“ხშირად იყო საუბარი, რომ ეს სითხე შესანიშნავი საშუალებაა არჩევნების გასაყალბებლად. კიდევ ის, რომ მისი განეიტრალება და ხელიდან მოშორება ძალიან ადვილია მზისგან დამცავ ლოსიონში დასველებული ბამბით. კომისიის თავმჯდომარემ, მერი ნადირაძემ განმიცხადა, რომ მსგავსი სერტიფიკატის არსებობის შესახებ არაფერი იცის და არც ის იცის, სითხე რა შემადგენლობისაა. მაშინ მე განვუცხადე, რომ უცნობი შემადგენლობის სითხეს ხელზე არ დავისხამდი და არც მას ჰქონდა ამის დაძალების უფლება. ამაზე ერთ-ერთმა კომისიის წევრმა მითხრა,შემადგენლობა ფლაკონზე აწერია. აიღო ფლაკონი საჩვენებლად, ზედ დახედა და თქვა, უი, არ აწერიაო. ისიც არ იცოდნენ, ეწერა თუ არა ზედ რაიმე. მოვითხოვე მოეცათ ბიულეტენი. კომისიის თავმჯდომარემ კი განმიცხადა, რომ მე კანონს ვარღვევდი და ბიულეტენს არ მომცემდა. პასუხად ვუთხარი, კანონს ამ შემთხვევაში საერთაშორისო ნორმების მიხედვით თვითონ არღვევდა, რადგან ასე არცერთ ცივილიზებულ სახელმწიფოში არ ხდება. უცნობი შემადგენლობის სითხეს არავინ წაისვამს.
“დავუშვათ ასეთი რამ: პირობითად ფლაკონი, ამ მოცემული სითხით, გავუტოლოთ პარფიუმერულ ნაწარმს. ჩვენ ხომ ამ სითხეს ხელზე ვისხამთ, შესაბამისად, მასზე დაბეჭდილი უნდა იყოს ინფორმაცია, რა ინგრედიენტებისგან შედგება ის -დამამზადებელი ფირმის დასახელება, ქვეყანა და ასევე უნდა გააჩნდეს შტრიხ-კოდი. სხვა შემთხვევაში ასეთი ნივთიერების ადამიანზე გამოყენება საერთაშორისო ნორმებით აკრძალულია.
“აიღეთ ხელში რომელიმე პაფიუმერული ნაწარმი, ვთქვათ კრემი, ან ლოსიონი და დახედეთ, მასზე აუცილებლად იქნება დატანილი ასეთი ინფორმაცია, აქ სიჯიუტე ვერაფერს გიშველით-ყველა შემთხვევაში მტყუანი ბრძანდებით.
“შეგიძლიათ შეეკითხოთ ნებისმიერ ქიმიკოსს, არსებობს მსოფლიოს ქიმიური ლაბორატორიებისათვის დადგენილი წესი რომელიც შეუვალია – ნებისმიერი ნივთიერება რომელსაც არ აკვრია ეტიკეტი განადგურებას ექვემდებარება.
“ალბათ, გახსოვთ “საყვარელი” პრეზიდენტი ტელეეკრანებიდან როგორ გაჰყვიროდა, ჩვენ არ ვართ ბანანის რესპუბლიკაო. ასეთი ნორმების დამკვიდრებით შეიძლება, უარესიც გავხდეთ.
“ჩემის აზრით, მოცემულ შემთხვევაში კომისიის თავმჯდომარე უნდა წასულიყო კომპრომისზე და გადმოეცა ბიულეტენი, რადგან ჩემს უფლებებს ის აშკარად ლახავდა, თუმცა მან ეს არ გააკეთა. როგორც გურიაში იტყვიან, “ჯორზე შეჯდა”, _ განაცხადა ჩვენთან საუბრის დროს გურამ გოგოლაშვილმა.
ოზურგეთის #60 საოლქო საარჩევნო კომისიის თავმჯდომარე ზვიად თენიეშვილის თქმით, საარჩევნო უბნის თავმჯდომარე კანონის ფარგლებში მოიქცა.
” ბატონ გურამ გოგოლაშვილს უკვე გავეცით პასუხი. 60/21 საარჩევნო უბნის თავმჯდომარე კანონის შესაბამისად მოიქცა და აქედან გამომდინარე მას არ მიეცა ხმის მიცემის უფლება. ბატონ გურამს აუცილებლად უნდა გაეკეთებინა მარკირება”, _ გვითხრა ზვიად თენიეშვილმა.
