეტი ნამდვილად არ არის, ამას გადაწყვეტს მთავრობა.
_ საუბრობენ, იმაზე, რომ არჩევნები ოზურგეთში ძალიან მაღალი შედეგით თქვენი უშუალო ჩარევით მოიგო “ქართულმა ოცნებამ”, რა მექანიზმებით მოახერხეთ ეს?
_ მე ყველას დიდ მადლობას ვუხდი, დარბაზს, შტაბს, და თითოეულ ამომრჩეველს ყველა გურულს, თითოეულ ოზურგეთელს, ვინც მონაწილეობა მიიღო. მე არავის არ გავყოფ, ჩვენ ყველა ერთი ვართ.
