ახლა ყველა საქმე გვერდზე უნდა გადადოს პოლიციამ, სოფლის რწმუნებულმა თუ მაჟორიტარმა, სრულიად გურიის ხელისუფლებამ და შეაჩერონ ძროხების ქურდობა, რომელიც მხარეს მეტასტაზივით მოედო, _ ამბობენ ოზურგეთის მუნიციპალიტეტის სოფელ ჭანიეთის მცხოვრებლები, რომელთა შორის ერთ_ერთს მეორე ძროხა მას შემდეგ მოპარეს, რაც “გურია ნიუსმა” 30 ივნისის ნომერში გამოაქვეყნა წერილი გურიაში ძროხის ქურდების თარეშის შესახებ. ხალხმა პოლიციას მიმართა, სამართალდამცავები კი მათ ქმედით დახმარებას ჰპირდებიან, თუმცა, შედეგი არ ჩანს.
“გურია ნიუსს” ჩვენმა წყარომ ექადიიდან (ოზურგეთის გარეუბანი) აცნობა, რომ, ერთი თვის განმავლობაში, სამი მეწველი ძროხა დაიკარგა, მანამდე _ უფრო მეტი; სოფელ შემოქმედში, ამ დღეებში, ორ ოჯახს საუკეთესო ჯიშის ძროხები მოიპარეს; ქურდობა განახლდა სოფელ ლაითურშიც, საიდანაც გვატყობინებენ, რომ გასულ წელს, იქ 16 ძროხა მოიპარეს, ახლაც კი ერთ_ერთი ოჯახიდან მეწველი ძროხა წაიყვანეს; სუფსის მცხოვრებლებს ცხენები და ძროხები დაეკარგათ.
ჩვენ უახლოეს ნომერში მოგაწვდით ზუსტ ინფორმაციას დაკარგული თუ მოპარული პირუტყვის რაოდენობის შესახებ, რაც მკითხველთან ერთად, ბევრ ჩინოვნიკს შეაცბუნებს. საზოგადოებაში არის მითქმა_მოთქმა სახორცე პირუტყვის სარეალიზაციო პირობების გაუარესების შესახებ და ვარაუდობენ, რომ ამანაც გამოიწვია ხორცის გაძვირება, აქედან გამომდინარე კი გამოცოცხლდა ძროხების ქურდობის ძველი ტრადიცია.
ვეტერინარიის შესახებ კანონში შესული ცვლილებები ითვალისწინებს ვეტერინალურ_სანიტარული უსაფრთხოების უზრუნველყოფას და შემდეგი მოთხოვნების დაცვას: ა) ცხოველების სახორცედ დაკვლა, მათი რეალიზაციის მიზნით, დასაშვებია მხოლოდ ვეტერინალურ_სანიტარული ზედამხედველობის ქვეშ. ბ) ცხოველების, მეცხოველეობის ნედლეულისა და პროდუქტების დამზადება, შენახვა, გადამუშავება, გადაზიდვა და რეალიზაცია დასაშვებია მხოლოდ შესაბამისი ვეტერინალურ_სანიტარული უსაფრთხოების წესების დაცვით.
ოზურგეთის მცენარეთა და ცხოველთა დაცვის სამსახურში “გურია ნიუსს” უთხრეს, რომ, წესით, პირუტყვი სასაკლაოზე უნდა იკვლებოდეს: “ადრე კარდაკარ მივდიოდით, ვესწრებოდით დაკვლას, ვაძლევდით შესაბამის საბუთს, იყო თუ არა პირუტყვი ჯანმრთელი. ახლა ეს აიკრძალა. ალბათ, აშენდება სასაკლაოები და საქმე უფრო გამარტივდება”.
ოზურგეთში, გურიის ქუჩის #12_ში მდებარე “ხორცის სახლის” მეპატრონე, ლევან ბურჭულაძე ამბობს, რომ გამორიცხულია, ვინმესგან ადგილზე მიიღოს დაკლული პირუტყვის ხორცი:
_ ახლა “ბოინი” არსად არის, მაგრამ ყოველთვის გვაქვს ახალი ხორცი: ჯერ ვუთანხმდებით პირუტყვის პატრონს, მერე მივდივართ სახლში და ადგილზე ვკლავთ. მას ამოწმებს ექიმი და საღამოს მოგვაქვს მაღაზიაში, ვრთავთ ვენტილაციას და დახლმაცივარში ვდებთ. აბსოლუტურად დაცულია ყველა სანიტარული ნორმა. მეპატრონეს საბუთით, ხელწერით და წესის დაცვით ვართმევთ ხორცს. გამორიცხულია, ვინმემ ნაქურდალი საქონელი შემოგვაპაროს, _ ამბობს იგი.
“გურია ნიუსს” არაერთი წყარო დაუჯერებელ ამბებს უყვება: “სად იკარგება ძროხები, ვინ იპარავს ან სად მიჰყავთ, ეს მოჰკითხეთ მთავრობას, საბაჟოებს… ვითომ არ იციან? თუ არ იციან, დაუკვირდნენ, რა ხდება. გაივსო ჩვენი პირუტყვით თურქეთი თუ აზერბაიჯანი. შემოდიან უცხო პირები უცხო ქვეყნებიდან თუ საქართველოს სამხრეთი და აღმოსავლეთი რეგიონებიდან, წარმოგიდგენენ ინდმეწარმის საბუთს და სურთ, ცოცხალი პირუტყვის ყიდვა. თუ იყიდა ორი სული, ჩაწერს ხუთს, ათს, შემდეგ ნაქურდალ ძროხებს მიამატებს ზედ, რომელსაც აქაური ავაზაკებისგან ყიდულობს და გაუდგება გზას. წადი და ეძიე. პოლიცია თუ გააჩერებს, წარუდგენს საბუთს, რამდენი ძროხაც იყიდა და დამთავრდა ამბავი”, _ ამბობს წყარო.
გამართლდება თუ არა ვარაუდი იმის შესახებ, რომ გურიიდან მოპარული ძროხები აღმოსავლეთ საქართველოში, თურქეთსა თუ აზერბაიჯანში წაასხეს, უახლოესი მომავალი გვიჩვენებს. გურიის სამხარეო პოლიცია კი ჯერჯერობით მხოლოდ გვპირდება, რომ ვერავინ შეძლებს, ძველი დრო და განუკითხაობა დააბრუნოს, საქმეს აუცილებლად გამოიძიებენ და დამნაშავეებს იპოვიან.
