“მე ვითხოვ დამიბრუნონ “სახალხო ბანკი”. “ლიბერთი ბანკში” არაფერია დამატებული. უნდა მომხდარიყო ორი აქტივის შერწყმა. თუ “ლიბერთი ბანკს” არ აქვს ნაყიდი ახალი ლიცენზია, მაშინ სასამართლომ უნდა დაადგინოს, როგორ გახდა “სახალხო ბანკი” “ლიბერთი ბანკი” მე არ მინდა “ლიბერთი ბანკი, მე მინდა “სახალხო ბანკი”. ეს ჩვენი შენობაა, ჩვენი სათაო ოფისია. ჩვენი ოფისებია. ჩვენ ვითხოვთ ჩვენსას, სხვისი არაფერი გვინდა.
2008 წელს, ახალ წლამდე 3 დღით ადრე, ჩვენთან მოვიდა გიორგი გოგუაძე და განაცხადა: “თუ სამი დღის ვადაში არ გააფორმებთ ბანკს და ხელს არ მოაწერთ საბუთებს, დიდი უსიამოვნებები გექნებათო. თავიდან საერთოდ არ გვინახავს ის 23 წლის მოლდაველი. იგი მოვიდა ბანკში, ჩვენ საერთოდ არ დაგვლაპარაკებია. მხოლოდ ინგლისურად საუბრობდა, ვიღაცეებთან კონსულტაციას გადიოდა. დაიწყეს საბუთებზე ხელის მოწერა. რომელსაც ხელს აწერდა ნოტარიუსი, რომელიც ჩვენს ბანკთან თანამშრომლობდა. ჩემთან, საბუთებზე ხელის მოსაწერად ღამის 2 საათზე მოვიდნენ, ჩემს შვილთან _ ღამის 4 საათზე. 28 დეკემბრიდან დაწყებული 29 დეკემბრის ჩათვლით, ჩვენ ყველა საბუთს მოვაწერეთ ხელი და გვითხრეს _ არც ბანკში და არც ბანკთან ახლოს არ დაგინახოთო.
_ თქვენ დაახლოებით ერთი წლის წინ პრესკონფერენცია მოაწყვეთ, მაგრამ განცხადება არ გააკეთეთ. რატომ?
_ 2012 წლის არჩევნების შემდეგ, ჩვენს ხელთ არსებული ყველა დოკუმენტი გადავეცით პროკურატურას. დავაპირეთ პრესკონფერენციაზე საზოგადოებისთვის გვეთქვა ყველაფერი. ჩვენთან ერთად იყო გიორგი გოგუაძე. რომელიც პრესკონფერენციამდე 5 წუთით ადრე მეუბნება_მირეკავენ ეროვნული ბანკიდან და შეხვედრა შემომთავაზესო. ვუთხარი_შენ დაგირეკეს ეროვნული ბანკიდან, მაგრამ ჩემთვის არავის დაურეკავს-თქო. პრესკონფერენციაზე განცხადება მე უნდა გამეკეთებინა, მაგრამ რადგან ასეთი რამ თქვა, ვუთხარი: რადგან შენ დაგირეკეს, განცხადება გააკეთე შენ-თქო. გააკეთა კიდეც და თქვა, რომ დაურეკეს ეროვნული ბანკიდან და მოლაპარაკების მაგიდას მივუსხდებითო. როდესაც ოფისში დავბრუნდით, ვიკითხე, სად არის ეროვნული ბანკის წარმომადგენელი? რა თქმა უნდა, ეროვნული ბანკიდან არავინ მოსულა.
გოგუაძე ჩვენთან მოსალაპარაკებლად იყო მოსული. მიუხედავად იმისა, რომ ჩვენ ვიცოდით, მან ფული მოგვპარა, მისთვის არაფერი გვითქვამს. ვთხოვეთ, გიორგი რადგან, შენ თვითონ მოხვედი, თქვი სიმართლე, რა და როგორ მოხდაო. როგორც კი გაიგო, რომ მის წინააღმდეგ პროკურატურაში შევიტანეთ საჩივარი, მეორე დღესვე ქვეყანა დატოვა. ამის შემდეგ, ის საქართველოში არავის უნახავს.
ყოფილი “სახალხო ბანკის” აქციონერების ადვოკატის დავით ერისთავის განცხადებით: “სასამართლო პროცესი არ არის მიმართული ბანკის წინააღმდეგ. აქციონერებისთვის ბანკი არის პრიორიტეტი. 2008 წელს, კრიმინალური გზით მოხდა “სახალხო ბანკის” აქციონერებისთვის აქციების წართმევა. აღნიშნულ საქმეზე აღძრულია სისხლის სამართლის საქმეზე დაკითხულია 200-ზე მეტი მოწმე.
როდესაც მესაკუთრეებს ბანკის აქციები წაართვეს 10 000 000 დოლარის კომპენსაცია გადაუხადეს. ჩვენი მიზანია ბანკი დავიბრუნოთ და განვავითაროთ. დღეს “ლიბერთი ბანკისგან” წერილი მივიღეთ. ისინი სასამართლოში აპირებენ სარჩელის შეტანას და სასამართლოს თხოვენ, მხარეს, რომელსაც წაართვეს აქციები ბარბაროსული გზით, აეკრძალოს ყველანაირი კომუნიკაცია. მათ შორის პირადი კომუნიკაცია.
ადვოკატი ვანო მერაბიშვილს, გიორგი გოგუაძეს და გიორგი ქადაგიძეს “სახალხო ბანკის” აქციონერებისთვის აქციების წართმევაში ადანაშაულებს და აცხადებს, რომ: “გოგუაძე იყო ერთ-ერთი აქციონერი, რომელსაც ბანკის მართვის სანაცვლოდ, უსასყიდლოდ გადაეცა აქციები. ასევე იყო გენერალური დირექტორი. როდესაც დაიწყო ბანკის წართმევის პროცესი, გაუნაწილებელი მოგებიდან მისი მეშვეობით მოხდა ფულის მოპარვა. ანუ 7 000 000 დოლარის მოპარვა მოხდა აქციონერებისგან. რეალურად, გოგუაძის მეშვეობით ხდებოდა ინფორმაციებისა და მუქარების მოტანა, რას უთვლიდა ვანო მერაბიშვილი ოჯახს. ეროვნული ბანკის პრეზიდენტი, გიორგი ქადაგიძე პირადად შეხვდა აქციონერებს. ემუქრებოდა და ეუბნებოდა: თუ ხელს არ მოაწერთ, 1 დოლარად წაგართმევთ ბანკსო. გოგუაძე მოვიდა და ოჯახს უთხრა, რომ ვანო მერაბიშვილმა შემოგვითვალა, დღე-დღეზე ნარკოტიკებით ამოავსებენ თქვენს ჩანთებს, ყველას დაგვაპატიმრებენო. ქალბატონი ირინა ჯინჯაჭარაძე შსს-ში შიდა ტელეფონით მერაბიშვილის თანაშემწეს დაუკავშირდა. თანაშემწემ უთხრა, რომ ამ თემაზე ლაპარაკი ზედმეტი იყო.
ჩვენ გავზრდით ჩვენს მოთხოვნებს. სასამართლომ ზიანის ნაწილში უარი გვითხრა წარმოებაში სარჩელის მიღებაზე, რის გამოც გაოცებული ვარ. 10 000 000 დოლარად მოხდა ბანკის ძირითადი აქციების წართმევა. რომლის კაპიტალი და ქონება იყო 318 000 000 ლარი.
ამ ეტაპზე ბანკი, როგორც იურიდიული პირი, საქმეში არაფერ შუაშია. აქციონერების წინააღმდეგ გვაქვს სარჩელი შეტანილი. ამ წუთას “ლიბერთი ჰოლდინგ ჯგუფის” აქციებია დაყადაღებული. ამ ჯგუფში ლადო გურგენიძე და სხვა ბენეფიციარები არიან.”
“გურია ნიუსი” ყოფილი “სახალხო ბანკის” ერთ-ერთი დამფუძნებლის ირინა ჯინჭარაძის და ყოფილი “სახალხო ბანკის” აქციონერების ადვოკატის მიერ გამოთქმულ ბრალდებაზე “ლიბერთი ბანკის” საზოგადოებასთან ურთიერთობის დეპარტამენტის ხელმძღვანელს, დოდო ბოჭორიშვილს დაუკავშირდა.
_ ქალბატონო დოდო, ვისგან შეიძინა “ლიბერთი ჰოლდინგ ჯორჯიამ ” “ლიბერთი ბანკის” წილი და რამდენად?
_ 2009 წლის სექტემბერში შპს “ევროოილი” –სგან 15 000 000 აშშ დოლარად.
_ “ლიბერთი ჰოლდინგ ჯორჯიაში“ რამდენი კომპანია შედის და რომელი კომპანიაა?
_ “ლიბერთი ჰოლდინგ ჯორჯია” ფლობს მხოლოდ სს “ლიბერთი ბანკის” აქციებს და მასში სხვა არანაირი კომპანია არ შედის.
_ არის თუ არა “ლიბერთი ჰოლდინგ ჯორჯიას“ ერთ–ერთი აქციონერი ლადო გურგენიძე?
_ არა. “ლიბერთი ჰოლდინგ ჯორჯიას” აქციონერი ლადო გურგენიძე არ არის.
– ჯინჭარაძისა და ყოფილი “სახალხო ბანკის” აქციონერების ადვოკატმა განაცხადა, რომ “ლიბერთი ბანკისგან“ წერილი მიიიღეს იმის თაობაზე, რომ სასამართლოში აპირებთ სარჩელის შეტანას. რა სარჩელის შეტანას აპირებს “ლიბერთი ბანკი“ სასამართლოში და რა კომუნიკაციის აკრძალვაზე საუბრობს ადვოკატი?
ეს კითხვა “ლიბერთი ბანკმა” უპასუხოდ დატოვა.
